Bruă Mơnuă 22

1“Ơ ƀing adơi ayŏng hăng ƀing ama, dŏ hmư̆ bĕ tơlơi kâo pơhiăp pơgang kâo pô ƀơi anăp ƀing gih.” 2Tơ gơñu hmư̆ Pôl pơhiăp hăng tơlơi Hêbrơ, gơñu dŏ rơiăt hloh dơ̆ng. Pôl laĭ:

3 # Bruă 5:34-39. “Kâo jing sa čô Yuđa, arăng tơkeng kâo pơ plei Tars amăng čar Silisi, samơ̆ kâo rai kơ prŏng amăng plei anai jing sa čô hrăm mơ̆ng Gamaliel djơ̆ tui hăng Tơlơi Juăt ơi adon ƀing ta, hur har hăng Ơi Adai, ăt kar hăng abih bang ƀing gih hrơi anai. 4#Bruă 8:3; 26:9-11.Kâo ngă sat tơl pơdjai ƀing đuaĭ tui jơlan#22:4 Tơlơi đaŏ kơ Krist. anai, mă čaŏ hăng krư̆ amăng sang mơnă wơ̆t đah rơkơi laih anŭn đah kơmơi. 5Kơ tơlơi anŭn khua ngă yang prŏng hloh hăng wơ̆t ƀing kŏng tha phat kơđi dui ngă gơ̆ng jơlan pơsĭt brơi kơ kâo. Kâo hmâo mă tŭ hră mơ̆ng ƀing anŭn mơit kơ ƀing adơi ayŏng pơ plei Damas laih anŭn kâo hmâo nao pơ plei anŭn kiăng mă čăp ƀing đaŏ pơ anŭn hăng dui ba ƀing gơñu pơ plei Yêrusalem kiăng pơkơhmal ƀing gơñu.”

Pôl Ruai Glaĭ Tơlơi Ñu Đaŏ

(Bruă 9:1-19; 26:12-18)

6“Tơdang kâo rơbat giăm truh pơ plei Damas, amăng kơplah wah yang hrơi dơ̆ng, blĭp hmâo tơlơi bơngač kơmlă mơ̆ng adai pơčrang jum dar kâo. 7Kâo rơbuh lĕ pơ lŏn hăng hmư̆ asăp pơhiăp hăng kâo: ‘Ơ Sôl, Ơ Sôl, hyư̆m ih ngă sat kơ Kâo?’ 8Kâo laĭ glaĭ: ‘Ơ Khua, hlơi Ih?’ Ñu laĭ kơ kâo: ‘Kâo jing Yêsu plei Nasaret, Pô ih hlăk dŏ ngă sat.’ 9Ƀing nao hrŏm hơbĭt hăng kâo ƀuh tơlơi bơngač anŭn samơ̆ ƀu hmư̆ ôh asăp pô dŏ pơhiăp hăng kâo. 10Kâo tơña: ‘Ơ Khua Yang, Hơgĕt kâo či ngă?’ Laih anŭn Khua Yang laĭ kơ kâo: ‘Tơgŭ bĕ nao pơ plei Damas, laih anŭn pơ anŭn či hmâo tơlơi laĭ brơi abih tơlơi Kâo hmâo ruah brơi laih kơ ih khŏm ngă.’ 11Yua kơ tơlơi bơngač kơmlă kơtang anŭn ngă kơ mơta kâo ƀu thâo ƀuh tah, ƀing nao hrŏm hơbĭt hăng kâo djă tơngan hăng dui ba kâo truh pơ plei Damas.

12Hmâo sa čô anăn ñu Ananias, jing mơnuih tơpă hiam hur har ngă tui hăng tơlơi juăt, hmâo tơlơi ngă gơ̆ng jơlan hiam mơ̆ng abih bang ƀing Yuđa dŏ pơ plei Damas. 13Ñu rai dŏ jĕ kâo hăng laĭ ‘Ơ ayŏng Sôl, mơta ih rơđah glaĭ bĕ!’ Hlăk anŭn mơtam kâo ƀuh rơđah glaĭ dơ̆ng laih anŭn lăng ƀuh Ananias. 14Ñu laĭ: ‘Ơi Adai kơ ơi adon ƀing ta hmâo ruah ih kiăng ih thâo tơlơi Ñu kiăng, ƀuh Pô Tơpă, hăng brơi ih hmư̆ boh pơhiăp mơ̆ng amăng bah Ñu. 15Yua kơ ih či jing pô ngă gơ̆ng jơlan brơi kơ Ñu ƀơi anăp abih bang mơnuih kơ khul tơlơi ih hmâo ƀuh hăng hmư̆ laih. 16Ră anai, hơgĕt ih dŏ tơguan dơ̆ng? Tơgŭ bĕ laih anŭn tŭ ƀatem, pơrơgoh tơlơi soh ih, laih anŭn iâu laĭ kơ anăn Khua Yang.’”

