Kati Nai 3
3
Aron i chapochi
1Sinai mawi saleung y Areng my Mosi teng y leu pei nai neng khala y Aron nini Mosi i yhm dengtheungchi ly hinichi ne. 2Aron i chapo chalu ly Nadab ne i, Abihu, Eleaza, Ithama napi nai chapo leaung palyhrei awm.#Kati 26.60 3Nichi ly pathyp pi nai keung y tahm palyn iy aau patyp nai keungchi ne; 4na i py Nadab hawi Abihu nini ly Sinai daichi ka-vym y Areng teng y talam ngau y nai leng patlum nai kapathypra talam lawh nai deaungkho y, padei vui bo. Nini ly cho chanau so y. Eleaza hawi Ithama nini ly Aron heng nai thym y pathyp pi nai keung kalop sa hawi nai ne.#Lev 10.12; Kati 26.61
Levi theaungchi ai pathyp pi nai keung y kalop pei nai
5 Areng my Mosi teng y, 6“Levi theaungchi ai palau iy pathyp pi nai keung Aron i anui y kalop so hai. 7Nichi ly kai i awmra Tabynako i vui kalop sa u ai nai tla; pathyp pi nai keung kalopchi hawi Israela cheng verei i kalopchi py sa u ai nai tla. 8Nichi ly Tabynako i ateaung alang bawibawichi kry iy, Israela chengchi i vui Tabynakora y kalop sa u ai nai tla. 9Levi theaungchi i aly len keh nai kalop ly Aron hawi ni i chapochi i anui y kalop sa ai nai ne. 10Nang ly Aron hawi ni i chapochi ai pathyp pi nai keung i kalopchi au ai nai tla; huni kalop hawi abi y nai khumi my pathyp pi nai keung kalop sa lawh baly padei ai nai tla,” napi. 11Areng my Mosi teng y, 12-13“Levi theaungchi ly kai i kai i khumichi ne. Kai ly Aikupta khumichi i chapo chalu bawibawichi ai padei nai thym khala, Israela cheng yhm dengtheung tleirei i chapo chalu hawi tawnbawi cho chalu ngiereichi ai ly kaimy i vui vawi yb nai ne. Vai ly Israela chengchi i chapo chaluchi i jeng y, Levi theaungchi ai kaimy vawi takhra bo. Nichi ly kai i khumichi ne i, Kai ly Areng ne,” napi.#Theu 13.2
Levi theaungchi ai amyn la nai
14Sinai daichi ka-vym y Areng my Mosi teng y, 15Levi theaungchi theung i lorei hawi, leng awm nai deaungdi neampacho ngiereichi ai, nupai hawi yhm dengtheung amyn la ai nai leu pei nai kamta, 16Mosi ly amyn la nai ne. 17-20Levi ly karashon, kohath hawi Merari napi nai chapo leaung thomrei ai sa. Nichi ly mychi cheng amyn angam nai amsi pajochi ne. karashon ly Libni hawi Simei napi nai chapo leaung nyhrei ai sa; kohath ly Amram, Izhara Hebron hawi Uziela napi nai chapo leaung palyhrei ai sa. Merari ly Mahli hawi Mushi napi nai chapo leaung nyhrei ai sa. Nini ly mychi cheng amyn angam nai amsi pajochi ne.
21Karashon i nupaira y Libni hawi Shimei nini i yhm dengtheungchi abawi. 22Lorei hawi Lorei leng awm nai neampacho vuikanai bawibawi ly leaung sang saryh taja chungvai pangrei awm nai ne. 23Huni nupai ly Tabynako i nidym ngan mang y tai u ai nai tla. 24Nichi i lu ly Laela i chapo Eliasapha ne. 25Nichi ly Tabynako angtheung mang i khiura, angam mang i khiura, katheu pa-kho kanih ali hang nai, 26maicham hawi Tabynako ka-ki apai tapang nai kanih alichi hawi apai katheu pa-khora i kanih ali hang nai kry ai tla nai ne. Nichi ly huni bawibawi kry ai nai ne.
