Kati Nai 2
2
Theaung ka-thui tai u nai sai
1 Areng ly Mosi hawi Aron nini teng y hina nai kamta leu pei bo. 2Israela chengchi ly tai u nai khala, khumi luteng amy i tavai kamkawm tamkhawn hawi amy nupai i tamkhawn anui y meingtym la ai nai tla. Israela chengchi ly Tabynako teng ka-ki tai u ai nai tla. 3-9Nisi mang phei Juda tavai kamkawm tamkhawn anui y hina nai kamta kamkawm akachu iy, amymychi i luchi hawi tai u ai nai tla.
| Theaung | Lu sa nai keung | Vuikanai |
|---|---|---|
| Juda | Amminada i chapo Nashon | 74,600 |
| Isakhar | Zuar i chapo Nethanela | 54,400 |
| Zebulun | Helon i chapo Eliaba | 57,400 |
| bawibawi: | 186,400 |
Juda i tavai kamkawm ly mo mang y amsa man ai nai tla.
10-16Tokalawi mang phei y Ruben i tavai kamkawm tamkhawn anui y hina nai kamta kamkawm akachu iy, amymychi i lu sa naichi hawi tai ai nai tla.
| Theaung | Lu sa nai keung | Vuikanai |
|---|---|---|
| Ruben | Sedeur i chapo Elizura | 46,500 |
| Simeon | Zurishadai i chapo Shelumiel | 59,300 |
| Kad | Deuela i chapo Eliasapha | 45,650 |
| bawibawi: | 151,450 |
Ruben i tavai kamkawm ly pa-nyh amsa ai nai tla.
17Naibaly mo mang i tavai kamkawm nyhrei hawi nithun mang i tavai kamkawm nyhrei amsa nai sala y, Levi theaungchi ly Tabynako angjeaung iy tako u ai nai tla. Tavai kamkawm ha harei ly tai nai khala, tamkhawn anui y meingtym la nai ka-thui ka-thui amsa ai na tla.
18-24Nidym mang pheirei y Ephraim tavai kamkawm i tamkhawn anui y hina nai kamta kamkawm ka-lyp amymychi i luchi hawi tai u ai nai tla.
| Theaung | Lu sa nai keung | Vuikanai |
|---|---|---|
| Ephraim | Ammihu i chapo Elishama | 40,500 |
| Manase | Pedazur i chapo Kamaliela | 32,200 |
| Benjamin | Kideoni chapo Abidan | 35,400 |
| bawibawi: | 108,100 |
Ephraim i tavai kamkawm ly pa-thom y amsa ai nai tla.
25-31Tosyh mang pheirei Dan tavai kamkawm i tamkhawn anui y hina nai kamta kamkawm ka-lyp amymychi i luchi hawi tai u ai nai tla.
| Theaung | Lu sa nai keung | Vuikanai |
|---|---|---|
| Dan | Ammisadai i chapo Ahieza | 62,700 |
| Aser | Okran i chapo Pakiela | 41,500 |
| Naphtali | Enan i chapo Ahira | 53,400 |
| bawibawi: | 157,600 |
Dan i tavai kamkawm ly kangkhym kangtem y amsa ai nai tla.
32Israela chengchi i tavai kamkawm ka-lyp vuikanai bawibawi ly 603,550 rei ne. 33Areng my Mosi teng y leu pei nai kamta, Levi theaungchi ly Israelachi ai amyn la naira y abawi y.
34Israela chengchi ly Areng my Mosi teng y leu pei nai kamta sa u bo. Tavai thau nai khala nupai ka-lyp amsa u nai ne.
Khumi Common Language Bible © Bible Society of Myanmar, 2005.