Tơlơi Bơrơđah 19

Tơlơi Hơ̆k Mơak Amăng Plei Hiam

1Giơ̆ng anŭn, kâo hmư̆ amăng adai adih hmâo asăp kraih kar hăng asăp kơ sa phung mơnuih lu laĭ: “Halêluya!#19:1 Anai jing boh pơhiăp Grek, kiăng laĭ: “Pơ-ư ang kơ Ơi Adai Yêhôwa.” Tơlơi pơklaih, tơlơi guh kơang, laih anŭn tơlơi dưi mơyang lơ̆m kơ Ơi Adai ƀing ta, 2#Mơñă 32:43; II Pơtao 9:7.Yua kơ tơlơi Ñu phat kơđi jing djơ̆ gal laih anŭn tơpă hơnơ̆ng; Ñu hmâo phat laih kơđi đah kơmơi rih răm prŏng, pô hmâo pơgrĭ lŏn tơnah hăng tơlơi rih răm ñu, laih anŭn Ơi Adai hmâo phak ñu yua kơ ñu pơdjai ƀing ding kơna Ơi Adai.” 3#Êsai 34:10.Phung mơnuih lu ur kraih sa wơ̆t dơ̆ng: “Halêluya! Asăp apui ƀơ̆ng plei prŏng anŭn đĭ nanao hlŏng lar.” 4Dua pluh pă čô kŏng tha laih anŭn pă drơi hlô mơnơ̆ng hơdip bon laih anŭn kơkuh kơ Ơi Adai, Pô dŏ ber ƀơi gre pơtao, gơñu laĭ: “Amen, Halêluya!”

Phĕt Pơkol Ană Triu

5 # Adoh 115:13. Laih anŭn hmâo asăp ur tơbiă mơ̆ng gre pơtao, laĭ: “Bơni hơơč bĕ kơ Ơi Adai ƀing ta, Ơ abih bang ƀing ding kơna Ñu, ƀing hwĭ pơpŭ kơ Ñu, ƀing anĕt laih anŭn ƀing prŏng.”

6 # Êsê 1:24; Adoh 93:1; 97:1; 99:1. Giơ̆ng kơ anŭn kâo hmư̆ hrup hăng asăp phung mơnuih lu biă mă, hrup hăng dơnai lu glung ia, laih anŭn hrup hăng dơnai grơ̆m đah kơtang, ur kraih: “Halêluya! Yua kơ Khua Yang jing Ơi Adai Dưi Kơtang ƀing ta wai lăng. 7Brơi ƀing ta mơak laih anŭn hơ̆k kơdơ̆k bĕ, laih anŭn pơpŭ pơ-ư pơang Ñu, yua kơ phĕt pơkol Ană Triu truh laih, laih anŭn Bơnai Ñu hmâo pơhrôp ñu pô giơ̆ng laih. 8Arăng hmâo brơi kơ bơnai Ñu buh ao ngă hăng bơnal hơbuă añĕ ară, bơngač laih anŭn rơgoh hiam,” bơnal hơbuă ară añĕ anŭn jing khul bruă tơpă kơ ƀing rơgoh hiam.

9 # Mat 22:2,3. Ling jang anŭn laĭ kơ kâo: “Čih bĕ: Mơyun hiam yơh kơ ƀing mơnuih arăng hmâo jak kơ tơlơi huă ƀơ̆ng tơlơi pơdŏ rơkơi bơnai Ană Triu.” Laih anŭn ñu laĭ kơ kâo: “Anai jing khul boh pơhiăp sĭt mơ̆ng Ơi Adai.” 10Kâo bon ƀơi tơkai ñu kiăng kơkuh pơpŭ gơñu, samơ̆ ñu laĭ: “Anăm ngă tui anŭn ôh! Kâo jing ding kơna mă bruă hrŏm hơbĭt hăng ih laih anŭn hăng ƀing adơi ayŏng ih, jing ƀing djă pioh tơlơi gơ̆ng jơlan kơ Khua Yang Yêsu Krist. Kơkuh pơpŭ bĕ kơ Ơi Adai.” Yua kơ tơlơi gơ̆ng jơlan kơ Yêsu jing jua pơmĭn kơ tơlơi laĭ lui hlâo.

