MATTHAI 23
23
Reita patiu nai keungchi hawi Pharisaichi molam amkym hai nai
(Mk 12.38–39; Lk 11.43–46, 20.45–46)
1Naibaly Isu ly khumi mipuichi hawi abangnaichi teng y leu thui i, 2“Reita patiu nai keungchi hawi Pharisaichi ly Mosi i ateh naira y ateh u lawh, 3hunai deaungkho y nichi i ang thui pi nai ngierei ly so u ly patawn u; nichi i atiti sa nai kamta naini so u moh; nichi ly thui mang ly thui u i, so mang ly so u y pasi lawh veng. 4Nichi ly myn ji parai nai pavei u iy, khumichi ai apu hai lawh, na i py nichi ly kiu pajeung kadeaung chy y py teaungdei ai ngai u y. 5Nichi i atiti sa nai bawibawi ly khumi i ka-niu y sa nai teu; nichi ly la-phawi vui bei kalen sa i kanih tawn py len parai sa;#Mt 6.1; Kati 15.38; Leu 6.8 6naibaly pawi sa naira y tahm asang keh nai meingtym hawi, achura yhm y tahm asang keh nai atehra hawi, 7seng meingtym y nichi ai chiu nai amichi my nichi ai, ‘Rabbi,’ napi nai py ngai u parai lawh. 8Na i py nangchi ly ‘Rabbi’ ang palau nai amteng u moh; nangchi ai patiu nai keung ly leaungrei awm khyh, naibaly nangchi bawibawi ly amjo amnau ne. 9Naibaly nangchi ly khaileaung pri y ami ai py ‘Ngaai’ ti u moh: Ngampo ly leaungrei awm khyh, mymy ly kani pri y awm. 10Pahawi nai keungchi ang palau nai py amteng u moh: nangchi ai ang pahawi nai keung ly leaungrei awm khyh, huni ly Krista ne. 11Nangchi theung y len keh nai ly nangchi ai sabawm nai keung y awm lawh ai nai tla.#Mt 20.26–27; Mk 9.35, 10.43–44; Lk 22.26 12Ami py tahm apasang nai ngierei ai ly tahm panem ai; ami py tahm apanem nai ngierei ai ly tahm pasang ai.#Lk 14.11, 18.14
Pharisai hawi reita patiu nai keungchi ai pasum nai
(Mk 12.40; Lk 11.39–42, 44, 52, 20.47)
13“Na i py nangchi Reita patiu nai keungchi hawi Pharisai tapawp naichi awi, nangchi ly taham si! Nangchi ly amichi i vui kani pri my peang naira ly kho hai tawp veng iy, nangmychi py kun u y i, kun ai naichi ai py nangchi my kun ai nai pei u y. 14[Nangchi Reita patiu nai keungchi hawi Pharisai tapawp naichi awi, nangchi ly taham si! Nangchi ly neampachy lumaichi i yhmtheaung cha pi, naibaly tapawp ai nai tau nai kra parai pa-rei my chiu sa u lawh; hunai deaungkho y nangchi ai ly pasum nai tleaung y pasum ra ai.] 15Reita patiu nai keungchi hawi Pharisai tapawp naichi awi, nangchi ly taham si! Khumi leaungrei ai nangchi i reita y pakun ai nai nangchi ly pangli mang py kacheng mang py amki, naibaly mymy ly kun bo nabaly mymy ai nangchi tleaung y ty keh nai ngari angawm i chanau sa hai lawh.
16“Nangchi pahawi nai keung mei kamjuchi awi, ‘Ami py achura yhm kalen pui y tauh iy vaineng abeu nai ngierei ly, huni ly ati sai py ny y leang; ami py achura yhm kalen pui i muku y tauh iy vaineng abeu nai naini sa tanga ai nai tla,’ napi nai keungchi awi, nangchi ly taham si! 17Nangchi cheng y nai hawi mei kamjuchi awi! Mani nai len keh mo? Muku a? Muku khai hai takhra nai achura yhm kalen pui a? 18Naibaly, ‘Ami py maicham y tauh iy vaineng abeu nai ngierei ly, huni ly ati sai py ny y leang; salo y atiti talam angchi nai ai tauh iy vaineng abeu nai ngierei naini sa tanga ai nai tla,’ na u lawh. 19Nangchi mei kamjuchi awi! Mani nai len keh mo? Atiti talam nai a? atiti talam nai ai khai hai takhra nai maicham a? 20Hunaibaly ami py maicham y tauh iy vaineng abeu nai ngierei ly, maicham hawi huni tleaung y awm nai bawibawi y tauh iy vaineng abeu lawh. 21Naibaly ami py achura yhm kalen pui y tauh iy vaineng abeu nai ngierei ly, achura yhm kalen pui y hawi huni theung y awm nai keung y tauh iy vaineng abeu lawh. 22Ami py kani y tauh iy vaineng abeu nai ngierei ly Tameuh i atehra hawi huni i tleaung y ateh nai ai py tauh iy vaineng abeu lawh.#Is 66.1; Mt 5.34
23“Nangchi Reita patiu nai keungchi hawi Pharisai tapawp naichi awi, nangchi ly taham si! Seaungsyn hawi chamaw hawi chija py nangchi ly horei y harei pei u i, Reita leu aly len keh nai, hawi naira py, pahen naira py, ka-ym awm naira py so u y pasi lawh: na i py hunichi nangchi sa ai nai tla veng, naibaly tuni py sa ai khai su ai nai tlo y leang.#Lev 27.30 24Pahawi nai keung mei kamjuchi awi, nangchi ly changrang ly aeang i kula-iu ly pajawn.
