MATTHAI 14
14
Baptis sa nai Johan dei nai
(Mk 6.14–27; Lk 9.7–9)
1Huni neng khala y ly samrang Heroda ly Isu i satang thai iy mymy i miseaungchi teng y, 2“Huni ly Baptis sa nai Johan na a tu ly; mymy ly kadeichi theung i nai angthau bi nai bo; hunai deaungkho y hina nai sa thai nairachi my ly mymy ai sa hai nai bo to,” napi. 3Heroda ly mymy i amjo amnau Philipa i aju Herodi i molam y Johan ai ly patiu iy kawm i, theaung y paeung bo.#Lk 3.19–20 4Ati mana nai mo nabaly Johan my ly ni teng y, “Nang ly ni ai lawn ngau y,” napi chum veng bo.#Lev 18.16, 20.21 5Naibaly mymy ly ni ai padei ai nai ngai i py khumi mipuichi ai jei, nichi ly ni ai amo palawn nai deaungkho y. 6Na i py Heroda ai tapen nai neng alyp nai kani tym nai kha y ly Herodi i chaniu ly nichi i mo y lam i, Heroda ai amo theu hai. 7Hunai deaungkho y mymy ly ni i ati py hnei nai ngierei ly pei ai nai vaineng abeu khei bo. 8Naibaly amhm my ni ai pachei nai kamta, “Baptis sa nai Johan i lu ly saibi tleaung y hi y kai teng y pei,” napi. 9Naibaly samrang ly paleung mawn i py mymy i vaineng abeu nai saichi hawi, mymy hawi biu o ahawi naichi deaungkho y huni pei ai nai thui pi bo: 10hunaibaly mymy ly khumichi pato i theaung y Johan i lu tameang hai. 11Naibaly nichi ly ni i lu ly saibi y syn i anglo teng y pei, naibaly mymy ly amhm teng y leh hai bo. 12Naibaly ni teng y abangnaichi my ly mymy i veu kalawm i up iy, Isu teng y chei i thui pi.
Isu my khumi sang pangreichi ai pacho nai
(Mk 6.30–43; Lk 9.10–17; Jh 6.1–14)
13Naibaly Isu ly huna nai thai i, hu i dengdairei paleaung mang daichi ka-vym meingtym y chei takhra bo. Na i py khumi mipuichi ly pany iy avang i dengdairei kacheng mang mymy ai hui u bo. 14Hunaibaly mymy ly kacheng y angkhyh kha y khumi mipui ka-teng ny y nai niu iy, khri pa-rei pahen i nichi i no naichi ai hawi sa pi bo. 15Naibaly kani dym bo nabaly abangnaichi ly mymy teng y ahihawi iy, “Hini ly daichi ka-vym meingtym ne, kani py patyh veng bo; khumi mipuichi ai ly avang takhra takhra y chei u iy, mymychi i vui cha ai nai sai van ai nai chei hai khyh,” napi. 16Na i py Isu my ly nichi teng y, “Nichi ly chei ai nai aly by y; nangmychi my nichi cha ai nai atiti pei u,” napi. 17Naibaly nichi my ly mymy teng y, “Kaichi ly hi y tako phi pangrei hawi ngo amai nyhrei awm kalei khyh,” napi. 18Naibaly mymy ly, “Hi y kai teng y jeu hai u,” napi. 19Naibaly mymy ly khumi mipuichi ai acha kangheng tleaung y ateh ai nai leu pei; naibaly ni my ly tako phi pangrei hawi ngo amai nyhrei la i, kani mang y khen iy kawn nai leu thui, naibaly theng baw theng baw i abangnaichi teng y tako phi pei iy, abangnaichi my ly khumi mipuichi teng y paji. 20Naibaly nichi bawibawi ly cha i kajeu kawi u bebe, nichi i cha nai kamthom akhui nai py teaung holai nyhrei kawi teang. 21Cha naichi ly neampachychi hawi deaungdichi ai thui y naimy neampacho ka-cheang ryry naimy sang pangrei tahm awm.
Isu ly tui salo y aleaung nai
(Mk 6.45–52; Jh 6.15–21)
22Naibaly mymy ly khumi mipuichi ai amprei hai nai sala y, mymy chei y rai kha y ho mang vai y angpeang man ai nai abangnaichi ai ly paleaung y atang hai praw. 23Naibaly khumi mipuichi ai amprei hai nai bo y mymy ly chei takhra iy chiu sa ai nai mawi y lyn kalau; naibaly kani dyn bo nabaly mymy tlairei hu y awm. 24Na i py paleaung ly ang um pareaung y awm i, ali paka ma nai deaungkho y tui sampyh my paleaung khri pa-rei ali hai. 25Naibaly mymy ly khutawi y rai kha y ang tleaung y nichi mang y tako tapai i, 26abangnaichi ly mymy ai ang tleaung y tako nai niu khala y ly, “Tavau khumi na a hu ly,” napi nai paleung dah na i jei nai athorei my aeu u bo. 27Na i py Isu my ly nichi ai preng praw i, “Paleung awmnem naimy awm u; kai teu na a; jei u moh,” napi.
28Naibaly Petera ly pathang i, “Areng awi! Nang ne baly ang tleaung y nang teng y kang jeu ai nai leu pei kyh,” napi. 29Naibaly mymy ly, “Jeu bei,” napi. Naibaly Petera ly paleaung i dengdairei kathiu iy Isu teng y tapai nai tui tleaung y tako bo. 30Na i py ni ly ali theu nai niu iy jei i, tup amteaung nai kha y, “Areng! Kai ai sabawm kyh,” nanai aeu bo. 31Naibaly Isu my kiu jaha praw iy, ni ai amkaw i ni teng y, “Nang ym naira di nai awi, ati mana nai ym thai y nai awm lawh a?” napi. 32Naibaly nini ly paleaung y atang hawi iy ali ly anawn ryp. 33Naibaly paleaung y awm naichi ly, “Nang ly Tameuh i Chapo ne khyp nai bo,” nanai mymy ai chiu u bo.
Isu ly Kenesaret mary i no naichi ai hawi sa pi nai
(Mk 6.53–56)
34Naibaly nichi ly hu mang vai y angpeang iy Kenesaret pri i kacheng y tym u i, 35huni meingtym i khumichi ly mymy ai ma bo nabaly, huni ahawi tengtang meingtym tleirei y khumi pato iy, no nai bawibawichi ai mymy teng y hawi u bo; 36naibaly nichi ly mymy i kanih tawn y nam thai khyh ai nai takeng u; naibaly nam nai ngiereichi ly hawi ryp hawi ryp bo.
Khumi Common Language Bible © Bible Society of Myanmar, 2005.