Ơi Adai Iâu Pôl Pơtô Kơ Ƀing Tuai

17“Kâo wơ̆t glaĭ pơ Yêrusalem laih anŭn hlăk kâo dŏ iâu laĭ amăng sang kơkuh pơpŭ, kâo hmâo tơlơi pơƀuh, 18Kâo ƀuh Khua Yang pơhiăp hăng kâo: ‘Tơbiă tañ bĕ mơ̆ng plei Yêrusalem, yua kơ gơñu ƀu či tŭ ôh tơlơi ih ngă gơ̆ng jơlan kơ kâo.’ 19Kâo laĭ: ‘Ơ Khua Yang, gơñu pô yơh hmâo thâo laih kơ tơlơi kâo mă krư̆ hăng taih amăng ƀing đaŏ kơ Ih amăng rĭm boh sang bơjơnum. 20#Bruă 7:58.Laih anŭn dơ̆ng tơ Êtiên jing pô ngă gơ̆ng jơlan kơ Ih hmâo tuh drah, kâo kar kaĭ mơ̆n dŏ jĕ pơ anŭn tŭ ư hrŏm hơbĭt hăng tơlơi gơñu ngă, laih anŭn dŏ wai sum ao ƀing pơdjai ñu.’ 21Khua Yang laĭ kơ kâo: ‘Nao bĕ, yua kơ Kâo či pơkiaŏ ih nao pơ ƀing djuai tuai pơ ataih.’”

22Gơñu dŏ hmư̆ Pôl truh dơ̆ boh pơhiăp anŭn, hlăk anŭn gơñu čơdơ̆ng ur kraih: “Pơrơngiă hĭ bĕ mơnuih kar hăng anŭn mơ̆ng lŏn tơnah! Ñu ƀu lăp dŏ hơdip dơ̆ng ôh!” 23Tơdang gơñu ur hrek, glŏm sum ao laih anŭn kuaĭ ƀruih lŏn sai đĭ hăng ngŏ. 24Khua tơhan pơđar arăng ba Pôl mŭt amăng kơđông, yua gai hnuăt hrĕ taih kiăng thâo yua kơ hơgĕt ƀing mơnuih lu ur pơkơdơ̆ng hăng ñu tui anŭn. 25Samơ̆ tơ arăng akă dăng ñu kiăng kơ taih ñu, Pôl laĭ hăng sa čô khua kơ sa rơtuh čô dŏ jĕ ƀơi anŭn: “Phiăn mơ̆ kơ ƀing gih taih sa čô mơnuih Rôm tơdang akă phat kơđi ñu ôh?”

26Tơ khua tơhan hmư̆ tơlơi Pôl pơhiăp tui anŭn, ñu nao tơña khua prŏng wai tơhan hăng laĭ: “Hyư̆m ih či ngă tơlơi anai? Yua kơ pô anai jing mơnuih Rôm.”

27Tui anŭn khua prŏng nao pơ Pôl hăng laĭ: “Laĭ brơi kâo bĕ, ih jing mơnuih Rôm hă?”

Pôl laĭ glaĭ: “Ơ, djơ̆ yơh.”

28Khua prŏng laĭ: “Kâo blơi tơlơi dưi jing ană plei Rôm hăng nua prăk yom biă mă.”

Pôl laĭ: “Samơ̆ kâo jing sa čô mơnuih Rôm čơdơ̆ng mơ̆ng amĭ tơkeng.”

29Tui anŭn ƀing kiăng kơsem tơña Pôl leng kơ đuaĭ mơ̆ng ñu mơtam; laih anŭn khua prŏng hwĭ biă mă, tơ ñu thâo pô ñu hmâo čăp laih, anŭn jing sa čô mơnuih Rôm.

Pôl Ƀơi Anăp Ƀing Khua Phat Kơđi

30Tơ truh hrơi pơgi, khua prŏng kiăng thâo sĭt yua kơ tơlơi hơgĕt ƀing Yuđa phong kơ Pôl, hnŭn yơh ñu kleh hĭ gơ̆, laih anŭn pơtă kơ ƀing khua ngă yang prŏng hăng abih bang ƀing khua phat kơđi bơjơnum glaĭ, laih anŭn ba Pôl dŏ ƀơi anăp ƀing anŭn.

Currently Selected:

Bruă Mơnuă 22: JRA2016

Highlight

Copy