Tơlơi Bơrơđah 18

Plei Babilôn Tơglưh

1Giơ̆ng kơ tơlơi anŭn kâo ƀuh sa čô ling jang pơkŏn hmâo tơlơi dưi prŏng trŭn mơ̆ng adai, tơlơi guh kơang Ñu bang rơđah abih bang lŏn tơnah. 2#Êsai 21:9; Yêr 51:8; Bơrđ 14:8; Êsai 13:21; Yêr 50:39.Ñu ur kraih laĭ:

“Babilôn, prŏng prin hmâo tơglưh laih, hmâo tơglưh laih yơh!

Ñu hmâo jing hĭ laih anih dŏ kơ ƀing yang sat,

Par hruh kơ ƀing yang bơngăt grĭ hơƀak,

Amăng kơ abih bang khul čĭm laih anŭn hlô grĭ arăng bơrơmŭt;

3 # Êsai 23:17; Yêr 51:7. Yua kơ abih bang djuai mơnuih mơñum laih tơpai tơlơi rih răm hơƀak drak ñu,

Ƀing pơtao ƀơi lŏn tơnah ngă soh tơlơi rih răm hăng ñu,

Ƀing sĭ mia ƀơi lŏn tơnah jing pơdrŏng yua mơ̆ng tơlơi amoaih kluh rơgao hlah ñu.”

4 # Êsai 48:20; Yêr 50:8; 51:6,45. Giơ̆ng anŭn kâo hmư̆ asăp pơkŏn mơ̆ng adai laĭ:

“Ơ ană plei Kâo, tơbiă bĕ mơ̆ng Babilôn!

Anăm ƀing gih mŭt hrŏm hơbĭt amăng tơlơi soh ñu ôh,

Kiăng kơ ƀing gih ƀu či tŭ mă tơlơi răm ruă hrŏm hơbĭt hăng ñu;

5 # Čơd 18:20,21; Yêr 51:9. Yua kơ tơlơi soh ñu dăp đĭ glong truh pơ adai,

Laih anŭn Ơi Adai hơdơr kơ tơlơi soh sat ñu.

6 # Adoh 137:8; Yêr 50:29. Ngă bĕ kơ ñu kar hăng ñu ngă laih kơ arăng,

Pơglaĭ bĕ kơ ñu dua wơ̆t lu hloh tui hăng bruă ñu hmâo ngă;

Pơlŭk brơi bĕ kơ ñu dua wơ̆t lu hloh čơlŭ ñu hmâo pơlŭk brơi laih kơ arăng.

7 # Êsai 47:7-9. Hơdơ̆ pă Ñu hmâo pơ-ư pơang ñu pô laih anŭn hơdip tui tơlơi amoaih kluh,

Ngă bĕ kơ ñu tơlơi tơnap laih anŭn tơlơi kơ-ŭ kơ-uăn dơ̆ anŭn mơ̆n.

Yua kơ ñu laĭ amăng pran jua ñu:

‘Kâo dŏ ber hrup hăng sa čô đah kơmơi pơtao!

Kâo ƀu djơ̆ đah kơmơi djai rơkơi ôh,

Kâo ƀu či hmâo tơlơi kơ-ŭ kơ-uăn ôh.’

8Yua kơ anŭn yơh, amăng sa hrơi tơlơi răm ruă či truh kơ ñu:

Tơlơi djai, tơlơi kơ-ŭ kơ-uăn, tơlơi ư̆ rơpa.

Ơi Adai či čuh hĭ ñu amăng apui,

Yua kơ Khua Yang, Pô phat kơđi ñu, jing Ơi Adai bă hăng tơlơi dưi mơyang.”

9 # Êsê 26:16,17. Ƀing pơtao ƀơi lŏn tơnah hmâo ngă laih tơlơi soh rih răm, laih anŭn tơlơi hơdip amoaih kluh hăng ñu, či čŏk hia laih anŭn ur krao tơdang ƀuh asăp apui dŏ ƀơ̆ng ñu. 10Yua kơ hwĭ kơ tơlơi ruă tơnap ñu, hnŭn yơh gơñu dŏ pơ ataih, laih anŭn laĭ:

“Răm ƀăm yơh! Răm ƀăm yơh! Plei prŏng prin biă mă!

Babilôn plei pơdrŏng kơtang!

Kơnơ̆ng amăng sa mông đôč, tơlơi phat kơđi hmâo truh laih kơ ih!”

