Bruă Mơnuă 24

Kơđi Arăng Phong Kơ Pôl

1Giơ̆ng kơ rơma hrơi rơgao, khua ngă yang prŏng hloh Ananias nao pơ Sêsarê hrŏm hơbĭt hăng đơđa ƀing kŏng tha, laih anŭn sa čô nai tơlơi juăt anăn ñu Tertulus. Gơñu pơdah brơi kơ Phêlik jing khua čar tơlơi gơñu phong kơ Pôl. 2Tơ arăng iâu Pôl mŭt laih, Tertulus čơdơ̆ng phong kơ gơ̆ tui anai: “Ơ khua čar, ơi Phêlik, yua kơ mơ̆ng ih gơmơi hmâo lu tơlơi rơnŭk rơnua, laih anŭn yua mơ̆ng tơlơi thâo mĭn ih, čar anai hmâo lu tơlơi pơplih hiam. 3Tui anŭn amăng abih hrơi mông, laih anŭn amăng djŏp djang anih, ƀing gơmơi leng kơ mă tŭ hơdôm tơlơi anŭn hăng pran jua hơdơr tơngia bơni hơơč lu biă mă. 4Samơ̆ kiăng kơ ƀu ngă pơgŭn ih sui ôh, kâo rơkâo ih yua pran jua hiam klă ih, hmư̆ tơlơi gơmơi ruai pơrơđah ber ƀiă đôč. 5Yua kơ gơmơi ƀuh pô anai jing kar hăng mơnơ̆ng kheng klin, ñu hmâo ngă pơrŭng pơrăng tơ̆ng krah ƀing Yuđa amăng djŏp lŏn tơnah, laih anŭn ñu jing sa čô khua kơ ƀing Nasaret. 6Ñu hmâo ngă pơgrĭ hĭ laih wơ̆t sang kơkuh pơpŭ mơ̆n, hnŭn yơh gơmơi hmâo mă čăp ñu laih.#24:6 Đơđa Hră Ơi Adai Pơhiăp so đưm thim jơlan 6b-8a: Gơmơi kiăng phat kơđi ñu tui hăng tơlơi juăt ƀing gơmơi pô, 7samơ̆ khua gĭt gai tơhan Lisias rai, yua tơlơi khĭn kơtang sua mă ñu mơ̆ng tơngan ƀing gơmơi, 8laih anŭn pơtă kơ ƀing phong kơ ñu brơi rai ƀơi anăp ih. 8Tơdah ih tơña kơsem ñu, ih pô či thâo yơh mơ̆ng ñu abih tơlơi gơmơi phong kơ ñu.” 9Ƀing mơnuih Yuđa ăt sa pran jua hrŏm hơbĭt hăng tơlơi phong anŭn, laih anŭn khŭt khăt tơlơi anŭn jing sĭt.

Pôl Pơgang Ñu Pô Ƀơi Anăp Phêlik

10Tơ khua čar yơr tơngan ngă gru brơi Pôl pơhiăp, Pôl laĭ glaĭ:

