Tơlơi Tơbiă 38
38
Kơƀang Pơyơr Ngă Yang Čuh
(Tơb 27:1-8)
1Ñu ăt ngă mơ̆n kơƀang pơyơr ngă yang čuh hăng kơyâo akasi rup mơta thar, rĭm akiăng dua met dua laih anŭn glong ñu sa met klâo. 2Ñu ngă khul tơki pơklep ƀơi pă akiăng kơƀang ngă yang; khul tơki anŭn jing hĭ ha sa hăng kơƀang ngă yang. Kơƀang ngă yang hmâo lom hăng kong. 3Tơdơi kơ anŭn ñu ngă khul gơnam yua amăng kơƀang ngă yang hrup hăng gŏ pioh tơpur, kơjroh, čơlŭ prŏng, awak laih anŭn mơnơ̆ng pioh hơdăng ngur. Abih bang leng kơ ngă hăng kong. 4Ñu ăt ngă mơ̆n kơ kơƀang ngă yang anŭn sa boh grang kong pioh gơ̆ gah yŭ kơƀang ngă yang, sa mơkrah boh glong kơƀang ngă yang, 5laih anŭn tuh kia pă boh gơwang ƀơi pă akiăng grang ngă hăng kong kiăng truă gai čơkung. 6Ñu ngă khul gai čơkung hăng kơyâo akasi, lom hăng kong, 7laih anŭn truă gai čơkung anŭn amăng gơwang ƀơi dua gah djeo kơƀang ngă yang yua kiăng čơkung gơ̆. Ñu ngă kơƀang ngă yang anŭn hăng tơr kơyâo pơklep glaĭ, hmâo anih rơhông amăng lăm kơ kơnưl anŭn.
Kơthŭng Ia Ngă hăng Kong
(Tơb 30:18)
8 #
Tơb 30:18. Ñu yua khul mơnĭl pơđok ƀô̆ mơta mơ̆ng ƀing đah kơmơi mă bruă ƀơi bah amăng mŭt sang khăn pơƀŭt kiăng ngă sa boh kơthŭng rao hmâo pă ƀĕ tơkai hăng kong.
Wăl Sang Khăn
(Tơb 27:9-19)
9Ñu ngă wăl sang khăn; gah dơnŭng kơ wăl hmâo mơnal păng mrai hơbuă, glong năng ai pă pluh pă met, 10hăng dua pluh ƀĕ tơmeh laih anŭn dua pluh bluh tơmeh hăng kong, samơ̆ rĭm kơnuĕ tơmeh laih anŭn kơyâo găn pơklep hrŏm ngă hăng prăk. 11Gah kơdư ăt hmâo pă pluh pă met mơnal păng, dua pluh ƀĕ tơmeh laih anŭn dua pluh bluh tơmeh ngă hăng kong, samơ̆ rĭm kơnuĕ tơmeh laih anŭn kơyâo găn pơklep hrŏm ngă hăng prăk. 12Gah yŭ hmâo dua pluh met mơnal păng hăng pluh ƀĕ tơmeh laih anŭn pluh bluh tơmeh ngă hăng kong, rĭm kơnuĕ tơmeh laih anŭn kơyâo găn pơklep hrŏm ngă hăng prăk. 13Gah anăp, jing gah ngŏ, gah yang hrơi biă, ăt hmâo dua pluh met mơnal păng mơ̆n; 14khul mơnal păng gah anai kơ bah amăng wăl sang glong năm met năm hăng klâo ƀĕ tơmeh laih anŭn klâo boh bluh tơmeh. 15Gah adih ăt hmâo năm met năm mơnal păng hăng klâo ƀĕ tơmeh laih anŭn klâo boh bluh tơmeh mơ̆n. 16Abih bang khul mơnal păng jum dar wăl leng kơ ngă hăng mrai hơbuă. 17Rĭm bluh tơmeh arăng ngă hăng kong, samơ̆ kơnuĕ tơmeh laih anŭn kơyâo găn pơklep hrŏm ngă hăng prăk, rĭm akŏ tơmeh ăt lom hăng prăk mơ̆n. Abih bang khul tơmeh wăl sang leng kơ pơklep hrŏm yua mơ̆ng khul kơyâo găn pơklep hrŏm ăt lom hăng prăk. 18Mơnal păng ƀơi bah amăng wăl sang arăng hmâo kơteh hăng bruă kơhnâo hiam hăng mrai hơbuă, mrai mơtah, mrai mriah jŭ, mrai mriah huč; mơnal păng glong sapăn met sapăn, dơ̆ng ñu dua met dua, mơdơ̆ hơnơ̆ng hăng khul mơnal păng jum dar wăl sang. 19Pă ƀĕ tơmeh laih anŭn pă boh bluh tơmeh hăng kong, kơnuĕ tơmeh ngă hăng prăk; akŏ tơmeh lom hăng prăk laih anŭn kơyâo găn pơklep hrŏm ăt ngă hăng prăk mơ̆n. 20Abih bang gai pơ̆ng sang khăn laih anŭn wăl sang jum dar leng kơ ngă hăng kong.
