Bruă Mơnuă 23

1Pôl lăng tơpă nao pơ ƀing bơjơnum, hăng laĭ: “Ơ ƀing adơi ayŏng, kâo dŏ dơ̆ng ƀơ̆ng huă ƀơi anăp Ơi Adai hăng abih pran jua tơpă hiam klă bơngač truh pơ hrơi anai.” 2Khua ngă yang prŏng hloh Ananias pơđar kơ ƀing dŏ jĕ Pôl pah hĭ amăng bah gơ̆. 3#Mat 23:27-28.Pôl laĭ kơ ñu: “Ơ pơnăng pik čur kŏ anŭn hơi, Ơi Adai či taih hĭ ih. Ih dŏ ber kiăng phat kơđi kâo tui hăng tơlơi juăt samơ̆ ih ngă gao tơlơi juăt, pơđar arăng taih kâo!”

4Ƀing dŏ dơ̆ng jĕ ñu laĭ: “Hyư̆m ih djik djak khua ngă yang prŏng hloh Ơi Adai?”

5 # Tơb 22:28. Pôl laĭ: “Ơ ƀing adơi ayŏng, kâo ƀu thâo ôh kơ ñu jing khua ngă yang prŏng hloh; yua kơ hơdrôm Hră Ơi Adai Pơhiăp hmâo čih tui anai: ‘Anăm pơhiăp sat ôh kơ khua wai lăng ană plei ih.’”

6 # Bruă 26:5; Phi 3:5. Tơ Pôl thâo amăng ƀing gơñu hmâo đơđa jing ƀing Sadusi laih anŭn đơđa ƀing pơkŏn jing ƀing Pharisi, ñu ur kraih ƀơi anăp ƀing phat kơđi: “Ơ ƀing adơi ayŏng, kâo jing sa čô Pharisi, ană đah rơkơi sa čô Pharisi. Yua kơ tơlơi čang rơmang kơ tơlơi hơdip glaĭ mơ̆ng tơlơi djai, hnŭn yơh arăng phat kơđi kâo.”

7Giơ̆ng ñu pơhiăp tơlơi anŭn, ƀing Pharisi pơrơjah hăng ƀing Sadusi, laih anŭn ƀing bơjơnum pơčơlah pơpha hĭ. 8#Mat 22:23; Mar 12:18; Luk 20:27.Yua kơ ƀing Sadusi laĭ ƀu hmâo tơlơi hơdip glaĭ ôh, kŏn hmâo ling jang ƀôdah bơngăt mơyang lơi. Samơ̆ ƀing Pharisi đaŏ kơ abih tơlơi anŭn. 9Tui anŭn hmâo asăp ur prŏng. Hmâo đơđa ƀing nai pơtô tơlơi juăt amăng ƀing Pharisi tơgŭ hăng pơgăl kơtang biă mă: “Gơmơi ƀu ƀuh sa mơta tơlơi soh hơgĕt ôh amăng mơnuih anai. Hyư̆m dưi thâo, năng ai bơngăt mơyang ƀôdah ling jang Ơi Adai hmâo pơhiăp laih hăng ñu tơlơi hơgĕt thâo?”

10Tơlơi pơrơjah anŭn jai kơtang hloh dơ̆ng, khua gĭt gai tơhan hwĭ kơ arăng hek hĭ drơi jan Pôl, tui anŭn yơh ñu pơđar ƀing tơhan trŭn sua mă Pôl mơ̆ng ƀing gơñu ba mŭt amăng kơđông.

11Mlam tơdơi kơ anŭn, Khua Yang dŏ dơ̆ng jĕ Pôl hăng laĭ: “Anăm tơdu pran jua ôh, yua kơ kar hăng ih hmâo ngă gơ̆ng jơlan laih kơ Kâo pơ plei Yêrusalem, tui anŭn ih či ngă gơ̆ng jơlan kơ Kâo pơ plei Rôm kar kaĭ mơ̆n.”

Ƀing Yuđa Dưm Tơlơi Mơneč Kiăng Pơdjai Pôl

12Tơ truh mơguah ƀing Yuđa pơƀŭt hrŏm hơbĭt, dưm tơlơi mơneč hăng ƀuăn rơ̆ng hăng tơdruă gơñu ƀu ƀơ̆ng huă kŏn mơñum lơi tơl gơñu dưi pơdjai hĭ Pôl. 13Ƀing hrŏm hơbĭt ngă tơlơi anŭn hmâo rơbeh kơ pă pluh čô. 14Gơñu nao pơ ƀing khua ngă yang prŏng hăng ƀing kŏng tha, hăng laĭ: “Gơmơi hmâo ƀuăn rơ̆ng laih hăng tơdruă ƀu či ƀơ̆ng huă ôh tơl gơmơi dưi pơdjai hĭ Pôl. 15Tui anŭn ră anai, rơkâo kơ ƀing gih hăng ƀing khua phat kơđi rơkâo kơ khua gĭt gai tơhan ba rai Pôl pơ anăp ƀing gih, ngă mă kar hăng ƀing gih kiăng kơsem phat brơi kơđi ñu klă ten hloh. Samơ̆ ƀing gơmơi dŏ krăp kiăng pơdjai hĭ ñu hlâo kơ ñu truh pơ anai.”

