MATTHAI 15
15
Amsi pajochi i reita tanynchi
(Mk 7.1–13)
1Hunai thym khala y ly Jerusalem avang i dengdairei Pharisaichi hawi Reita patiu nai keungchi ly Isu teng y chei u iy, 2“Ati mana nai nang teng y abangnaichi ly miteaungchi i tanyn taphra lawh mo? Nichi ly tako cha iy py kiu asi u vai y,” napi. 3Naibaly mymy ly nichi teng y, “Nangchi py nangchi i tanyn deaungkho y ati mana nai y Tameuh i leu pei nai ly taphra u lawh be? 4Tameuh my, ‘Ngamhm ngampo ai tahm khai:’ naibaly, ‘Ami py mymy i amhm ai mo ampo ai mo pasawi nai ngierei ai ly padei takenkei ai nai tla,’ napi.’#Theu 20.12, 21.17; Leu 5.16; Lev 20.9 5Na i py nangchi my ly, ‘Ami py mymy i amhm teng y mo, ampo teng y mo, Kai ly nang ai sabawm ai avo nai ly Tameuh i vui y khai takhra veng bo, napi nai ngierei ly mymy i amhm ampo ai sabawm ai nai tlo y,’ na u lawh. 6Hunaibaly nangchi i tanyn deaungkho y nangchi ly Tameuh i leu pei nai ai ly tama hai nai bo he. 7Nangchi tapawp naichi awi, amo Isaia my nangchi i satang thui yb nai ly teng khyp nai bo; mymy ly,
8‘Hini khumichi ly nichi i labeaung y ly kai ai tahm ang khai i,
Mymychi i paleung ly kai hawi palo parai veng;#Is 29.13
9nichi i reita patiu naira y ly khumichi i leu pei nai patiu lawh iy,
Nichi i kai ai chiu nai ly jawmjawm teu,’ napi,” nanai pathang.
Khumi ai chai hai y nai atitichi
(Mk 7.14–23)
10Naibaly mymy ly khumi mipuichi ai palau i nichi teng y, 11“Tangai u ly, dawn pany u; labeaung y kun nai ly khumi ai chai hai y nai ny y leang, leabeaung i nai theu nai ly huni kypkyp my khumi ai chai hai y nai ne,” napi. 12Hunai thym khala y abangnaichi ly chei i mymy teng y, “Pharisaichi ly huni leu thai iy paleung hawi y, nanai ly pany a? napi. 13Mymy ly pathang i, “Kani pri mang i Ngaai my ui y nai keung tleirei ai ly akyn ai nai tla. 14Nichi ai paka u reng moh; lam patei nai keung mei kamju teu. Hunaibaly mei kamju ai mei kamju my lam patei baly angawm y tla mei ai,” napi. Naibaly Petera my niteng y,#Lk 6.39 15“Huni pata nai leu ly kaichi ai thui pi pachai kyh,” napi nai pathang. 16Naibaly mymy ly, “Nangchi py vai khrairei pany y jojo rai nai sai a? 17Labeaung y kun nai ngierei ly kajeu y tym i, daichi cheira y theu ryp veng, nanai pany u y nai sai a? 18Labeaung i nai theu naichi naini paleung theung i nai theu nai ne; hunichi kypkyp my ly khumi ai chai hai y nai ne.#Mt 12.34 19Paleung theung i nai kamngo dawn naichi, khumi ai padei naichi, pajang sa naichi, angai naichi, paviu naichi, seu rumrang naichi, thui tamawm naichi py theu: 20hunichi my ly khumi ai chai hai y naichi ne: na i py kiu asi y naimy cha nai ly khumi ai chai hai y nai ny y leang,” napi.
