Bruă Mơnuă 25

Pôl Iâu Đĭ Sêsar

1Klâo hrơi tơdơi Phêtus truh pơ kwar anŭn, mơ̆ng plei Sêsarê ñu đĭ nao pơ plei Yêrusalem. 2Ƀing khua ngă yang prŏng hăng ƀing khua wai lăng ƀing Yuđa phong kơ Pôl ƀơi anăp Phêtus. Gơñu rơkâo kơwưh Phêtus 3rơkâo kơ ñu ngă tơlơi pap brơi arăng ba Pôl pơ plei Yêrusalem, yua kơ gơñu hmâo dưm laih tơlơi mơneč krăp pơdjai Pôl rŏk jơlan. 4Phêtus laĭ glaĭ arăng krư̆ Pôl pơ plei Sêsarê, laih anŭn ñu pô mơ̆n či wơ̆t glaĭ tañ pơ anŭn. 5Phêtus laĭ: “Tui anŭn brơi ƀing khua wai lăng kơ ƀing gih nao hrŏm hơbĭt hăng kâo pơ plei Sêsarê, laih anŭn tơdah mơnuih anŭn hmâo tơlơi soh hơgĕt, phong ñu bĕ.”

6Phêtus dŏ hăng gơñu pơ anŭn năng ai sapăn ƀôdah pluh hrơi, ñu trŭn nao pơ plei Sêsarê. Hrơi tơdơi, ñu dŏ ber ƀơi gre phat kơđi laih anŭn ñu pơtă arăng ba Pôl mŭt nao pơ ñu. 7Tơ Pôl truh laih, ƀing Yuđa mơ̆ng plei Yêrusalem dŏ dơ̆ng jum dar gơ̆ hăng phong kơ gơ̆ lu tơlơi soh prŏng, samơ̆ gơñu ƀu hmâo tơlơi hơgĕt dưi pơsĭt ôh. 8Pôl pơhiăp pơgang kơ ñu pô: “Kâo ƀu hmâo ngă tơlơi soh hơgĕt pơkơdơ̆ng glaĭ hăng Tơlơi Juăt ƀing Yuđa, ƀôdah pơkơdơ̆ng hăng sang kơkuh pơpŭ, kŏn pơkơdơ̆ng hăng Sêsar lơi.”

9Samơ̆ Phêtus kiăng ngă bơmơak kơ ƀing Yuđa, ñu laĭ kơ Pôl: “Ih kiăng đĭ nao pơ Yêrusalem hăng tŭ tơlơi phat kơđi kơ tơlơi arăng phong anai ƀơi anăp kâo pơ anŭn mơ̆?”

10Pôl laĭ glaĭ: “Kâo dŏ dơ̆ng ƀơi anăp sang phat kơđi Sêsar. Jing anih kâo khŏm tŭ tơlơi phat kơđi. Kâo ƀu hmâo ngă soh hăng ƀing Yuđa ôh, kar hăng ih thâo laih. 11Tơdah sĭt kâo hmâo tơlơi soh hăng tơlơi juăt ƀôdah ngă tơlơi soh hơgĕt lăp kơ djai, kâo ƀu hơngah ôh tŭ tơlơi djai. Samơ̆ tơdah tơlơi gơñu phong kơ kâo ƀu hmâo tơlơi sĭt ôh, ƀu hmâo hlơi dưi jao kâo kơ gơñu. Kâo iâu đĭ Sêsar phat kơđi kâo.”

12Tui anŭn, giơ̆ng kơ Phêtus črŏng sai hăng ƀing khua kơčĕ ñu pô, Phêtus laĭ glaĭ kơ Pôl: “Ih iâu đĭ Sêsar phat kơđi; ih či nao pơ Sêsar yơh.”