Tĭng Pơƀŭt Gơnam Yua Amăng Sang Khăn
21Anai jing mrô tĭng pơƀŭt mơnơ̆ng yua kơ sang khăn, kiăng laĭ sang khăn kơnol pơgop, hmâo tĭng pơƀŭt tui hăng asăp Môis hmâo pơtrŭn brơi laih kơ ƀing Lêwi, gah yŭ tơlơi Ithamar gĭt gai, ană đah rơkơi khua ngă yang Arôn. 22Bêsalel ană đah rơkơi Uri, tơčo Hur, mơ̆ng kơnŭng djuai Yuđa, ngă abih mơnơ̆ng Yêhôwa hmâo pơtă laih kơ Môis. 23Hrŏm hăng Ôhôliap, ană đah rơkơi Ahisamak, jing pô djru ñu mơ̆ng kơnŭng djuai Đan, jing pô thâo trah, pô thâo pơčeh pơjing, pô thâo kơteh mrai hơbuă hăng mrai ia mơtah, mrai mriah jŭ, mriah huč.
24Abih bang mah arăng hmâo pơyơr laih yua amăng bruă pơdơ̆ng anih rơgoh hiam năng ai jing sa rơbâo kilôgram,#38:24 Boh hră phŭn: 29 tơlăng; sa ta lăng mơdơ̆ hăng 34 kg. tui hăng mrô hơnơ̆ng pơkă mơ̆ng anih rơgoh hiam 25#Tơb 30:11-16.Abih bang mrô prăk mơ̆ng ƀing mơnuih dưi yap laih amăng ƀing ană plei pla Israel hmâo klâo rơbâo pă rơtuh klâo pluh kilôgram, tui hăng mrô hơnơ̆ng pơkă mơ̆ng anih rơgoh hiam. 26#Mat 17:24.Abih bang ƀing mơnuih arăng hmâo yap čơdơ̆ng mơ̆ng pluh dua thŭn hăng ngŏ, hmâo năm rơtuh klâo rơbâo rơma rơtuh rơma pluh čô, rĭm akŏ mơnuih duh jia năm gram tui hăng mrô hơnơ̆ng pơkă mơ̆ng anih rơgoh hiam. 27Klâo rơbâo pă rơtuh kilôgram prăk yua pioh tuh kia rĭm bluh tơmeh anih rơgoh hiam, laih anŭn rĭm bluh tơmeh khăn păng; klâo rơbâo pă rơtuh kilôgram kơ sa rơtuh boh bluh tơmeh jing klâo pluh pă kilôgram kơ rĭm boh bluh tơmeh. 28Klâo pluh kilôgram dŏ glaĭ arăng yua ngă gơnuĕ tơmeh, lom rĭm akŏ tơmeh laih anŭn ngă kơyâo găn pơklep brơi kơ rĭm ƀĕ tơmeh. 29Abih bang mrô kong hmâo pơgop glaĭ jing dua rơbâo pă rơtuh kilôgram. 30Hăng kong anŭn hmâo yua ngă bluh tơmeh bah amăng mŭt sang khăn pơƀŭt, kơƀang ngă yang hăng kong, grang kong laih anŭn abih bang mơnơ̆ng yua amăng kơƀang ngă yang, 31rĭm bluh tơmeh jum dar wăl sang, rĭm bluh tơmeh bah amăng wăl sang, rĭm gai pơ̆ng sang khăn, laih anŭn rĭm jum dar wăl sang khăn.
Currently Selected:
Tơlơi Tơbiă 38: JRA2016
Highlight
Copy
Compare
Share
Want to have your highlights saved across all your devices? Sign up or sign in
© 2016 United Bible Societies. All rights reserved.
