MATTHAI 22
22
Apom nai pawi hawi pata nai
(Lk 14.15–24)
1Naibaly Isu ly pathang i nichi teng y pata nai leu y thui pi bi: 2“Kani pri my peang nai ly ami mo samrang leaungrei ly ni i chapo i vui y aju palyn nai pawi sa nai hawi pata nai ne. 3Naibaly aju palyn nai pawi biu cha naira y jeu ai nai napi yb naichi ai heang ai nai mymy i miseaungchi ai pato: na i py nichi ly jeu ai nai ngai u y bo. 4Naibaly mymy ly, ‘Kai i heang naichi teng y ly, khen cham, kai i pawi sa rym nai pajau bo i, kai i si kataichi hawi kai i tawnbawi pacho patyp naichi ly tleh i, ati cheaungkhang sa rym bo; aju palyn nai pawi y biu cha ai nai jeu u jau, tapi u’ napi nai miseaung takhrachi ai pato bi bo. 5Na i py nichi ly huni leu pateng y nai tako u iy, leaungrei ly mymy i hlau y chei, leaungrei ly ka-pai sa naira y chei; 6khumi takhrachi my ly mymy i miseaungchi ai patiu iy angji ngailai pa-rei my sa i padei u bo. 7Hunaibaly samrang ly kado theu i mymy i tavaimichi ai pato iy, huni khumi ai padei nai keungchi ai ly padei teang i, nichi i avang py leang pi pawn bo. 8Naibaly mymy ly mymy i miseaungchi teng y ly, ‘Aju palyn nai pawi ly kasa rym bo, na i py heang naichi ly cha ai nai ataing y leang. 9Hunaibaly lam kangprei sangum takhra takhra y chei u ly, niu nai ngiereichi ai ly aju palyn nai pawi y biu cha ai nai heang u,’ napi. 10Hunaibaly huni miseaungchi ly theu u iy lam y chei u i, niu nai ngiereichi ai ly, khumi kamngo py ne sy, khumi kahawi py ne sy, bawibawichi ai hawi u achu bo; hunaibaly jeu achu naichi ly aju palyn nai pawi biu cha naira kawi u bo.
11“Na i py samrang ly huni heang naichi ai khen ai nai kun iy, apom nai kanih akhiu y nai leaungrei ai hu y niu bo. 12Naibaly mymy ly ni teng y, ‘Nai awi, apom nai kanih akhiu y naimy hi y mana kun lawh mo?’ napi. Naibaly ni ly sai py katheu thai y bo. 13Naibaly samrang my ly mymy i miseaungchi teng y, ‘Ni i kiu kheu kawm u ly, angam mang i kaveng y patheu u; hu y ly vo py vo ai, ho py akachai ai,’ napi.#Mt 8.12, 25.30; Lk 13.28 14Heang naichi ly nawi parai, na i py vawi takhra naichi ly di parai,” napi.
Akeu pei nai molam deng chumchi nai
(Mk 12.13–17; Lk 20.20–26)
15Hunai thym khala y ly Pharisaichi ly mymy i leu thui naira y patiu thai ai nai sai arum u bo. 16Naibaly nichi ly mymychi teng y abangnaichi hawi, Heroda i kamkawmchi ai mymy teng y pato i hunichi my ly, “Sara awi, nang ly khumi meitang ne, Tameuh i lam y py leu meitang khyp naimy patiu iy, ami ai py meimai akhen y, nanai kaichi pany: ati mana nai mo nabaly nang ly ami ai py patle takhra lawh nai py by y. 17Hunaibaly nang ly mana dawn mo? Kaichi ai thui pi cham. Kaisara teng y akeu pei nai ly pei ngau a pei ngau y a?” napi. 18Na i py Isu ly nichi i kamngo nai sai ly pany iy, “Nangchi tapawp naichi awi, ati mana nai kai ai cham u mo? 19Akeu tangka kai ai patei u cham,” napi. 20Naibaly nichi ly mymy teng y pia vui pangrei nai tangka cho la i mymy ly nichi teng y hini myn hawi amyn ly ami i mo?” napi. Naibaly nichi ly mymy teng y, “Kaisara i,” napi. 21Naibaly mymy ly nichi teng y, “Tumbaly Kaisara i atitichi ly Kaisara teng y pei u ly: Tameuh i atitichi ly Tameuh teng y pei u bei,” napi. 22Naibaly nichi ly huni leu thai i khri pa-rei lyh nai, mymy ai khai su i tako u pawn veng.
