Tơlơi Tơbiă 37
37
Ngă Hip Kơnol Pơgop
(Tơb 25:10-22)
1Bêsalel ngă sa boh hip hăng kơyâo akasi; glong ñu sa rơtuh pluh sentimet, da ñu năm pluh năm sentimet. 2Ñu lom hăng mah rơgoh amăng lăm wơ̆t kơ gah rơngiao laih anŭn ngă gơnă jum dar hăng mah. 3Ñu tuh kia pă boh gơwang hăng mah pioh ƀơi pă akiăng: dua boh gơwang gah anai laih anŭn dua boh gơwang gah adih. 4Ñu ăt ngă khul gai čơkung hăng kơyâo akasi, lom hăng mah. 5Giơ̆ng anŭn truă gai čơkung amăng khul gơwang dua gah kiăng kơ čơkung.
Ngă Kơhnơ̆p Tơlơi Pap
6Ñu ăt ngă sa boh kơhnơ̆p tơlơi pap hăng mah rơgoh; glong ñu sa rơtuh pluh sentimet, da ñu năm pluh năm sentimet. 7Tơdơi kơ anŭn ñu ngă dua rup čêrubim hăng mah glit rơpih pioh ƀơi dua akiăng kơhnơ̆p tơlơi pap, 8sa rup čêrubim ƀơi sa akiăng anai laih anŭn sa rup čêrubim ƀơi akiăng adih, pơklep hrŏm hăng dua akiăng kơhnơ̆p tơlơi pap. 9Dua rup čêrubim blang čăng gom kơhnơ̆p tơlơi pap hăng čăng gơñu. Anăp pơklă anăp, rĭm čêrubim anăp nao gah kơhnơ̆p tơlơi pap.
Ngă Kơƀang Pioh Ƀañ Tơpŭng
(Tơb 25:23-30)
10Ñu ăt ngă kơƀang hăng kơyâo akasi; glong ñu sapăn pluh sapăn sentimet, da ñu pă pluh pă sentimet laih anŭn dơ̆ng ñu năm pluh năm sentimet. 11Ñu lom hăng mah rơgoh, laih anŭn ngă gơnă jum dar hăng mah. 12Ñu ăt ngă gai kep jum dar kơƀang glong năng ai pă sŭn laih anŭn ngă gơnă hăng mah jum dar gai kep anŭn. 13Ñu tuh kia pă boh gơwang mah, laih anŭn pioh ƀơi pă akiăng, anih hmâo tơkai kơƀang. 14Rĭm gơwang pơklep jĕ kơhnal gơnă kiăng truă khul gai čơkung. 15Ñu ngă gai čơkung hăng kơyâo akasi laih anŭn lom hăng mah, kiăng yua čơkung kơƀang anŭn. 16Ñu ăt mă mah rơgoh kiăng ngă khul gơnam pioh ƀơi kơƀang hrup hăng: jam laih anŭn mŏng pioh mơnơ̆ng ƀâu hiam, čơlŭ, bơlŏ laih anŭn mŏng kiăng yua phĕt ngă yang tuh ia tơpai.
Ngă Gơ̆ng Apui Kơđen
(Tơb 25:31-40)
17Ñu ăt ngă gơ̆ng apui kơđen hăng mah rơgoh; plă laih anŭn drơi gơ̆ng apui kơđen ngă hăng mah glit rơpih, get ñu, tơƀuai ñu laih anŭn bơnga apui kơđen leng kơ pơklep hăng gơ̆ng apui kơđen. 18Hmâo năm ƀĕ than tơbiă rai dua gah gơ̆ng apui kơđen, klâo ƀĕ than gah anai klâo than gah adih. 19Amăng năm ƀĕ than tơbiă mơ̆ng gơ̆ng apui kơđen anŭn, amăng rĭm sa ƀĕ than hmâo klâo boh get ñu jing kar hăng bơnga mơdưh hăng sa boh tơƀuai laih anŭn bơnga gơ̆ng apui kơđen. 20Ƀơi gơ̆ng apui kơđen hmâo pă boh get ngă kar hăng bơnga mơdưh hăng sa boh tơƀuai laih anŭn bơnga gơ̆ng apui kơđen. 21Amăng năm than mơ̆ng gơ̆ng apui kơđen tơbiă rai, rĭm kơ dua than hmâo sa boh tơƀuai apui kơđen. 22Rĭm boh tơƀuai laih anŭn than gơ̆ng apui kơđen leng kơ pơklep hăng gơ̆ng apui kơđen, abih bang leng ngă hăng mah rơgoh glit rơpih. 23Ñu ăt ngă tơjuh ƀĕ apui, thŏng khăt mrai apui kơđen laih anŭn jam pioh hnop ngă hăng mah rơgoh. 24Ñu yua sa tơlăng mah rơgoh pioh ngă gơ̆ng apui kơđen laih anŭn abih bang mơnơ̆ng yua pơkŏn.
Ngă Kơƀang Ngă Yang Čuh Mơnơ̆ng Ƀâu Hiam
(Tơb 30:1-5)
25Ñu ăt ngă kơƀang ngă yang čuh mơnơ̆ng ƀâu hiam hăng kơyâo akasi rup mơta thar, rĭm akiăng pă pluh pă sentimet laih anŭn glong ñu sapăn pluh sapăn sentimet; khul tơki hmâo klep hrŏm hăng kơƀang ngă yang. 26Ñu ăt lom kơƀang ngă yang, rŏng kơƀang ngă yang, jum dar pă akiăng, khul tơki hăng mah rơgoh laih anŭn ngă sa gơnă hăng mah jum dar. 27Ñu ngă gah yŭ kơ gơnă dua gơwang mah ƀơi dua gah djeo, ñu pioh gơwang anŭn ƀơi dua gah djeo kiăng truă gai pioh čơkung. 28Ñu ngă khul gai čơkung hăng kơyâo akasi laih anŭn lom hăng mah.
Ia Jâu Hiam Rơgoh laih anŭn Mơnâo Ƀâu Hiam
29 #
Tơb 30:22-38. Ñu ăt pơhram ia jâu rơgoh hiam kiăng kơ truač, laih anŭn mơnâo ƀâu hiam rơgoh phŭn tui hăng hơdră pơkra pơhram ia ƀâu hiam.
Currently Selected:
Tơlơi Tơbiă 37: JRA2016
Highlight
Copy
Compare
Share
Want to have your highlights saved across all your devices? Sign up or sign in
© 2016 United Bible Societies. All rights reserved.
