EXODUS 20
20
Kawbya Ccanghaw
(Deu 5.1-21)
1Oute Pachia nynh e bya hae hynh a ho:
2Kae tuh nang kha see lang na tangnaw Izip ram kyate ae poukhaepaw Bawipaw na Pachia nynh ka thua; 3Kamaw laelan ccangpaw pachia hae kha na beik lan khyh.
4Ahangnaw vaawram kya thuasah, anenaw laephi kya thuasah, laephi akawlan e tui kya thuasah a umpaw ccangkhakheit te muinsan alokuhpaw zohtuh kha namaw hanlan na raekuh lan khyh.#Exo 34.17; Lev 19.4, 26.1; Deu 4.15-18, 27.15 5Tuh-e zohtuh hae malang na bakhung lan khyh zah na beik lan khyh; pawccecize Bawipaw nae Pachia kae tuh a eiungpaw Pachia ka thua zah kamaw oun vuapaw ccungccaw hae kha she thum, she pali kyacia, paaw hae seinaw hanlan ccaaw hae kha de a tahpaw Pachia nynh ka thua,#Exo 34.6-7; Nam 14.18; Deu 7.9-10 6thuasalama kae kha oun sungsah hae zah ka kawbya kha a zui hae paw tungvaw kya tuh atynpaw sungsahnaw kha she thong kheit kyacia a langsakuhpaw Pachia nynh ka thua.
7 Bawipaw na Pachia min kha ahme lei lante na mang lan khyh; pawccecize Bawipaw min kha ahme lei lante a mangpaw tuh Bawipaw nynh seinaw hoi leipaw cite muih khyh.#Lev 19.12
8Sabbath nin kha ning nan, te khah-e nin kha athyaapaw lante la mang.#Exo 16.23-30, 31.12-14 9Nin taruh lungkhu rya na lah cih zah, na ryalaw balyn kha na lah cih. 10Thuasalama nin sarinaw nin tuh Bawipaw na Pachia hanlan sabbath nin nynh thua; tuh-e nin kya tuh namaw, na ccapaw, na ccanung, na seenung, na seepaw nynh thuasah, na sahiin-awvaw te na khua kya umpaw mikhia nynh thuasah pawpaw rya mah na lah lan khyh oh. 11Pawccecize Bawipaw nynh vaawram, laephi, rili te tuh-e hae lungkhu a umpaw balyn kha nin taruh lungkhu rae zah nin sarinaw nin khe a haeung, tukeiccuze Bawipaw nynh sabbath nin kha hythuapya zah a thyaasah.#Gen 2.1-3; Exo 31.17
12 Bawipaw na Pachia nynh ae pyapaw ram kya na hiinshe a sae nawlan, na nung te na paaw kha sawtua hae.#Deu 27.16; Mat 15.4, 19.19; Mar 7.10, 10.19; Luk 18.20; Efe 6.2, 3
13Ccungccaw na theih lan khyh.#Gen 9.6; Lev 24.17; Mat 5.21, 19.18; Mar 10.19; Luk 18.20; Rom 13.9; Jam 2.11
14Milae zu kya khyhze milae vawpaw kya na sei lan khyh.#Lev 20.10; Mat 5.27, 19.18; Mar 10.19; Luk 18.20; Rom 13.9; Jam 2.11
15Na ruh lan khyh.#Lev 19.11; Mat 19.18; Mar 10.19; Luk 18.20; Rom 13.9
16Na innpaw kha rawsete ahme leipaw ccaekia lang na tang lan khyh.#Exo 23.1; Mat 19.18; Mar 10.19; Luk 18.20
17Na innpaw kya-e inn kha na duaa lan khyh; na innpaw paw a zu, a seepaw, a seenung, vaetua, lann, te na innpaw kya-e hankhakheit kha na duaa lan khyh, a ci.#Rom 7.7, 13.9
Ccungccaw hae Rinaw
(Deu 5.22-33)
18Ccungccaw balyn nynh kholungthyhpaw, khozawlaepaw, mungkae roi te mua vawlan maeekhuh khuhpaw kha he a muih hae tuh, a rih hae, thyngkuh hae zah asawnaw kyate a thadyn hae,#Heb 12.18-19 19te Moses kha, “Oun hopah lah na bya kha kae ngae cih; thuasalama Pachia nynh kaening kha oun hopah nan sah, oun hopya zetuh kae chih cih,” a ci hae. 20Moses nynh ccungccaw hae kha, “Rih nan oh, pawccecize nanning kha syntawtua khylan te seinaw na rae khyh nawlan oh, Bawipaw kha na ri ccaw oh cite nynh Pachia tuh yn thua,” a cipya hae. 21Oute ccungccaw hae tuh asawnaw kya a thadyn lya hae khe, Moses tuh Pachia umnaw varyng zipingpaw mohnaw kalan khe a naekuh.
Beikhang
22 Bawipaw nynh Moses kha hopah zah, Israel hae kyakhe hynhte na hopah cih hae: “Vaawlang te nanning kalan bya ka hopaw kha phe na muih vae oh, 23Nanning nynh kamaw hawte beik lanpaw phua pachia thuasah, sui pachia thuasah na raekuh lan khyh oh. 24Laephi khate silawhang ccangkheit kha kamaw hanlan na rae cih, tuh-e silawhang vawlan khe maee-ute silawnawpaw te vaeccawku nawlan silawnawpaw na tuu hae te na tangnuapaw hae khate si na lawkuh cih, kamaw kha nae beik cih ka cinaw hmin takyh kya ka min kha na ning khyh nawlan namaw kalan kae thua cih zah hythuanaw kae pya cih. 25Kamaw hanlan silawhang kha na rae ze, a-awkuhpaw lung te na rae lan khyh, pawccecize sivawhaelua kha rae nawlan na mang zetuh silawhang tuh a nungsikuh vae.#Deu 27.5-7; Jos 8.31 26Na pyn kya-e maethyaumpaw kha a lang khyh nawlan, ka silawhang kalan nawkui te na kae lan khyh,” a cipya.
Currently Selected:
EXODUS 20: ZB16
Highlight
Copy
Compare
Share
Want to have your highlights saved across all your devices? Sign up or sign in
Zotung Bible © Bible Society of Myanmar, 2016.
