MATTHAI 13
13
Ti hei nai keung hawi pata nai
(Mk 4.1–9; Lk 8.4–8)
1Huni kani y ly Isu ly yhm i dengdairei theu iy, ang peang y ateh. 2Naibaly mymy teng y khumi mipui ka-teng ny y nai achu nai deaungkho y mymy ly paleaung y atang iy ateh; naibaly khumi mipuichi bawibawi ly palang y angdo.#Lk 5.1–3 3Naibaly mymy ly nichi teng y pata nai leu y atiti neangneang thui pi i, “Khen cham, ti hei nai khumi ly ti hei ai nai amawi; 4naibaly hei nai khala y phyrei ly lam teng y tla i, tavochi my cha krai. 5Naibaly phyrei ly thaithi tleaung y khaileaung ampo nai meingtym y tla i, khaileaung tho y nai deaungkho y prau praw ryp; 6na i py kani bi asang leng nai kha y ly ang i, tangjyn ngo y nai deaungkho y jei ryp veng. 7Naibaly phyrei ly kabeng aleng theung y tla i, kabeng aleng ly len ryh len ryh i vawi pajeang veng. 8Naibaly phyrei ly khaileaung kahawira y tla i, vui theu iy phyrei ly chungvairei, phyrei ly vui tariurei, phyrei ly phairei peung. 9Kano awm nai khumi ly thai sy,” napi.
Pata nai leu i patyp nai
(Mk 4.10–12; Lk 8.9–10)
10Naibaly abangnaichi ly mymy teng y ahihawi iy ni teng y, “Nang ly ati mana nai nichi teng y pata nai leu y thui pi mo?” napi. 11Naibaly mymy ly nichi teng y, “Kani pri my peang nai leu kathiuchi ly nangchi ai pany ai nai pei nai ne, nichi ai ly pei nai ny y leang. 12Ati mana nai mo nabaly ami py atiti awm nai ngierei teng y ly pei panawi bi ai, naibaly mymy ly bym pa-rei nga ai; na i py ami py atiti by y nai ngierei teng i nai ly mymy i awm yb nai angchi py la pi ra ai.#Mt 25.29; Mk 4.25; Lk 8.18, 19.26 13Hunai deaungkho y kai ly nichi teng y pata nai leu y thui pi; ati mana nai mo nabaly nichi ly khen iy py niu y i, kano y thai iy py pany thai y, dawn nai py pany y. 14Naibaly Isaia i leu thui yb nai ly nichi i tlang tleaung y tym nai bo he: mymy ly,
‘Nangchi ly kano y thai i py pipi pany thai y ai,
Niu mang ly niu u i py dawn naira pipi pany y ai:#Is 6.9–10
15Ati mana nai mo nabaly hini chengchi i paleung ly kyh chawn veng bo,
Nichi i kano py pang panang veng i,
Nichi i mei py pasym teang.
Ti y baly nichi i mei my niu lawh iy,
Nichi i kano my thai lawh ai i,
Nichi i paleung my pany thai lawh ai,
Naibaly nichi ly hi ali teang lawh iy
Nichi ai hawi kaso pi vui lawh na,’ napi.
16Nangchi i mei ly niu nai deaungkho y taham hawi; nangchi i kano ly thai nai deaungkho y taham hawi.#Lk 10.23–24 17Meitang khyp kang thui pi, amo neangneangchi hawi khumi kahawi neangneangchi py nangchi i atiti niu naichi ly khrikhri pa-rei niu ai nai ngai parai, na i py niu y bo; nangchi i atiti thai naichi py thai ai nai ngai, na i py thai y bo.
