Tơlơi Yap 13
13
Pluh Dua Čô Kơnuă
1Yêhôwa laĭ kơ Môis: 2“Brơi ih pơkiaŏ nao bĕ ƀing mơnuih kơsem lăng čar Kanaan, jing anih Kâo či pha brơi ană Israel. Rĭm kơnŭng djuai khŏm mơit sa čô mơnuih, jing mơnuih amăng ƀing gĭt gai gơñu.” 3Hnŭn yơh, Môis mơ̆ng tơdrŏn har Paran pơkiaŏ gơñu nao tui hăng tơlơi Yêhôwa pơđar. Abih bang leng kơ jing khua akŏ kơ ană plei Israel.
4Anai jing anăn ƀing anŭn: Kơnŭng djuai Ruben, hmâo Samua ană đah rơkơi Sakur; 5Saphat ană đah rơkơi Hôri mơ̆ng kơnŭng djuai Simêôn; 6Kalep ană đah rơkơi Jêphunê mơ̆ng kơnŭng djuai Yuđa; 7Igal ană đah rơkơi Yôsep mơ̆ng kơnŭng djuai Isakar; 8Hôsê ană đah rơkơi Nun mơ̆ng kơnŭng djuai Êphraim; 9Palti ană đah rơkơi Raphu mơ̆ng kơnŭng djuai Benjamin; 10Gadiel ană đah rơkơi Sôdi mơ̆ng kơnŭng djuai Sabulôn; 11Gadi ană đah rơkơi Susi mơ̆ng kơnŭng djuai Yôsep (anŭn jing kơnŭng djuai Manasê); 12Amiêl ană đah rơkơi Gêmali mơ̆ng kơnŭng djuai Đan; 13Sêthur ană đah rơkơi Mikel mơ̆ng kơnŭng djuai Aser; 14Nahbi ană đah rơkơi Wôsi mơ̆ng kơnŭng djuai Naptali; 15Gêuel ană đah rơkơi Maki mơ̆ng kơnŭng djuai Gat; 16Anŭn jing anăn ƀing mơnuih Môis hmâo pơkiaŏ nao kiăng kơsem lăng čar. Môis pơanăn Hôsê ană đah rơkơi Nun jing Yôsuê.
17Tơdang pơkiaŏ nao ƀing mơnuih nao kơsem lăng lŏn čar Kanaan, Môis pơtă tui anai: “Đĭ nao bĕ pơ Nêgep, laih anŭn mŭt nao pơ kriăng čư̆, 18laih anŭn kơsem lăng lŏn anŭn hyư̆m pă, mơnuih amăng anŭn kơtang ƀôdah tơdu, ƀiă ƀôdah lu, 19plei pla ƀing anŭn hiam ƀôdah sat; abih bang pơnăng plei anŭn hyư̆m pă, hmâo pơnăng prŏng kơjăp ƀôdah kơnơ̆ng anih jưh, ƀôdah ƀu hmâo pơnăng ôh; 20lŏn hiam ƀôdah ƀu hiam, hmâo kơyâo pơtâo ƀôdah ƀu hmâo. Brơi khĭn bĕ hăng ba glaĭ ƀiă boh kơyâo kơ čar anŭn.” Hlăk anŭn jing bơyan khul boh kơƀâu.
21Tui anŭn, ƀing anŭn đĭ nao kơsem lăng čar anŭn mơ̆ng tơdrŏn har Sin truh pơ Rêhôp giăm plei Hamat. 22Gơñu đĭ nao pơ Nêgep, laih anŭn truh pơ plei Hêbron jing anih hmâo Ahiman, Sêsai laih anŭn Talmai ƀing ană tơčo Anak dŏ. Plei Hêbron pơdơ̆ng đĭ hlâo kơ plei Sôan čar Êjip tơjuh thŭn. 23Gơñu truh pơ hơnoh ia Êskôl, ƀơi anŭn gơñu čơ̆ng sa ƀĕ than boh kơƀâu hmâo kơtul boh kơƀâu. Dua čô mơnuih khŏm yua hăng gai amơĭ kah dưi čơkung. Gơñu ăt djă ba mơ̆n khul boh pom granat laih anŭn boh hra. 24Arăng pơanăn anih anai jing hơnoh ia Êskôl#13:24 Êskôl: Amăng boh pơhiăp Hêbrơ, boh hră anai kiăng pia jing “kơtul boh kơƀâu”. yua kơ hmâo kơtul boh kơƀâu ƀing Israel hmâo čơ̆ng mă laih mơ̆ng anih anŭn.