11 # Êsê 27:31,36. Ƀing sĭ mia ƀơi lŏn tơnah čŏk hia laih anŭn kơ-ŭ kơ-uăn yua kơ ñu, yua kơ arăng ƀu blơi dơ̆ng tah gơnam ƀing gơñu sĭ mia. 12#Êsê 27:12,13,22.Khul gơnam sĭ mia: mah, prăk, boh pơtâo yom, boh pơtâo ačung, bơnal kơbuă añĕ ară, bơnal mriah jŭ, bơnal suai hlăt, bơnal mriah huč; khul mơta kơyâo ƀâu mơngưi, khul mơnơ̆ng ngă hăng bla, hăng kơyâo yom, hăng kong, hăng pơsơi, laih anŭn hăng boh pơtâo marbrơ, 13kơđuh hol, mơnơ̆ng mơnâo, mơnơ̆ng ƀâu mơngưi, ia jrao phĭ, ia jrao ƀâu mơngưi, tơpai, ia rơmuă, tơpŭng, pơdai tơpŭng; rơmo, triu, aseh, rơdeh aseh, hlŭn laih anŭn bơngăt mơnuih. 14Hơdôm mơnơ̆ng hiam ih amoaih đuaĭ laih mơ̆ng ih: “Abih bang tơlơi pơdrŏng sah tơlơi kơdrưh kơang ih, rơngiă laih mơ̆ng ih, laih anŭn ih ƀu či ƀuh gơñu dơ̆ng tah!” 15#Êsê 27:31,36.Ƀing mơnuih sĭ mia khul gơnam anŭn, ƀing dưi jing pơdrŏng laih yua mơ̆ng Babilôn, či dŏ ataih yua kơ hwĭ tơlơi răm ruă ñu; gơñu či hia laih anŭn kơ-ŭ kơ-uăn, 16laih anŭn laĭ: “Răm ƀăm yơh! Răm ƀăm yơh! Kơ Babilôn prŏng prin anŭn, hmâo buh brơi laih bơnal kơbuă añĕ ară, bơnal mriah jŭ, laih anŭn mriah huč, pơhrôp hăng mah, boh pơtâo yom, laih anŭn boh pơtâo ačung! 17#Êsai 23:14; Êsê 27:26-30.Yua kơ amăng sa mông abih bang tơlơi pơdrŏng sah ñu răm rai laih.”

Abih bang ƀing khua kompăn, abih bang ƀing mơnuih đĭ amăng anŭn, ƀing mă bruă amăng kompăn laih anŭn abih bang ƀing mơnuih sĭ mia ƀơi ia rơsĭ, leng kơ dŏ dơ̆ng pơ ataih, 18#Êsê 27:32.laih anŭn gơñu ur kraih tơdang ƀuh asăp apui ƀơ̆ng ñu: “Aka hmâo djơ̆ ôh plei prŏng pă prŏng prin kar hăng plei prŏng anŭn!” 19#Êsê 27:30-34.Gơñu prui ƀruih lŏn ƀơi akŏ gơñu, čŏk hia, kơ-ŭ kơ-uăn, ur krao laih anŭn laĭ: “Răm ƀăm yơh, răm ƀăm yơh kơ Babilôn prŏng prin anŭn, anih ngă brơi kơ abih bang ƀing mơnuih hmâo kompăn ƀơi ia rơsĭ jing pơdrŏng sah yua mơ̆ng tơlơi pơdrŏng sah ñu, samơ̆ kơnơ̆ng amăng sa mông đôč arăng pơrai hĭ ñu laih.

20 # Mơñă 32:43; Yêr 51:48. Ơ adai, hơ̆k mơak bĕ yua kơ ñu, Ơ ƀing rơgoh hiam, ƀing khua ding kơna laih anŭn ƀing pô laĭ lui hlâo ăt hơ̆k mơak bĕ, yua kơ Ơi Adai hmâo klă kơđi laih ñu tui hăng tơlơi ñu hmâo ngă kơ ƀing gih!”

21 # Yêr 51:63,64; Êsê 26:21. Hlăk anŭn, sa čô ling jang bă hăng tơlơi dưi kơtang mă sa boh pơtâo prŏng hrup hăng sa boh rơsŭng prŏng, glŏm trŭn amăng ia rơsĭ, laih anŭn laĭ: “Ơi Adai či glŏm trŭn plei prŏng Babilôn hrup hăng anŭn mơ̆n, laih anŭn ƀu hmâo hlơi ƀuh ñu dơ̆ng tah. 22#Êsê 26:13; Êsai 24:8.#Yêr 7:34; 25:10.Arăng ƀu či hmư̆ dơ̆ng ôh amăng ih dơnai ƀing pĕ brŏ, laih anŭn ƀing adoh, ƀing ayŭp đing klơt laih anŭn ayŭp tơki; arăng ƀu či ƀuh dơ̆ng ôh amăng ih sa čô mơnuih kơhnâo bruă kơ djŏp mơta bruă, laih anŭn arăng ƀu či hmư̆ dơ̆ng ôh amăng ih dơnai rơsŭng dar. 23Tơlơi bơngač apui kơđen ƀu pơčrang dơ̆ng tah amăng ih, asăp dra hơđŭ dăm han ăt ƀu či hmư̆ dơ̆ng tah amăng ih, yua kơ ƀing sĭ mia ih jing ƀing mơnuih hmâo tơlơi dưi ƀơi lŏn tơnah laih anŭn yua kơ abih bang djuai mơnuih leng kơ lĕ amăng pơjâu mơnăn ih plư pleč.

24 # Yêr 51:49. Laih anŭn amăng plei anai arăng ƀuh drah ƀing pô laĭ lui hlâo, laih anŭn ƀing rơgoh hiam, laih anŭn abih bang ƀing arăng hmâo pơdjai laih ƀơi lŏn tơnah.”

Currently Selected:

Tơlơi Bơrơđah 18: JRA2016

Highlight

Copy

Compare