Isu my ti hei nai keung i pata nai leu nai thui pi pachai nai
(Mk 4.13–20; Lk 8.11–15)
18“Hunaibaly ti hei nai khumi i satang ly tangai u. 19Ami py kani pri i leu ly thai iy dawn nai pany y pui baly, kamngo sa reng nai keung ly jeu iy, mymy i paleung y hei nai angchih ly lawm pi ry veng, huni ly lam teng y hei nai ne. 20Naibaly thaithi tleaung y hei nai ly hini ne he: mymy ly leu thai iy kawn parai naimy tangai praw ryp: 21na i py mymy kypkyp teng y tangjyn ngo y i tanarei chy awm khyh; naibaly huni leu deaungkho y patang naira mo, ana naira mo theu baly mymy ly atlyn praw ryp. 22Naibaly kabeng aleng theung y hei nai ly hini ne he: mymy ly leu thai bo, na i py khaileaung pri y heng nai khala y dawn nai sai hawi nang naira my tapawp nai saichi my ly leu ai ly achih hai i, athai y bo. 23Naibaly khaileaung kahawira y hei nai ly hini ne he: mymy ly kano y thai iy pany thai bo: naibaly athai khyp i pyhrei ly chungvairei, pyhrei ly vui tariurei, pyhrei ly phairei athai na,” napi.
Chohmyn hawi pata nai
24Naibaly mymy ly nichi teng y pata nai leu takhra thui pi bi i, “Kani pri my peang nai ly hlau y ti kahawi hei nai keung hawi pata nai ne: 25na i py khumichi ly i ngym nai sala y mymy i paleung ka-e ly chei iy, choh theung y ly cho myn hei iy tako veng bo. 26Hunaibaly choh ly prau iy vui theu baly choh myn ly amny bo. 27Naibaly yhmkeung i miseaungchi ly chei u i mymy teng y, ‘Areng awi, nang i hlau y ly ti kahawi hei y nai sai a? Choh myn ly ma mang i nai awm lawh mo?’ napi. 28Naibaly mymy ly nichi teng y, ‘Tuni ly paleung ka-e i sa nai na a tu ly,’ napi. Naibaly miseaungchi my ly mymy teng y, ‘Naibaly kaichi my chei iy hunichi ai ly la achu pawn ai nai avo na a?’ napi. 29Na i py mymy ly, ‘Ny y leang; choh myn la achu baly choh akyn rau lawh na. 30Choh tyn nai neng khala y khrairei vanrei cheang palai sy; naibaly choh ly kai i choh tyn nai neng khala y ly choh tyn nai keungchi teng y, Choh myn lo u achu manme ly, leng ai nai taeang u; na i py choh ly kai i choh beu y pakym u achu, kanapi ai,’ napi,” nanai thui.
Anmawi hm hawi pata nai
(Mk 4.30–32; Lk 13.18–19)
31Naibaly mymy ly pata nai leu takhra nichi teng y thui pi bi i, “Kani pri my peang nai ly anmawi ti amairei ami my la iy mymy i hlau y hei nai kamta atawm; 32huni ly ti bawibawi tleaung y theang keh; na i py keung cheang nai bo y ly amti amjangchi tleaung y ly len keh lawh i, dengkeaung lawn bo; hunaibaly salo mang i tavochi ly akheang tapai iy huni i changpi y jei,” napi.
Isu my angbo hawi pata nai
(Lk 13.20–21)
33Mymy ly pata nai leu takhra nichi teng y thui pi bi i, “Kani pri my peang nai ly neampachy my angbo la iy, tako dei ne naira thomrei theung y num be pa-rei phui nai kamta atawm,” napi.
Isu my pata nairachi teaung nai
(Mk 4.33–34)
34Huni bawibawi ly Isu my khumi mipuichi teng y pata nai leu y thui pi. 35# Sam 78.2Amo my,
“Pata nai leu y ly kathui pi ai i,
Khaileaung palum angchei khala i dengdairei atiti
heu nai ly kathui ai,”
nanai thui nai ly tym thai ai nai, mymy ly pata nai leu ny y baly nichi teng y ati sai py thui pi y leang.
