Kati Nai 4
4
Levi theaung kohath nupai i kalopchi
1 Areng my Mosi teng y, 2“Levi theaung kohath i nupai hawi yhm dengtheungchi theung y, 3saneng phairei hawi saneng vui pangrei sala, Areng i Tabynakora y kalop sa pajau nai neampacho bawibawichi ai amsi pajochi dengdai yhm dengtheung ka-thui ka-thui amyn la achu ai nai leu pei. 4Nichi ly chai keh nai kalopchi sa ai nai tla,” napi. 5Areng my Mosi teng y hina naichi sa ai nai leu pei bo. Tai asyh ai nai neng tym baly, Aron hawi ni i chapochi ly Tabynako theung y kun i, Leu Maikawm Pawm mo y jang nai kanih ali hang nai leu iy, huni hawi Leu Maikawm Pawm y khiu ai nai tla. 6Kanih ali salo y mawi peih kanem hawi khiu iy, huni salo y kanih an kamngau hawi kiu bi ai nai tla. Naibaly sengtlengchira samtleangchi thawi yb ai nai tla.
7 Areng teng y tako talam nai sabawi salo y an kamngau kanih bai iy, huni salo y samtangchi, rimui khauchi, rahumchi, kreip hang khai nai tui kacheangchi khai ai nai tla. Talam nai tako py sabawi salo y awm jojo ai nai tla. 8Huni ateaung alang bawibawichi ai an kamsen kanih hawi khiu iy, huni an kamsen kanih salo y mawi peih kanem hawi khiu ai nai tla. Naibaly sengtlengchira y samtleangchi thawi yb nai tla. 9Maisi kateang hawi maisi yhmchi, tangkeihchi, mai-ai khaira khauchi hawi olive asitui khauchi ai an kamngau kanih hawi khiu ai nai tla. 10Maisi kateang hawi, huni i ateaung bawibawichi ai mawi peih kanem hawi tapau iy angjeaungra salo y khai ai nai tla. 11Muku maicham salo y an kamngau kanih hawi khiu iy, huni salo y mawi peih kanem hawi mym ai nai tla. Naibaly samtleangchi thawi yb ai nai tla. 12Kachai meingtymra teaung nai sora hawi samtang bawibawichi ai an kamngau kanih hawi tapau iy, huni salo y mawi peih kanem kanih hawi khiu chum baly, samtleang salo y khai ai nai tla. 13Maichamra i mawi thau hawi maidym vah chum baly, an kamleng kanih hawi khiu ai nai tla. 14Huni salo y maicham i ateaung maisi yhm, leangkhawnchi, khaileaung chawn hawi rahumchi khai ai nai tla. Naibaly maichamra i ateaung alangchi ai mawi peih kanem khiu iy, samtleangchi thawi yb ai nai tla. 15Tai naira asyh ai nai neng tym baly Aron hawi ni i chapochi my ateaung alang kachai bawibawichi ai khiu chum nai khala naini, kohath i nupaichi ly jeu iy, huni ateaungchi angjeaung u ai nai tla. kohath nupaichi ly huni ateaung alangchi ai kiu hawi abi pajau y; abi lawh baly dei u ai.
Tabynako asyh nai tleirei kohath i nupaichi ly huni kalopchi sa u ai nai tla. 16Pathyp pi nai keung Aron i chapo Eleaza ly Tabynako i vui py, maisi hang, rimui, teicha teinei katalamra, tahm palyn nai asitui hawi, Areng teng y talam nai Tabynako i ateaung alang ngiereichi ai py amsi pi ai nai tla. 17Areng ly Mosi nini Aron teng y, 18-19“kohath nupai ly huni vawn chai keh nai ateaung alangchi abi y ai nai hawi, abi lawh baly dei y ai nai, hunichi sahawi y ahai ai nai pei moh. Huna naichi avum y ai nai Aron hawi ni i chapochi ly Tabynako theung y kun iy, khumi luteng sa ai nai kalop hawi angjeaung ai nai kalopchi py pasym pi akyhkyh ai nai tla. 20Na i py kohath khumichi Tabynako theung y kun iy, ateaung alang kachaichi ai khen u lawh baly dei u ai,” napi.
Levi theaung karashon nupaichi i kalopchi
21 Areng my Mosi teng y, 22-23Levi theaung karashon nupai hawi yhm dengtheungchi theung i saneng phairei hawi, saneng vui pangrei sala awm iy Areng i awmra Tabynakora y kalop sa pajau nai neampachochi ai, amsi pajo mang i dengtheung ka-thui ka-thui amyn la ai nai leu pei bo. 24-25Nichi i kalop ly: Tabynako, huni i theung mang i tabiura, angam mang i tabiura, mawi peih kanem hawi sa nai salo keh i tabiura, 26Tabynako katheu pa-kho jang nai kanih ali, Tabynako hawi maicham teng ka-ki kanih ali hang nai hawi vuinawnchi, Tabynako apai pa-kho kanih alichi py, huni vawnsaichi tai naira y teaung nai leaungsai bawibawichi py, angjeaung u ai nai ne. Nichi ly huni ateaung alangchi hawi sa ai avo nai kalop ngiereichi sa u ai nai tla. 27kerashon nupaichi ly Aron hawi ni i chapochi my pasym pi yb nai kalopchi hawi angjeaung ai nai ngiereichi sa ai nai Mosi hawi Aron nini my khen patawm ryhryh ai nai tla. 28Hunichi ly Tabynakora y karashon nupaichi my sa ai nai kalopchi ne. Nichi ly pathyp pi nai keung Aron i chapo Ithama my pacheang nai kamta sa u ai nai tla.
Levi theaung Merari nupaichi i kalopchi
29 Areng ly Levi theaung Merari nupai hawi yhm dengtheungchi theung y, 30saneng phairei hawi saneng vui pangrei sala awm iy Areng i Tabynakora y kalop sa pajau nai neampachochi ai amyn la ai nai Mosi teng y leu pei bo. 31Nichi ly Tabynako angpang pjengchi, katlangchi, chenghengchi hawi panuirachi py, 32Tabynako apai ka-ki chenghengchi, panuirachi, khangmuichi hawi vuinawnchi py, hunira sa tabi nai ateaung alang bawibawichi py, angjeaung ai nai tla. Khumi luteng ly mychi i vui pasym pi yb nai ateaungchi angjeaung ai nai tla. 33Hinichi ly Tabynakora y Merari nupaichi my sa ai nai kalopchi ne. Nichi ly pathyp pi nai keung Aron i chapo Ithama my pacheang nai kamta sa u ai nai tla.
Levi theaungchi i vuikanai
34-48 Areng my leu pei nai kamta Mosi, Aron hawi Israela cheng lu sa naichi ly Levi theaung theung i kohath nupai, karashon nupai hawi Merari nupaichi theung i, saneng phairei hawi saneng vui pangrei sala awm iy, Areng i awmra Tabynakora y kalop sa pa jau nai neampachochi ai, amsi pajo hawi yhm dengtheung ka-thui ka-thui amyn la achu nai hinichi ne.
| Nupai | Vuikanai |
|---|---|
| Kohath | 2,750 |
| Karashon | 2,630 |
| Merari | 3,200 |
| bawibawi : | 8,580 |
49 Areng my Mosi teng y leu pei nai kamta, Levi theaung khumi luteng ai amyn la iy khumi leaung leaungrei sa ai nai kalopchi hawi angjeaung ai nai kalopchi py pasym pi yb nai ne.
Khumi Common Language Bible © Bible Society of Myanmar, 2005.