16Samơ̆ ană đah rơkơi amai Pôl thâo hĭ tơlơi dưm mơneč anŭn, tui anŭn ñu nao mŭt amăng kơđông, hăng laĭ brơi Pôl thâo. 17Pôl iâu sa čô khua tơhan hăng laĭ: “Ba nao bĕ tơdăm anai pơ khua gĭt gai tơhan, yua kơ gơ̆ hmâo tơlơi kiăng pơthâo kơ ñu.” 18Tui anŭn khua tơhan ba tơdăm anŭn pơ khua gĭt gai tơhan hăng laĭ: “Pôl, pô jing mơnă iâu kâo hăng rơkâo kơ kâo ba tơdăm anai pơ ih, yua kơ ñu hmâo tơlơi kiăng pơhiăp hăng ih.”

19Khua gĭt gai tơhan djă tơngan ñu, ba gơ̆ pơ anih hơjăn hăng tơña kơ ñu: “Hơgĕt tơlơi ih kiăng laĭ pơthâo hăng kâo?”

20Ñu laĭ: “Ƀing Yuđa sa pran jua kiăng rơkâo kơ ih ba Pôl nao pơ anăp ƀing khua phat kơđi hrơi pơgi, gơñu ngă kar hăng gơñu kiăng kơsem kơ tơlơi Pôl ten klă hloh. 21Samơ̆ anăm ih hmư̆ ƀing anŭn ôh, yua kơ hmâo rơbeh kơ pă pluh čô amăng ƀing gơñu dŏ krăp kiăng ngă kơ Pôl. Gơñu hmâo ƀuăn rơ̆ng ƀu ƀơ̆ng huă kŏn mơñum lơi tơl gơñu hmâo pơdjai hĭ Pôl. Ră anai gơñu dŏ krăp laih kơnơ̆ng dŏ tơguan tơlơi ih tŭ ư đôč.”

22Tui anŭn, khua tơhan brơi tơdăm anŭn glaĭ hăng khă anăm laĭ kơ hlơi hlơi ôh abih tơlơi gơ̆ hmâo laĭ kơ ñu.

Arăng Mơit Pôl Nao Pơ Phêlik Ơi Khua Čar

23Giơ̆ng anŭn khua gĭt gai tơhan iâu dua čô khua tơhan khul sa rơtuh hăng laĭ: “Ƀơi dua rơpăn mông mlam anai, prăp rơmet hăng pre lui bĕ dua rơtuh čô tơhan rơbat, tơjuh pluh čô tơhan đĭ aseh hăng dua rơtuh čô tơhan djă tơbăk kiăng kơ nao pơ Sêsarê. 24Ăt khŏm prăp rơmet pioh mơ̆n sa drơi aseh kơ Pôl đĭ laih anŭn ba nao gơ̆ hăng tơlơi rơnŭk rơnua pơ ơi Phêlik khua čar.” 25Ñu čih mơit sa pŏk hră tui anai: 26“Klôd Lisias čih mơit kơ Ơi Phêlik Khua Čar, kơkuh kơ ih. 27Ƀing Yuđa hmâo mă laih mơnuih anai, laih anŭn ƀiă či pơdjai hĭ gơ̆ yơh. Samơ̆ kâo hơmao ba tơhan truh pơ anŭn hăng pơklaih hĭ gơ̆, yua kơ kâo thâo ñu jing sa čô ană plei pla Rôm. 28Kâo kiăng thâo klih yua hơgĕt gơñu phong gơ̆, hnŭn yơh kâo ba ñu nao ƀơi anăp ƀing khua phat kơđi ƀing Yuđa. 29Kâo ƀuh tơlơi ƀing gơñu phong kơ gơ̆ djơ̆ kơ tơlơi juăt ƀing gơñu pô đôč, samơ̆ ƀu hmâo tơlơi soh hơgĕt lăp kơ pơdjai ƀôdah lăp krư̆ ôh. 30Laih anŭn tơ kâo hmư̆ arăng laĭ brơi kâo thâo tơlơi arăng dưm tơlơi mơneč krăp ngă sat kơ gơ̆, kâo pơkiaŏ nao gơ̆ pơ ih mơtam, laih anŭn kâo ăt pơđar kơ ƀing phong kơ gơ̆ brơi gơñu nao ruai pơrơđah tơlơi soh gơ̆ ƀơi anăp ih.”

31Tui anŭn ƀing tơhan ngă tui hăng tơlơi pơđar, gơñu mă Pôl hlăk amăng mlam ba gơ̆ truh pơ plei Antipatris. 32Hrơi tơdơi gơñu wơ̆t glaĭ pơ kơđông, kơnơ̆ng brơi ƀing tơhan đĭ aseh nao hrŏm hơbĭt hăng Pôl. 33Tơ gơñu truh pơ plei Sêsarê, gơñu brơi hră kơ khua čar, hăng pơdah Pôl ƀơi anăp ñu mơ̆n. 34Giơ̆ng lăng hră, khua čar tơña Pôl dŏ pơ kwar pă, laih anŭn tơ ñu thâo kơ Pôl jing mơnuih mơ̆ng čar Silisi, 35ñu laĭ: “Tơ ƀing phong truh pơ anai kâo či kơsem kơđi ih.” Hnŭn yơh ñu pơđar arăng gak wai Pôl amăng sang pơtao Hêrôt.#23:35 Anih akŏ phŭn kơ tơlơi dưi gĭt gai ƀing tơhan.

Currently Selected:

Bruă Mơnuă 23: JRA2016

Highlight

Copy