Pô Đĭ Aseh Kŏ

11 # Êsê 1:1; Adoh 96:13; Êsai 11:4. Hlăk anŭn kâo ƀuh adai pŏk hĭ, anai nê hmâo sa drơi aseh kŏ! Pô đĭ aseh anŭn hmâo anăn jing Hơnơ̆ng Ten laih anŭn Tơpă Sĭt. Ñu phat kơđi laih anŭn pơblah amăng tơlơi tơpă. 12#Đaniel 10:6.Mơta Ñu hrup hăng jơlah apui, ƀơi akŏ Ñu hmâo lu mŭk pơtao; hmâo sa anăn čih ƀơi Ñu, ƀu hmâo hlơi thâo ôh, kơnơ̆ng hơjan Ñu pô đôč thâo. 13Ñu buh ao phyung hmâo añrŭ laih amăng drah. Anăn Ñu arăng hmâo pơanăn jing Boh Pơhiăp Ơi Adai. 14Ƀing tơhan amăng adai leng kơ buh ao ngă hăng bơnal kơbuă añĕ ară kŏ laih anŭn rơgoh hiam, đĭ aseh kŏ đuaĭ tui Ñu. 15#Adoh 2:9; Êsai 63:3; Yôel 3:13; Bơrđ 14:20.Sa ƀĕ đao ƀơ̆ng biă mă tơbiă mơ̆ng bah Ñu. Hăng đao anŭn Ñu koh ƀing djuai mơnuih, laih anŭn Ñu či wai lăng ƀing gơñu hăng sa ƀĕ gai jra pơsơi. Ñu či juă kơthŭng djet boh kơƀâu kơ tơlơi Ơi Adai hil kơtang, Pô Dưi Kơtang. 16Arăng čih ƀơi ao phyung Ñu laih anŭn ƀơi pha Ñu sa anăn: PƠTAO KƠ ɃING PƠTAO, KHUA YANG KƠ ɃING KHUA YANG.

Dưi Hĭ Hăng Hlô Mơnơ̆ng Laih Anŭn Pô Laĭ Lui Hlâo Ƀlor

17 # Êsê 39:17-20. Giơ̆ng kơ anŭn kâo ƀuh sa čô ling jang dŏ dơ̆ng amăng yang hrơi. Ñu iâu abih bang čĭm dŏ pơr ƀơi tơ̆ng krah adai hăng asăp kraih: “Rai bĕ, pơtŭm pơƀŭt kơ tơlơi ƀơ̆ng huă prŏng Ơi Adai hmâo pơkra laih, 18kiăng kơ ƀơ̆ng asar ƀing pơtao, asar ƀing khua tơhan, asar ƀing hmâo tơlơi dưi kơtang, asar aseh laih anŭn asar ƀing đĭ aseh, asar abih bang mơnuih rơngai laih anŭn hlŭn, anĕt laih anŭn prŏng.”

19Giơ̆ng anŭn kâo ƀuh hlô glai laih anŭn ƀing pơtao ƀơi lŏn tơnah hrŏm hơbĭt hăng phung tơhan ƀing gơñu hmâo pơtŭm pơƀŭt glaĭ kiăng pơblah hăng Pô đĭ aseh laih anŭn hăng phung tơhan Ñu. 20#Bơrđ 13:1-18.Samơ̆ arăng mă hĭ hlô glai anŭn, laih anŭn pô laĭ lui hlâo ƀlor hrŏm hơbĭt hăng ñu, pô hmâo ngă laih ƀơi anăp ñu khul gru kơnăl, hăng tơlơi anŭn pô laĭ lui hlâo ƀlor plư ƀing hmâo mă tŭ laih tơlơi čih mrô hlô glai laih anŭn hmâo kơkuh laih kơ rup ñu. Arăng glŏm hơdip abih dua gơñu amăng dơnao apui boh pơtâo kơsŭm hlăk dŏ jă. 21Ƀing ăt dŏ glaĭ leng kơ arăng pơdjai hĭ hăng đao tơbiă mơ̆ng amăng bah pô đĭ aseh; laih anŭn abih bang čĭm brĭm leng kơ ƀơ̆ng trơi hăng asar ƀing gơñu.

Currently Selected:

Tơlơi Bơrơđah 19: JRA2016

Highlight

Copy

Compare