Deira i angthau teang nai molam deng chumchi nai
(12.18–27; Lk 20.27–40)
23Hunai kani teang angthau bi ai nai by y, nanai Saddukaichi ly mymy teng y chei u i ni teng y,#Ataw 23.8 24“Sara awi, Mosi my ly, ‘Khumi leaungrei chanau so y naimy dei iy, ni i amjo amnau my ly ni i aju tavau ai la iy amjo amnau i vui ti ampreng pi ai nai tla,’ napi. 25Ne naibaly kaichi theung y amjo amnau leaung saryhrei awm i, chalu ly aju la iy dei bo: naibaly ti ampreng y nai deaungkho y ni i aju tavau ai ly mymy i amnau amtym ai nai khai pi bo; 26hunai kamta teang pa-nyh pa-thom py sa i, saryhrei nai tym pa-rei bebe sa bo. 27Naibaly nichi bawibawi dei nai bo y ly huni neampachy py dei teang. 28Hunaibaly angthau bi nai khala y ly nichi leaung saryhreichi theung y ly mani i aju lawn ai mo? Nichi bawibawi ly ni ai la bo,” napi nai deng u bo.
29Isu my ly nichi teng y, “Nangchi ly Tameuh i cha-iu leu hawi Tameuh i atiti sa thai naira pany u y nai deaungkho y dawn tamang u nai ne. 30Angthau bi nai khala y ly nichi ly apom py apom y, apom ai nai py deaung paseng y, kani pri i amtaw thau naichi kamta awm ai bo. 31Naibaly kadeichi angthau bi ai nai leu ly, Tameuh my nangchi teng y, ‘Kai ly Abraham i Tameuh, Isaka i Tameuh, Jakob i Tameuh ne,’ nanai thui pi nai ly phain u y nai sai a? 32Tameuh ly kadeichi i Tameuh ny y leang, kanghengchi i Tameuh teu,” napi nai pathang.#Theu 3.6 33Naibaly khumi mipuichi ly huna nai thai i, mymy i patiu nai ly khri pa-rei lyh na.
Reita leu pei nai kalen
(Mk 12.28–34; Lk 10.25–28)
34Naibaly Pharisaichi ly Isu my Saddukaichi ai tlau pajau y pa-rei my thui pi nanai pany iy achu u bo. 35Naibaly nichi theung y khumi leaungrei Reita pany nai keung my ly,#Lk 10.25–28
36“Sara awi, Reita leu y leu pei nai ly mani len keh mo?,” nanai mymy ai cham nai leu deng bo. 37Naibaly mymy ly niteng y, “Nang i Areng Tameuh ai ly nang i paleung verei hawi, nang i phailo verei hawi nang i dawn nai bawibawi hawi nang tamen ai nai tla.#Leu 6.5 38Huni ly leu pei nai len keh nai hawi, aly len keh nai ne. 39Naibaly huni ka-tla atawm hui nai ly hini he, ‘Nangmy ai atamen nai kamta nang i saleaungchi ai py tamen ai nai tla,’ napi nai ne.#Lev 19.18 40Huni leu pei nai nyhrei naira y ly Reita leu hawi amochi i leu bawibawi akup bebe nai bo,” napi.
Messia i molam deng chumchi nai
(Mk 12.35–37; Lk 20.41–44)
41Naibaly Pharisaichi ly achu u nai thym khala y ly Isu my nichi ai sairei deng i, “Krista ai ly mana dawn u mo? Ni ly ami i chapo mo?” napi. 42Nichi my ly mymy teng y, “Davida i,” napi. 43Mymy ly nichi teng y, ‘Tumbaly Davida my Phailo Kachai i saho y mana nai ni ai Areng napi lawh? Mymy ly,
44‘Areng ly kai i Areng teng y,#Sam 110.1
Nang i paleung ka-echi ai ly nang i kheu padawi anui
y kakhai y ryrei ly,
Kai i lamtang mang y ateh,’ napi.
45Davida ly mymy ai Areng napi lawh baly, mana nai ni ly chapo ne thai ai mo?” napi. 46Naibaly ami py sai py pathang thai y bo, huni kani dengdairei baly ami py leu takhra ha py deng vam y bo.
Khumi Common Language Bible © Bible Society of Myanmar, 2005.