EXODUS 19
19
Israel hae Sinai Mua Thuanaw
1Israel hae nynh Izip ram kyate he a pou kou hae te, sawpaw sah thumnaw, nin kheit nin khe Sinai ramkaw kya a thua hae. 2Refidim kyate pou hae zah Sinai ramkaw kya a thua hae, te tuh-e ramkaw kya umpaw mua malang khe a rya hae. 3Oute Moses tuh Pachia kalan a kaethung; Bawipaw nynh mua kyate ko zah, “Jakob ciihan Israel hae kha hynhte na hopah cih hae: 4Izip hae tungvaw ka la cyipaw te nanning kha mosipi sake te kae hang oh zah kamaw kalan kae hoei oh paw kha phe na muih vae oh. 5Tukeiccuze atu ka bya kha na ngae oh zah ka byakin kha na zui oh zetuh, ccungccaw balyn laeze ka hoipaw aphutepaw ka rho na thua cih oh. Accaccing tetuh laephi balyn hynh ka uccaw nynh thua.#Deu 4.20, 7.6, 14.2, 26.18; Tit 2.14 #1Pe 2.9 6Nanning tuh kamaw hanlan ranpibawi te athyaapaw minphuin na thua cih oh. E bya hynh Israel hae kalan na hopah cih hae,” a cipya.#Bya 1.6, 5.10 7Moses nynh yn cceih zah Israel piccan hae kha a pum hae, Bawipaw nynh kaw a pyapaw balyn kha a hopya hae. 8Ccungccaw balyn nynh, “Bawipaw nynh a hopaw atyn-are kha kae cyih cih,” cite ngingrarih lante a leih hae. Moses nynh ccungccaw hae bya kha Bawipaw kalan a hopya. 9Oute Bawipaw nynh Moses kha, “Ccungccaw hae nynh nang te bya ah hokupaw kha thae hae zah nang kha tyty ae zyn nawlan hae, thaawkalaepaw varyng zipingpaw maeking kyate na kalan kae thua cih,” a cipya.
Ccungccaw hae Thyaasahnaw
Moses nynh ccungccaw hae bya kha Bawipaw kalan he a hopah tuh, 10Bawipaw nynh Moses kha: “Ccungccaw hae kalan la cceih lah, minmin kha atunin te awkhualan la thyaasah hae. Mih uccaw hae kha sukuh hae sah lah, 11nin thumnaw nin hanlan la paccynkuh hae sah, pawccecize nin thumnaw nin khe Bawipaw tuh ccungccaw balyn malang Sinai mua vawlan yn rungbung cih. 12Ccungccaw hae hanlan mua po voilu lan ramri kha na nung cih zah, ‘Mua vawlan na kae khyh nawlan oh te mua aleihpaw mah na tysei khyh nawlan oh na raeringkuh cih oh. Mua kha a tysei paw tuh chia a thua cih.#Heb 12.18-20 13Tuh-e ccungccaw kha kuih te na hae lan khyh oh, lung te deih a thua khyhze the te kaw a thua cih; sarangpaw thuasah, ccungccaw thuasah hiin lan khyh,’ cite na hopah cih hae. Mungkae kha khaw cia accae te, minmin nynh mua vawlan a kae cih hae,” a cipya. 14Te Moses tuh mua kyate ccungccaw hae kalan a cceihbung. Aning nynh ccungccaw hae kha a thyaasaku hae, te minmin nynh mih uccaw kha a suku hae. 15Moses nynh ccungccaw hae kha, “Nin thumnaw nin kya paccynkuh oh; nopi pe lang naekuh nan oh,” a cipya hae.
16Nin thumnaw nin awkhua khe mua vawlan kholungthyh zah khozaw a lae, varyng zipingpaw maeking nynh mua kha phang a bong, te mungkae roi tuh eih ccae keiccuze ryahmin kya umpaw ccungccaw hae tuh a thyngkuh hae.#Bya 4.5 #Deu 4.11-12 17Moses nynh Pachia te tungku khylan ccungccaw hae kha ryanaw hmin atolang khe a poukhae hae. Minmin tuh mua aleihpaw khe a thadyn hae. 18Bawipaw tuh Sinai Mua vawlan khe maee te yn rungbung keiccuze Sinai Mua tuh maeekhuh nynh varyng a lung; maeekhuh tuh maeephu kya-e maeekhuh hawte kaethung zah mua pynpi tuh thawte a hy. 19Mungkae roi tuh houhouh yn ccae. Moses nynh hopah zah Pachia nynh kholung kyate bya a leih. 20Bawipaw nynh Sinai Mua dung vawlan he yn rung tuh, Moses kha mua dung kalan khe ko zah Moses tuh a kaethung. 21Oute Bawipaw nynh Moses kha, “Ccungccaw hae nynh Bawipaw kha do khylan ramri kha a lue khyh nawlan hae, la cceihbung lah minmin kha raeringnaw la pya hae. Tuhkhyhze tuh patae a chihsei cih hae. 22Bawipaw kalan a naekuhpaw ranpibawi hae heize mimaw te mimaw kha a thyaasakuh cih hae. Tuhkhyhze tuh Bawipaw nynh de a tahsei cih hae,” a cipya. 23Moses nynh Bawipaw kha, “Mua vawlan kae khylan ccungccaw hae kha ua thua khyh hae; pawccecize namaw ccaccei nynh kaening kha, ‘Mua po voilu lan ramri nung oh lah thyaasah oh,’ cite raeringnaw nae pya zah phe nae hopya vae,” a cipya. 24Bawipaw nynh Moses kha, “La cceihbung lah Aaron kha yn kaekhae thung; thuasalama ranpibawi hae te ccungccaw hae tuh Bawipaw kalan kaethung lanpaw kha na ua lan khyh hae; tuhkhyhze tuh Bawipaw nynh minmin kha de a tah cih hae,” a cipya. 25Tukeiccuze Moses nynh ccungccaw hae kalan cceihbung zah a hopya hae.
Currently Selected:
EXODUS 19: ZB16
Highlight
Copy
Compare
Share
Want to have your highlights saved across all your devices? Sign up or sign in
Zotung Bible © Bible Society of Myanmar, 2016.
