Tơlơi Tơbiă 39
39
Sum Ao Ƀing Khua Ngă Yang
(Tơb 28:1-43)
1Gơñu yua mrai mơtah, mrai mriah jŭ, mriah huč kiăng kơ tơčoh sum ao hăng bruă sĭt tơčoh pioh kơ bruă amăng anih rơgoh hiam; gơñu tơčoh sum ao rơgoh hiam kơ Arôn tui hăng Yêhôwa hmâo pơtă laih kơ Môis.
Êphot
2Ñu tơčoh êphot hăng mrai hơbuă, mrai mah, mrai ia mơtah, mrai mriah jŭ, mriah huč. 3Gơñu glit mah jing hĭ hla rơpih laih anŭn khăt hĭ jing mrai, tơčoh hrŏm hăng mrai hơbuă, mrai mơtah, mrai mriah jŭ, mriah huč, hăng tơlơi bruă kơhnâo hiam biă mă. 4Gơñu tơčoh dua pŏk mơnal êphot gom bra sĭt pơklep dua akŏ ñu amăng êphot. 5Hơdrăng hruă gah rơngiao kơ êphot hmâo tơčoh hăng sa bruă sĭt mơñam, hrŏm sa mơnơ̆ng hrup hăng êphot, jing hăng mrai mah, mrai hơbuă, mrai ia mơtah, mrai mriah jŭ, mriah huč, tui hăng Yêhôwa hmâo pơtă laih kơ Môis.
6Gơñu prăp rơmet boh pơtâo ônik, ƀlit amăng gơnă mah, kiăng kơčar amăng rup kơčar hăng mah laih anŭn kơčar anăn ƀing ană đah rơkơi Israel ƀơi boh pơtâo yom hrup hăng kơčar boh kơđŏm. 7Ñu pioh khul boh pơtâo yom anŭn ƀơi mơnal gom bra êphot, hrup hăng khul boh pơtâo pơ hơdơr kơ ƀing ană đah rơkơi Israel, tui hăng Yêhôwa hmâo pơtă laih kơ Môis.
Hnal Băk Ƀơi Tơda
(Tơb 28:15-30)
8Gơñu ăt ngă mơ̆n mơnal băk ƀơi tơda hăng bruă kơhnâo hiam biă mă kar hăng bruă ngă êphot, jing ngă hăng mrai mah, mrai hơbuă, mrai ia mơtah, mrai mriah jŭ, mriah huč. 9Hnal băk ƀơi tơda hmâo rup mơta thar laih anŭn tơčoh dua tal, glong sa gam, da sa gam. 10Gơñu ƀlit pă pruĕ boh pơtâo yom: Pruĕ tal sa hmâo: sardôn, tôpas, êmêrôt; 11pruĕ tal dua hmâo: êskabuk, saphir, diamôn; 12pruĕ tal klâo hmâo: ôpal, agat, amêtis; 13pruĕ tal pă hmâo: bêril, ônik, jaspidi. Rĭm boh pơtâo yom anai arăng kơčar amăng gơnă ngă hăng mah. 14Abih bang mrô boh pơtâo yom anŭn jing pluh dua asar, tui hăng anăn ƀing ană đah rơkơi Israel. Rĭm asar boh pơtâo hmâo kơčar anăn kơ sa amăng ƀing pluh dua kơnŭng djuai Israel hrup hăng kơčar boh kơđŏm mơ̆n.
15Ƀơi hnal băk tơda, gơñu ngă khul hrĕ añŭ hăng mah rơgoh, pơpăl kar hăng hrĕ kuĭ. 16Gơñu ăt ngă dua boh gơwang kơčar laih dua boh gơwang ngă hăng mah, giơ̆ng anŭn pơ̆ng dua gơwang anŭn ƀơi dua akiăng hnal băk ƀơi tơda 17Gơñu čŭt dua ară hrĕ añŭ mah amăng dua gơwang dŏ ƀơi akiăng gah ngŏ hnal băk ƀơi tơda, 18laih anŭn pơklep dua akŏ dŏ glaĭ kơ dua ară hrĕ añŭ ƀơi gơwang kơčar, jing pơklep gah anăp kơ hnal bra êphot. 19Giơ̆ng anŭn gơñu ngă dua boh gơwang mah pơkŏn laih anŭn pơklep gơñu ƀơi dua akiăng gah yŭ kơ hnal băk tơda, amăng lăm êphot. 20Gơñu ăt ngă mơ̆n dua boh gơwang mah pơkŏn dơ̆ng laih anŭn pơklep gơñu ƀơi gah yŭ kơ mơnal gom bra êphot, ƀơi anih tơkuh hăng ngŏ kơ mơnal hruă êphot. 21Gơñu yua sa ară hrĕ ia mơtah akă ƀơi gơwang hnal băk ƀơi tơda hăng khul gơwang êphot, tui anŭn yơh hnal băk ƀơi tơda pơklep hăng mơnal hruă, ƀu či lĕ trŭn ôh mơ̆ng êphot tui hăng Yêhôwa hmâo pơtă laih kơ Môis.
