MATTHAI 24
24
Isu my Achura yhm taphra ai nai molam thui pi nai
(Mk 13.1–2; Lk 21.5–6)
1Naibaly Isu ly achura yhm kalen pui i nai theu i tako ai nai tau bo; naibaly abangnaichi ly mymy ai achura yhm kalen pui meingtym takhra takhra patei ai nai mymy teng y chei u bo. 2Naibaly mymy ly nichi teng y, “Hunichi bawibawi ly niu u lo-oh? Meitang khyp kang thui pi, panawi y nai lengseaung tleangleang nai ly hi y ha py awm ai ny y,” napi nai pathang.
3Naibaly mymy ly Oliv mawi y ateh nai thym khala y abangnaichi ly nichi my tlairei mymy teng y chei u i, “Huni atitichi ly mana khala y tym ai mo? Nang jeu bi ai nai hawi khaileaung pri tem ai nai ka-ma-ra ly ati awm ai mo? Kaichi ai thui pi kyh,” napi. 4Naibaly Isu ly pathang i nichi teng y, “Nangchi ai ami my tapawp y ai nai tau tleaung y awm u. 5Ati mana nai mo nabaly khumi neangneangchi ly, ‘Kai ly Krista ne, nanai kai i amyn angam nai ang jeu ai i, khumi neangneangchi ai tapawp ai. 6Naibaly nangchi ly atiu nai leu hawi atiu nai satang kamthang thai u ai; nangchi ly paleung bi y ai nai tau tleaung y awm u; hunichi ly tym ai nai angchi yb teu; na i py tem naira ly tym y leang rai. 7Cheng takhra hawi cheng takhra atiu ai i, pri takhra hawi pri takhra atiu ai; meingtym takhra takhra y takang theu ai i, kaleih py theu ryry ai. 8Hunichi bawibawi ly patang angchei nai ne.
9“Huni neng khala y ly nichi ly ngari patang ai nai nangchi ai au iy ang padei ai: kai i amyn deaungkho y cheng bawibawichi my py nangchi ai niu ngai y ai.#Mt 10.22 10Huni neng khala y ly khumi neangneangchi ly atlym ai i, apatiu hai leungtang iy aniu ngai y leungtang ai. 11Amo tapawp naichi py neangneang theu ai i, khumi neangneangchi ai tapawp ai. 12Naibaly kamngo ly khri pa-rei peung ai nai deaungkho y khumi neangneangchi i tamen naira ly dam ai. 13Na i py tem khala y khrairei kham pajau nai ngierei ly huni khumi kypkyp ly hengra nga ai.#Mt 10.22 14Naibaly cheng bawibawichi teng y pany hai naira lawn ai nai hini Tameuh my peang nai Satang Kahawi ly khaileaung pri verei y thui pi ai; huni pajau khala y ly tem naira tym ai.
Amso ngai hawi nai jei hyn naira
(Mk 13.14–23; Lk 21.20–24)
15“Hunaibaly phain nai ngierei ly awm nai sai pany sy: amo Daniela i thui nai taphra nai keung amso ngai nai ly meingtym kachai y, angdo nai nangchi niu nai khala y ly,#Dan 9.27, 11.31, 12.11 16Judai pri y awm naichi ly mawi y preang u sy; 17amphu y awm nai khumi ly mymy i yhm y atiti tawn ai nai satlo moh sy;#Lk 17.31 18naibaly hlau y chei nai khumi ly mymy i kanih tawn ai nai ali moh sy. 19Huni kani y ly deungdi aniu naichi hawi deaungdi kanu kanei naichi ly taham si ai. 20Naibaly nangchi i preang ai nai neng ly kaseih y mo, Anawn Kani y mo tym y ai nai chiu so u; 21huni neng khala y ly patang nai khri pa-rei awm ai; huna tanrei nai ly khaileaung palum angchei khala i dengdairei vai khrairei tlen py awm vai y rai, ne, awm py awm ali bi ai ny y leang bo.#Dan 12.1; Amt 7.14 22Naibaly huni neng ai ly dawi hai moh khyly khumi nanai kangheng ha py awm ai ny y; na i py vawi takhra naichi deaungkho y huni neng ai ly dawi hai ai. 23Hunai khala y ly ami my nangchi teng y, ‘Khen cham, Krista ly hi y awm, hi y he,’ ang napi baly ym u moh. 24Krista angam naichi hawi amo angam naichi py theu ai i, nichi ly sa thai iy khyly vawi takhra naichi ai malawn py tapawp thai ai nai ka-ma-ra kalenchi hawi khri pa-rei lyh ai awm naichi py patei ai. 25Dawn cham, kang thui pi rym nai bo he. 26Hunaibaly nichi ly nangchi teng y, Khen cham, ni ly daichi ka-vym y awm,’ ang napi baly chei u moh; ‘Sambeu katem y awm,’ ang napi i py ym u moh.#Lk 17.23–24 27Amlosadi ly nisi mang y theu iy, ni dym mang y tym pa-rei amteng nai kamta ly, Khumi i Chapo i jeu nai ly ne teang ai. 28Ma mang y py mawi veu awm naira ngierei y langnachi py tym achu ai.#Lk 17.37
Khumi i Chapo angjeu bi ai nai
(Mk 13.24–27; Lk 21.25–28)
29“Na i py huni neng patang nai bo y ly kanito ai ly veng hai ai i, lo py angvang y leang bo, ka-sichi py kani mang i dengdairei tla ai i, kani mang i atiti sa thai nairachi ai ly ahyn hai ai;#Is 13.10, 34.4; Ezek 32.7; Joel 2.10, 31, 3.15; Amt 6.12–13 30huna nai kha y ly Khumi i Chapo i ka-ma-ra ly kani mang y amteng ai: naibaly huna nai khala y ly khaileaung pri i cheng cheaungkhangchi ly vo iy paleung y atum ai i, Khumi i Chapo ly atiti sa thai naira hawi khri pa-rei nang parai naira hawi kani mang i khupanym tleaung y jeu nai niu ai.#Dan 7.13; Zek 12.10–14; Amt 1.7 31Naibaly baw katym pajeng parai nai eng iy, mymy i kani pri i amtaw thau naichi ai ly pato ai; naibaly nichi ly mymy i vawi takhra naichi ai ly khuteng taki palyhrei i dengdairei, kani katem i nai katem y khrairei pangym achu ai.