Isu my chohmyn pata nai ai thui pi pachai nai
36Hunai thym khala y ly mymy ly khumi mipuichi ai khai su iy yhm y kun: naibaly abangnaichi ly mymy teng y ahihawi iy, “Hlau y choh myn hei nai pata nai leu kaichi ai thui pi pachai kyh,” napi. 37Naibaly mymy ly pathang i, “Ti kahawi hei nai keung ly Khumi i Chapo ne; hlau ly khaileaung pri ne; 38ti kahawi ly kani pri i chanauchi ne; choh myn ly kamngo sa reng nai keung i chanauchi ne; 39hei nai paleung ka-e ly diabola ne; choh tyn nai ly khaileaung pri tem ai nai neng ne; choh tyn nai keungchi ly kani pri i amtaw thau naichi ne. 40Hunaibaly choh myn la achu iy mai y leng nai kamta ly khaileaung pri tem ai nai neng khala y ly awm teang ai. 41Khumi i Chapo my ly mymy i kani pri i amtaw thau naichi ai pato ai i, mymy i peang naira i dengdairei kamngo sa hai reng nairachi ai hawi, atiti hawi y sa reng nai keungchi bawibawi ai ly patheu ai i, mai pui kangveaung y aphi ai: 42hu y ly vo py vo ai, ho py akachai ai. 43Hunai khala y khumi kahawichi ly Ampo i pri y kanito kamta angvang ai. Kano awm nai khumi ly thai sy.
Heu nai yhmtheaung hawi pata nai
44“Kani pri my peang nai ly hlau y yhmtheaung kangviu y up nai kamta atawm; huni ly ami my niu iy heu ra i, kawn nai deaungkho y mymy i awm nai bawibawi jo iy huni hlau ly van.
Khawisaleng lengseaung hawi pata nai
45“Naibaly kani pri my peang nai ly ka-pai sa nai khumi khawisaleng i lengseaung hawi parai naichi ai hau nai kamta atawm bi; 46naibaly mymy ly khawisaleng i lengseaung vang tang parai nai harei niu i, mymy i awm nai bawibawi jo iy van.
Paleupy hawi pata nai
47“Naibaly kani pri my peang nai ly pangli y tapiu jang iy, amjy cheaungkhang adang achu nai kamta atawm taleang bi. 48Huni ly kawi bo nabaly kacheng y ryh; naiblay nichi ly ateh iy kahawi amjy ly pawm y pacheang iy, hawi y nai amjy ly aphi u su bo. 49khaileaung pri tem ai nai neng khala y ly hunai kamta khyp awm teang ai; kani pri i amtaw thau naichi ly theu ai i, khumi kahawi theung i nai khumi kamngochi ai ly vawi takhra iy, 50mai pui kangveaung y aphi ai; hu y ly vo py vo ai, ho py akachai ai.
Leu meitang kangtha nai kangngym
51“Nangchi ly huni bawibawi pany thai bo a? napi. 52Nichi my ly mymy teng y, “Ne chy,” napi. Naibaly mymy ly nichi teng y, “Huna nai ne baly kani pri my peang nai i abang nai khumi ai palawn nai Reita patiu nai keung ngierei ly, yhmkeung my mymy i yhmtheaung dengdairei atiti kangthachi hawi atiti kangngymchi py patheaung nai kamta atawm,” napi.
Isu ai Nazaret mary my ngai y nai
(Mk 6.1–6; Lk 4.16–30)
53Naibaly hina nai ne, Isu ly huni pata nai leu takhra takhra thui pi pajau bo nabaly hu i dengdairei tako vui bo. 54Naibaly mymy i awm nai avang y tym i, mychi i achura yhm y nichi ai patiu; hunaibaly nichi ly khri pa-rei lyh i, “Hini khumi ly hini cheng naira hawi hini atiti lyh ai awm parai naichi sa ai nai sa thai naira ly ma mang i nga nai mo? 55Hini ly lasama i chapo ny y lawh a? Mymy i amhm ly Mari napi nai ny y lawh a? Mymy i amjo amnauchi py Jakob, Josepha, Simon, Juda napi naichi ny y lawh a? 56Mymy i tuichochi py achi teng y awm bebe nai ny y lawh a? Hini khumi ly hini atiti bawibawi ly ma mang i nga nai mo? napi. 57Naibaly nichi ly mymy i tlang tleaung y paleung hawi y bo. Na i py Isu ly nichi teng y, “Amo ai ly mymy i avang y hawi mymy i yhm y ny baly palo y nai ly awm vai y leang,” napi.#Jh 4.44 58Naibaly nichi ly ym naira by y nai deaungkho y mymy ly huni meingtym y atiti rengrang neangneang so y leang.
Khumi Common Language Bible © Bible Society of Myanmar, 2005.