25“Reita patiu nai keung hawi Pharisai tapawp naichi awi, nangchi ly taham si! Nangchi ly khau hawi saibi ly salo mang paju u i, theung mang y ly cha parawp nai hawi amkym pajau y nai kawi bo. 26Nang Pharisai mei kamju awi, khau hawi saibi ly salo mang py chai thai ai nai theung mang y paju man.
27“Reita patiu nai keungchi hawi Phraisai tapawp naichi awi, nangchi ly taham si! Tapreaung kaleung bau pa-rei paju iy, salo mang y ly apu pa-rei amteng i, theung mang y ly khumi kadeichi i hiu hawi chai y nai cheaungkhang kawi naichi kamta atawm nangchi ly!#Ataw 23.3 28Nangchi py hunai kamta atawm khyp teang, salo mang y ly khumichi i mei ka-niu y hawi parai nai amteng u i, theung mang y ly tapawp nai hawi kamngo nai kawi u lawh veng.
Isu my pharisai hawi reita patiu nai keungchi ai pajeng ai nai
(Lk 11.47–51)
29“Nangchi Reita patiu nai keungchi hawi Phraisai tapawp naichi awi, nangchi ly taham si! Nangchi ly amochi i tapreaung sa u iy, khumi kahawichi i angawm py palum u i, 30‘Achi ly isichi deung khala y awm i khyly, amochi i thi patheu naira y abawi y leang,’ na u lawh. 31Hunaibaly nangchi ly amochi ai padei nai keungchi i chanauchi ne, nanai apany hai nai ne. 32Hunaibaly ngamsichi i ne naira pakawi u. 33Pavuichi awi, pavui i kangpreangchi awi; nangchi ly ngari angawm tara chih nai ly mana tleaung u thai ai mo?#Mt 3.7, 12.34; Lk 3.7 34Khen cham, huni deaungkho y chy bo, kai ly nangchi teng y amochi, khumi kachengchi, Reita patiu nai keungchi ai kang pato ai; nangchi ly phyreichi ai padei u ai i kraws tleaung y tahen u ai; phyreichi ai ly nangchi i achura yhm y chip u i, avang tleirei y hui iy ana u ai; 35hunaibaly khumi kahawi Abela i thi dengdairei, meingtym kachai hawi maicham sala y Barakia i chapo Zakaria ai nangchi my padei nai thi khrairei, khaileaung tleaung i khumi kahawichi i thi theu nai bawibawi ly nangchi i tlang tleaung y tym ai.#AA 4.8; 2 Neng 24.20–21 36Meitang khyp kang thui pi, huni atiti bawibawi ly vai deung i kangthauchi i tlang tleaung y tym ai.
Isu my Jerusalem mary ai tamen nai
(Lk 13.34–35)
37“Aw Jerusalem, Jerusalem, amochi ai padei nai keung, nang teng y pato naichi ai ly lengseaung y aphi ka nai keung awi! A nu my mymy i chochi ai pakhi anui y o hai achu nai kamta, nang i chanauchi ai o hai achu ai nai tlen majirei kang tau mo? 38Na i py nangchi ly ngai u y. Khen cham nangchi i yhm ly ka-keu khai pi jo veng bo.#Jer 22.5 39Kang thui pi, ‘Areng i amyn y jeu nai ly taham hawi,’ ti u y ryrei ly, nangchi ly vai i dengdairei kai ai niu ali y leang bo he,” napi.#Sam 118.26
Khumi Common Language Bible © Bible Society of Myanmar, 2005.