Thaidu keung y amtiu naira
(Mk 13.28–31; Lk 21.29–33)
32“Hunaibaly thaidu keung i awm nai sai pata nai leu amtiu u: changpi pati iy, ngam ampho baly kani pui theu ai bo, nanai nangchi pany; 33hunai kamta khyp ly nangchi py hunichi bawibawi niu nai khala y ly mymy ly kasa bo, ne katheu pa-kho ahawi y my awm bo, nanai pany u. 34Meitang khyp kang thui pi, hunichi bawibawi tym angym y ryrei ly vai deung i kangthauchi ly tamo y ai. 35Kani khaileaung ly tama ai i, kai i leu ly tamo y ai.
Huni neng kani ly ami py pany y
(Mk 13.32–37; Lk 17.26–30, 34–36)
36Na i py huni kani hawi neng ly Ngaai leaungrei ny y baly ami py pany y: kani pri i amtaw thau naichi py, Chapo py pany y leang. 37Naibaly Nova heng nai khala i kamta ly khumi i Chapo jeu nai ly awm teang ai.#AA 6.5–8 38Huni tuibai theu nai kani tym y ryrei ly Nova my paleaung pui y kun nai kani tym pa-rei nichi ly cha py cha, nei py nei, apom py apom, apom ai nai py deaung paseng: 39naibaly tuibai theu nai nichi bawibawi ai um be y ryrei ly nichi ly ati sai py pany y; Khumi i Chapo jeu nai kha y ly hunai kamta awm teang ai. 40Huna nai khala y ly hlau y khumi leaung nyhrei awm ai i. leaungrei ai ly la vui iy, leaungrei ai ly daw jo ai. 41Neampachy leaung nyhrei choh nip sum y choh nip ai i, leaungrei ai ly la vui iy, leaungrei ai ly daw jo ai. 42Hunaibaly ajeng u rym paryp, nangchi i Areng ly mani kani y jeu ai mo, nanai nangchi pany y. 43Na i py hini ly pany u, yhmkeung my kangviu khumi tym ai nai neng pany i khyly, mymy ly o rym ai i mymy i yhm ateng pi vau ai nai pei y leang bo.#Lk 12.39–40 44Hunai deaungkho y nangchi py aeng ryhryh naimy awm u, nangchi i dawn y nai neng khala y ly Khumi i Chapo ly ang jeu ai.
Ka-ym awm nai hawi ka-ym by y nai miseaung
(Lk 12.41–48)
45“Hunaibaly dengtheungchi ai kry iy avo nai neng tleirei y biu an dawn pi ai nai, yhmkeung i khai nai miseaung ka-ym kaawm cheng nai ly ami mo? 46Mymy i yhmkeung ang jeu nai neng khala y miseaung huna nai kamta sa nai ai niu nai ly taham hawi ai. 47Meitang khyp kang thui pi, mymy i awm nai bawibawichi tleaung y krykeung y khai ai. 48Na i py miseaung kamngo ly ni i paleung y, 49‘Kai i yhmkeung ly tym y leang rai mang,’ na iy, mymy i miseaung ahawichi ai ly pakhau iy, 50kangviuchi teng y cho nei lawh sy, huni miseaung i yhmkeung ly ni i dawn y nai kani y tym ai, naibaly pany y nai neng khala y ang jeu ai i, 51khri pa-rei chip ajiu piu iy, tapawp nai khumichi i nga ai avo nai kamta nga hai ai; hu y ly vo py vo ai, ho py akachai ai.
Khumi Common Language Bible © Bible Society of Myanmar, 2005.