“Kâo thâo kơ ih jing khua phat kơđi amăng čar anai sui thŭn laih, hnŭn yơh kâo mơak pơhiăp pơgang kơ kâo pô ƀơi anăp ih. 11Kar hăng ih hmâo thâo laih, kâo đĭ nao pơ plei pơ Yêrusalem kiăng kơkuh pơpŭ kơ Ơi Adai. Aka ƀu rơgao pluh dua hrơi anai ôh. 12Gơñu aka ƀu ƀuh ôh kâo pơrơjah hăng arăng ƀôdah pơsur ƀing ană plei pla ngă pơrŭng, thâo dah amăng sang kơkuh pơpŭ, thâo dah amăng sang bơjơnum, ƀôdah amăng plei prŏng. 13Ră anai, gơñu ăt kŏn hmâo hơgĕt lơi tơlơi pơsĭt kơ tơlơi gơñu pơčŭt kơ kâo. 14Samơ̆ kâo tŭ ư tơlơi anai ƀơi anăp ih, kâo kơkuh pơpŭ kơ Ơi Adai ƀing ơi gơmơi tui Jơlan#24:14 Tơlơi đaŏ kơ Krist. gơñu laĭ jing soh, samơ̆ kâo đaŏ abih tơlơi hmâo čih laih amăng hơdrôm hră tơlơi Juăt Môis hăng hơdrôm hră ƀing pô laĭ lui hlâo. 15Kâo hmâo tơlơi čang rơmang amăng Ơi Adai kar hăng ƀing gơñu pô ăt hmâo laih mơ̆n, jing tơlơi ƀing tơpă hiam wơ̆t ƀing wĕ wŏ či hơdip glaĭ. 16Ăt yua kơ tơlơi anŭn, nanao kâo gir tui hơduah kiăng hmâo pran jua tơpă rơgoh hiam, ƀu hmâo hlơi dưi ƀuah ƀơi anăp Ơi Adai laih anŭn ƀơi anăp ană mơnuih. 17#Bruă 21:17-28.Tơdơi kơ lu thŭn kâo dŏ ataih, ră anai kâo wơ̆t glaĭ pơ lŏn čar kâo pô, kiăng kơ ba gơnam djru gŭm kơ kơnŭng djuai kâo laih anŭn pơyơr mơnơ̆ng ngă yang. 18Gơñu ƀuh kâo hlăk dŏ ngă phĕt pơrơgoh amăng sang kơkuh pơpŭ, ƀu hmâo pơƀŭt mơnuih lu ƀôdah ngă tơlơi pơrŭng hơgĕt ôh. 19Samơ̆ đơđa ƀing Yuđa mơ̆ng čar Asi hmâo pơ anŭn; tơdah gơñu hmâo tơlơi hơgĕt phong kơ kâo, khŏm gơñu rai ƀơi anăp ih phong kâo bĕ, 20ƀôdah ƀing mơnuih dŏ pơ anai khŏm laĭ brơi bĕ hơgĕt tơlơi soh kâo hmâo ngă, hlăk kâo dŏ ƀơi anăp tơpul phat kơđi. 21#Bruă 23:6.Tơdah hmâo kơnơ̆ng sa tơlơi anai kâo pơhiăp kơtang tơdang kâo dŏ dơ̆ng ƀơi anăp gơñu: ‘Yua kơ tơlơi ƀing djai či hơdip glaĭ yơh, arăng phat kơđi kâo ƀơi anăp ƀing gih hrơi anai.’”

22Samơ̆ Phêlik, hmâo thâo rơđah mơ̆n kơ Jơlan anai, pơhrưĭ glaĭ hrơi phat kơđi hăng laĭ: “Tơ Lisias khua gĭt gai tơhan rai amơĭ, kâo či khư̆p ư bruă anai.” 23Giơ̆ng anŭn ñu pơđar kơ khua tơhan kơ̆ng wai Pôl, samơ̆ khŏm brơi kơ gơ̆ tơlơi rơngai ƀiă, laih anŭn anăm khă ôh ƀing giăng mah ñu rai ba mơnơ̆ng djru.

Pôl Ƀơi Anăp Phêlik Hăng Bơnai Ñu HʼDrusil

24Giơ̆ng kơ ƀiă hrơi mơ̆ng anŭn, Phêlik hrŏm hơbĭt hăng bơnai ñu HʼDrusil, mơnuih Yuđa rai; laih anŭn ñu pơkiaŏ nao arăng iâu Pôl kiăng kơ hmư̆ ñu pơtô tơlơi đaŏ amăng Yêsu Krist. 25Samơ̆ tơ Pôl pơtô hiăp djơ̆ kơ tơlơi tơpă, tơlơi djơ̆ hơnơ̆ng laih anŭn kơ tơlơi phat kơđi hrơi tơdơi, Phêlik hwĭ hăng laĭ: “Ră anai ih tơbiă bĕ; Dơ̆ kâo wăn kâo či iâu ih dơ̆ng.” 26Tơdang anŭn Phêlik čang rơmang kơ Pôl brơi prăk apah hơgơ̆m kơ ñu, hnŭn yơh ñu iâu nanao Pôl nao pơ ñu hăng pơhiăp hăng gơ̆.

27Rơgao dua thŭn mơ̆ng anŭn, Pôrtus Phêtus nao plih Phêlik. Yua kơ Phêlik kiăng ngă bơmơak kơ ƀing Yuđa, hnŭn yơh ñu ăt dŏ brơi arăng krư̆ Pôl.

Currently Selected:

Bruă Mơnuă 24: JRA2016

Highlight

Copy