Ao Phyung laih anŭn Khul Sum Ao Pơkŏn
(Tơb 28:31-43)
22Gơñu ăt tơčoh mơ̆n ao phyung êphot leng hăng mrai mơtah soh sel. 23Tơkuai ao phyung dŏ tơ̆ng krah ao hrup hăng tơkuai ao pơsơi laih anŭn hmâo gơnă jum dar kiăng kơ ƀu tơĭ ôh. 24Ƀơi jih ao, gah yŭ gơñu sor boh pom granat hăng mrai hơbuă, mrai ia mơtah, mrai mriah jŭ, mriah huč, 25laih anŭn ngă khul boh driao anĕt hăng mah rơgoh, sĭt pơmŭt ƀơi tơ̆ng krah dua boh pom granat pơklep jum dar gơwang jih ao; 26kiăng laĭ amăng sa boh pom granat hmâo sa boh driao laih anŭn sa boh pom granat dơ̆ng pơklep jum dar jih ao ngă yang tui hăng Yêhôwa hmâo pơtă laih kơ Môis.
27Gơñu tơčoh ao phyung kơ Arôn laih anŭn kơ ƀing ană đah rơkơi ñu hăng mrai hơbuă, 28wơ̆t hăng mŭk, kưn pơ̆n laih anŭn sum đŭt abih bang leng kơ ngă hăng bơnal hơbuă, 29hơdrăng kơiăng sĭt mơñam hăng mrai hơbuă, mrai ia mơtah, mrai mriah jŭ, mriah huč, tui hăng Yêhôwa hmâo pơtă laih kơ Môis.
30Gơñu ăt ngă mơ̆n sa pŏk plăk hrup hăng mŭk pơtao rơgoh hiam hăng mah rơgoh. Kơčar ƀơi anŭn khul boh hră: “RƠGOH HIAM KƠ YÊHÔWA”. hrup hăng arăng kơčar boh kơđŏm. 31Giơ̆ng anŭn akă plăk anŭn hăng sa ară hrĕ ia mơtah, kiăng akă kơjăp hăng ngŏ kơ mŭk pơtao, tui hăng Yêhôwa hmâo pơtă laih kơ Môis.
Ngă Pơgiơ̆ng Sang Khăn
(Tơb 35:10-19)
32Tui anŭn, abih bang bruă ngă amăng sang khăn. Kiăng laĭ Sang Khăn Pơƀŭt, hmâo giơ̆ng abih bang laih. Ƀing ană plei pla Israel hmâo ngă laih abih bang bruă djơ̆ tui hăng tơlơi Yêhôwa hmâo pơtă laih kơ Môis. 33Gơñu ba sang khăn kơ Môis: sang khăn laih anŭn gơnam yua amăng sang khăn, gơnuĕ, hnap, kơyâo găn, tơmeh laih anŭn bluh tơmeh; 34khăn gom hăng klĭ triu tơno añrŭ ia mriah, khăn gom hăng klĭ akan hiam, laih anŭn khăn păng ƀơi Anih Rơgoh Hloh 35hip kơnol pơgop hmâo gai čơkung ñu laih anŭn kơhnơ̆p tơlơi pap; 36kơƀang laih anŭn abih bang mơnơ̆ng yua amăng kơƀang laih anŭn ƀañ tơpŭng pơyơr kơ Ơi Adai; 37gơ̆ng apui kơđen hăng mah rơgoh hmâo khul apui kơđen, hmâo dăp dă laih, abih bang mơnơ̆ng yua amăng gơ̆ng apui kơđen laih anŭn ia apui; 38kơƀang ngă yang hăng mah, ia ƀâu hiam, mơnơ̆ng ƀâu mơngưi laih anŭn khăn păng ƀơi bah amăng mŭt sang khăn; 39kơƀang ngă yang hăng kong laih anŭn grang hăng kong, gai čơkung laih anŭn abih bang mơnơ̆ng yua amăng kơƀang ngă yang; kơthŭng ia laih anŭn tơkai kơthŭng; 40khul mơnal păng wăl sang, tơmeh, bluh tơmeh laih anŭn mơnal păng ƀơi amăng jang mŭt amăng wăl sang, hrĕ kuĭ, gai pơ̆ng, laih anŭn abih bang mơnơ̆ng yua amăng bruă ngă yang amăng sang khăn laih anŭn sang khăn pơƀŭt; 41abih bang sum ao hăng bruă sĭt mơñam pioh kơ mă bruă amăng anih rơgoh hiam, grop sum ao rơgoh hiam kơ khua ngă yang Arôn laih anŭn khul sum ao kơ ƀing ană đah rơkơi ñu kiăng kơ ngă bruă khua ngă yang.
42Ƀing ană plei pla Israel ngă abih bang bruă anŭn djơ̆ tui hăng Yêhôwa hmâo pơtă laih kơ Môis. 43Môis kơsem abih bang bruă, laih anŭn ƀuh ƀing gơñu hmâo ngă pơgiơ̆ng laih abih bang djơ̆ tui hăng Yêhôwa pơtă laih. Tui anŭn Môis hơơč tơlơi mơyun hiam kơ gơñu.
Currently Selected:
Tơlơi Tơbiă 39: JRA2016
Highlight
Copy
Compare
Share
Want to have your highlights saved across all your devices? Sign up or sign in
© 2016 United Bible Societies. All rights reserved.