27Kohath i nupai theung y Amram, Izhara, Hebron hawi Uziela i dengtheungchi abawi i, 28Lorei hawi lorei leng awm nai neampacho vuikanai bawibawi ly sang taja takaw chungvai tariurei awm nai ne. 29Huni nupaichi ly Tabynako i tokalawi ngan mang y tai u ai nai tla. 30Nichi i lu ly Uziela i chapo Elizaphan ne. 31Nichi ly Leu Maikawm Pawm, sabawi, maisi yhm kateang, maichamchi, Meingtym Kachaira y pathyp pi nai keungchi teaung nai sora samtangchi hawi chai keh nai meingtym katheu pa-khora i kanih ali jang naichi kry ai nai tla. Nichi ly huni ateaung bawibawichi kry ai tla nai ne.
32Levi theaungchi i miteaung keh ly pathyp pi nai keung Aron i chapo Eleaza ne. Ni ly meingtym kachaira kalop sa naichi ai kry nai keung ne.
33Merari i nupai theung y Mahli yhm dengtheung hawi Mushi dengtheung abawi. 34Lorei hawi, lorei leng awm nai neampacho vuikanai bawibawi ly sang tariu saryh chungvai nyhrei awm nai ne. 35Huni nupai ly Tabynako tosyh ngan mang y tai u ai nai tla; nichi i lu ly Abihaila i chapo Zuriel ne. 36Nichi ly Tabynako angpang pjengchi, katlangchi, chenghengchi, panuirachi hawi, hunichi i ateaung bawibawichi kry nai kalop sa ai nai tla. Nichi ly huni vawn ateaung alangchi kry ai nai tla. 37Nichi ly Tabynako apai chenghengchi, panuirachi, khangmuichi, vuinawnchi py kry ai nai tla.
38Mosi, Aron hawi ni i chapochi ly Tabynako nisi ngan mang y tai u ai nai tla. Nichi ly Israela chengchi i vui meingtym kachaira y chiu nai leaungsai kalop bawibawichi sa ai nai tla. Huni hawi abi y nai khumi my sa lawh baly, huni khumi ai ly padei ai nai tla. 39Areng my leu pei nai kamta Mosi ly lorei hawi lorei leng awm nai Levi theaung neampachochi ai nupai ka-thui ka-thui amyn la nai vuikanai bawibawi ly 22,000 rei awm nai ne.
Chapo chalu jeng y Levi theaungchi ai vawi nai
40-41 Areng my Mosi teng y, “Israela chengchi i chapo chaluchi ly kai i khumichi ne. Hunaibaly lorei hawi lorei leng awm nai chapo chalu bawibawichi i amyn lo. Na i py hunichi ai kai i khumi palawn ai nai vawi nai tleaung y ly Levi theaungchi ai kavawi bo! Kai ly Areng ne! Huni bo y tawnbawi cho chalu bawibawichi i jeng y, Levi theaungchi i tawnbawichi ai kaimy vawi takhra bo,” napi. 42Mosi ly leu tangai i, chapo chalu bawibawi i amyn la achu bo. 43Lorei hawi lorei leng awm nai Israela chengchi i chapo chuluchi ai amyn la i, vuikanai bawibawi ly 22,273 rei awm nai ne.
44-45 Areng my Mosi teng y, “Vai ly Israela chengchi i chapo chalu bawibawichi i jeng y, Levi theaungchi ai kai teng y au ai nai tla. Hunai kamta teang Israela chengchi i tawnbawi cho chuluchi jeng y, Levi theaungchi i tawnbawi cho chaluchi ai kai teng y au ai nai tla. 46Israela chengchi i chapo chaluchi ly Levi theaungchi i chapo chalu vuikanai tleaung y leaung 273 rei nawi nai deaungkho y, nang ly huni chapo chaluchi ai atleu teang ai nai tla. 47Khumi leaungrei ai vang apani nai tangka chang tlau pangrei hawi atleu ai nai tla. 48Huni tangka ai ly Aron hawi ni i chapochi teng y au ai nai tla,” napi. 49Mosi ly Areng i leu tangai i, nga nai 50tangka chang 1,365 rei la iy, 51Aron hawi ni i chapochi teng y pei pi bo.
Khumi Common Language Bible © Bible Society of Myanmar, 2005.