Pôl Ƀơi Anăp Pơtao Agripa Hăng HʼBêrênis

13Rơgao ƀiă hrơi mơ̆ng anŭn, pơtao Agripa hăng HʼBêrênis nao pơ Sêsarê kiăng čuă kơkuh kơ Phêtus. 14Gơñu dŏ glaĭ pơ anŭn sui hrơi, Phêtus ba kơđi Pôl anŭn ruai pơrơđah kơ pơtao Agripa hăng laĭ: “Pơ anai hmâo sa čô mơnă mơ̆ng Phêlik pioh glaĭ. 15Hlăk kâo truh pơ Yêrusalem, ƀing khua ngă yang prŏng hăng ƀing kŏng tha amăng ƀing Yuđa phong kơ gơ̆ hăng rơkâo kơ kâo klă kơđi kơ gơ̆. 16Samơ̆ kâo laĭ glaĭ kơ ƀing gơñu ƀing Rôm ƀu phiăn ôh jao brơi sa čô mơnuih hlâo kơ ñu hmâo mông dŏ ƀơi anăp ƀing phong kơ ñu, kiăng pơhiăp pơgang kơ tơlơi arăng phong kơ ñu. 17Tui anŭn yơh, tơ ƀing gơñu rai pơ anai, kiăng kơ huaĭ rơngiă mông, hrơi tơdơi kâo dŏ ber ƀơi gre phat kơđi pơđar arăng ba rai gơ̆ pơ sang phat kơđi mơtam. 18Ƀing phong kơ Pôl leng kơ dŏ dơ̆ng ƀơi anăp gre phat kơđi, samơ̆ gơñu ƀu dưi klă kơđi sa mơta tơlơi soh hơgĕt ôh tui hăng kâo pơmĭn. 19Ƀing gơñu kơnơ̆ng pơrơjah kơ đơđa mơta tơlơi đaŏ gơñu pô đôč, laih anŭn kơ sa čô pô anăn Yêsu anŭn hmâo djai laih, samơ̆ Pôl khŭt khăt laĭ ăt dŏ hơdip. 20Yua kơ kâo ƀu thâo ôh hyư̆m khŏm pơkra tơlơi anŭn, hnŭn yơh kâo tơña Pôl tơdah ñu kiăng nao brơi arăng phat kơđi kơ tơlơi anŭn pơ plei Yêrusalem. 21Samơ̆ tơ Pôl rơkâo dŏ glaĭ amăng sang mơnă anŭn dơ̆ng, kiăng kơ Sêsar phat kơđi brơi kơ ñu, hnŭn yơh kâo pơđar arăng wai ñu tơl kâo dưi ba nao ñu pơ Sêsar.”

22Agripa laĭ kơ Phêtus: “Kâo pô ăt kiăng hmư̆ ñu mơ̆n.” Phêtus laĭ glaĭ: “Pơgi ih či hmư̆ ñu.”

23Tui anŭn, hrơi tơdơi, pơtao Agripa hăng HʼBêrênis rai hăng tơlơi kơdrưh kơdrŏm, mŭt amăng anih phat kơđi hrŏm hăng ƀing khua gĭt gai tơhan, laih anŭn ƀing khua amăng plei anŭn. Tui hăng Phêtus pơđar, arăng ba rai Pôl. 24Phêtus laĭ: “Ơ Pơtao Agripa hăng abih bang mơnuih dŏ pơ anai. Ƀing gih ƀuh mơnuih anai, yua kơ ñu yơh abih bang ƀing ană plei Yuđa, wơ̆t pơ plei Yêrusalem hăng wơ̆t pơ anai, ur rơkâo kơ kâo anăm brơi ñu dŏ hơdip dơ̆ng ôh. 25Samơ̆ kâo ƀuh gơ̆ ƀu hmâo ngă tơlơi soh hơgĕt lăp kơ djai ôh. Yua kơ gơ̆ pô hmâo rơkâo đĭ Sêsar phat kơđi gơ̆, tui anŭn kâo khư̆p ư ba jao ñu nao pơ anŭn. 26Samơ̆ kâo ƀu thâo klă rơđah ôh kơ tơlơi ñu, kiăng kơ čih ruai pơrơđah đĭ kơ Sêsar. Yua kơ anŭn yơh kâo brơi arăng ba rai gơ̆ ƀơi anăp ƀing ih, laih anŭn biă mă ñu kơ ih, Ơ Pơtao Agripa, kiăng kơ giơ̆ng ƀing ta tơña kơsem gơ̆ laih, kâo dưi hmâo tơlơi čih ruai đĭ. 27Yua kơ kâo pơmĭn ƀu gal ôh ba nao sa čô mơnă tơdah ƀu laĭ rơđah tơlơi soh arăng phong kơ gơ̆.”

Currently Selected:

Bruă Mơnuă 25: JRA2016

Highlight

Copy