Neampachy leaungrei i ym nai
(Mk 7.24–30)
21Naibaly Isu ly hu i dengdairei theu i, Tura hawi Sidon ka-peang y chei. 22Naibaly khen cham, huni tengtang i dengdairei Kanan pri i neampachy leaungrei theu i, “Aw Areng, Davida i Chapo awi, kai ai pahen kyh; kai i chaniu ai vawinam my nam thleng bo,” nanai aeu bo. 23Na i py mymy ly sai py pathang y. Naibaly abangnaichi my ly mymy teng y chei i, “Ni ly achi i nithun y aeu ryry ly: tako hai kyh,” napi nai takeng u. 24Na i py mymy ly pathang i, “Israela cheng tama nai beramchi teng y ny y baly kai ai pato nai ny y leang,” napi. 25Na i py neampachy my ly chei iy, “Areng awi, kai ai sabawm kyh,” nanai ni ai chiu. 26Naibaly mymy ly, “Chanauchi i tako la pi iy, uichi teng y aphi lawh nai ly avo y leang,” napi nai pathang. 27Naibaly ni my ly, “Ne, Areng, na i py uichi py yhmkeung i sabawi tleaung i dengdairei tako dei beu naichi ly cha reng chy bo,” napi. 28Hunaibaly Isu my ni teng y, “Lo awi, nang i ym naira ly khri pa-rei len na ly: nangmy i ngai nai kamta khyp my nang i tlang tleaung y tym sy,” napi nai pathang. Naibaly ni i chaniu ly huni neng khypkhyp kha i dengdairei hawi ryp bo.
Isu my khumi kano neangneangchi ai hawi sa pi nai
29Naibaly Isu ly hu i dengdairei chei vui i Kalili ang ahawi y tym; naibaly mymy ly mawi y kalau iy hu y ateh bo. 30Naibaly khumi mipui ka-teng ny y nai mymy teng y chei u i, kheu kambaichi khumi kaphrachi, mei kamjuchi, leu katheu thai y naichi ai hawi, kalang neangneangchi ai py mymy teng y chei hai u iy, mymy i kheu keung y khai i, mymy ly nichi ai hawi sa bo. 31Hunaibaly khumi mipuichi ly leu katheu thai y naichi leu katheu lawh nai, khumi kaphrachi hawi lawh nai, kheu kambaichi tako lawh nai, mei kamjuchi mei angvang lawh naichi ai niu u iy, khri pa-rei lyh nai Israelachi i Tameuh ai palo u bo.
Isu my khumi sang palyhreichi ai pacho nai
(Mk 8.1–10)
32Naibaly Isu ly abangnaichi ai palau iy, “Khumi mipuichi ly vai kai teng y kani thomrei awm i, nichi ly cha ai nai ati sai py by y nai deaungkho y kai ly nichi ai khri pa-rei pahen na; biu hai naimy ly nichi ai tako hai ai nai ngai y, ti y baly nichi ly lam sala y paha u lawh na,” napi. 33Naibaly abangnaichi my ly, “Khumi mipui hu ji jarei cha ai nai ka-lawh tako phi ly daichi ka-vym y ly ma mang i nai nga ai mo?” napi. 34Naibaly Isu my nichi teng y, “Tako phi majirei awm u mo?” napi. Naibaly nichi my ly, “Phi saryhrei hawi ngo katheang maidenrei awm kyh,” napi. 35Naibaly mymy ly khumi mipuichi ai khaileaung y ateh ai nai leu pei. 36Naibaly mymy ly tako phi saryhrei hawi ngo ly la iy, kawn nai leu thui i, theng baw theng baw iy abangnaichi teng y pei: naibaly abangnaichi my ly khumi mipuichi teng y paji. 37Naibaly nichi bawibawi cha i kajeu kawi bawibawi; nichi i cha nai kamthom akhui nai py atlem saipa saryhrei kawi teang. 38Cha nai keungchi ly neampachychi hawi deaungdichi ai thui y naimy, neampocho ka-cheang ryry naimy sang palyhrei awm. 39Naibaly mymy ly khumi mipuichi ai amprei hai iy paleaung y atang i Makadan pri tengtang y chei bo.
Khumi Common Language Bible © Bible Society of Myanmar, 2005.