Tơlơi Pơthâo Glaĭ kơ Tơlơi Nao Kơsem Lăng
25Gơñu nao kơsem lăng lŏn čar anŭn amăng pă pluh hrơi laih anŭn wơ̆t glaĭ. 26Ƀing kơnuă nao pơ Môis, Arôn hăng abih bang ană plei Israel ƀơi anih Kadês amăng tơdrŏn har Paran laih anŭn gơñu ruai glaĭ abih bang tơlơi brơi kơ Môis, Arôn hăng abih bang ană plei Israel, laih anŭn pơrơđah brơi gơñu ƀuh boh troh lŏn čar anŭn. 27Ƀing mơnuih anŭn ruai glaĭ kơ Môis tui anai: “Ƀing gơmơi hmâo nao laih pơ anih lŏn ƀing gih hmâo pơkiaŏ gơmơi nao. Lŏn anŭn jing lŏn hiam laih anŭn pơdrŏng sah; anai jing boh troh mơ̆ng lŏn čar anŭn. 28Samơ̆, mơnuih amăng lŏn čar anai jing kơtang biă mă, pơnăng plei gơñu kơjăp laih anŭn prŏng. Ƀing gơmơi ăt ƀuh mơ̆n ƀing ană tơčo Anak pơ anŭn. 29Ƀing mơnuih Amalek dŏ amăng čar Nêgep; mơnuih Hitit, mơnuih Jêbusit hăng mơnuih Amôrit dŏ ƀơi bul čư̆; mơnuih Kanaan dŏ giăm ia rơsĭ laih anŭn kơtuai hăng ia krong Yurdan.”
30Hlăk anŭn, Kalep ngă brơi abih bang ană plei pla hlăk dŏ pơhiăp brŏk#13:30 Dưi pơblang dơ̆ng mơ̆n: wang dar. kơ Môis khŏm rơiăt hĭ tơdang ñu laĭ: “Ƀing ta đĭ nao bĕ laih anŭn plah sua mă lŏn čar, yua kơ sĭt biă mă ƀing ta dưi mă tŭ lŏn čar anŭn.” 31Samơ̆ ƀing mơnuih nao hrŏm hăng Kalep laĭ tui anai: “Ƀing ta ƀu dưi đĭ nao pơkơdơ̆ng hăng ƀing mơnuih lŏn čar anŭn ôh, yua gơñu kơtang hloh kơ ƀing ta.” 32Gơñu ruai glaĭ kơ ƀing ană plei pla Israel kơ lŏn čar gơñu hmâo nao kơsem lăng, anŭn jing tơlơi ƀu hiam kơ ană plei pla ôh tơdang gơñu laĭ: “Lŏn čar ƀing gơmơi hmâo nao kơsem lăng anŭn jing lŏn čar lun ƀơ̆ng ƀing ană plei pla ñu pô. Abih bang ƀing mơnuih gơmơi hmâo ƀuh ƀơi anŭn leng kơ jing ƀing mơnuih prŏng glong soh sel. 33Ƀing gơmơi hmâo ƀuh ƀing mơnuih prŏng glong anŭn, jing ană tơčo Anak, jing djuai mơnuih prŏng prin pơ anŭn. Ƀing gơmơi lăng glaĭ ƀing gơmơi pô hrup hăng kơtop laih anŭn ƀing gơñu lăng gơmơi ăt kar hăng anŭn mơ̆n.”#Čơd 6:4.
Currently Selected:
Tơlơi Yap 13: JRA2016
Highlight
Copy
Compare
Share
Want to have your highlights saved across all your devices? Sign up or sign in
© 2016 United Bible Societies. All rights reserved.
