Room 3
3
Kɔraawiizi wibii dɔɔi wia
1Di gunnɛ, ɛrɛɛ Jus hinawaa nuu suma kaali banla n waa Jus hina ɛɛwɛi? Bɛɛ tɔnaa ba na ba hɛŋ teŋaa la biininei? 2Ba nuu sumaa werge, di kaa di tɔna yaa ni wikpila biini. Ka unnii ɛɛ wizenne a maa biini. Jus hina labuu Kɔraawiizi kpa u wiŋɔɔlaa bagli.
3Amɔ, Kɔraawiizi daŋ kuu baŋhina n waa yardɛɛ la wia vɛɛ u nuuzi laa? 4Akai! Di newee maa ɛɛ karahiŋ, ka Kɔraawiizi wia daŋ haa dɔɔ wibii. Ba sɛbɔɔrɛ Kɔraawiizi Hɔŋ biini, di ŋɔ,
“Ba daŋ kpa wibii tɛɛ i wiŋɔzi.
Di ba wa dii seriya,
i hor daŋ du sum.”
5Di yaa wichɔgaa ɔɔ gil Kɔraawiizi wideŋlaa lii, di du wer werge, ɛrɛɛ ya ŋɔi? Gil n kpa newea wiŋɔzi di kaa pɛɛzi. Di yaa wichɔgaa ɔɔ gil Kɔraawiizi wideŋlaa lii, ka Kɔraawiizi kaa tɔɔri yaa dikuu wichɔgaa la wia, wichɔgaarɛ u ra ɛɛ guŋ gɛɛ? 6Akai! Di Kɔraawiizi dɔɔ wichɔgaarɛ, ɛrɛɛ ú ɛɛ di wer di durnya seriyai? 7Di n kara wia ɔɔ gil Kɔraawiizi wibii dii ra lii nɛnnɛ u ra na sɔŋ, ɛrɛɛ ú kaa kpa n kara kannaa la ŋɔ n ɛɛ wichɔgɛɛriiwɛi? 8Amɔ, ya ŋɔ lugɔ ya ra ɛɛ wichɔgaa, ka winanaa wer lii a biiniaa? Baŋhina ra zɔɔzi yaabuu di ra ŋɔ lugɔ yaa ra ŋɔ gunnɛ. Ka banla n na ŋɔ guŋ, ba hor waa sum. A dɛkkɔ Kɔraawiizi baaŋ n niŋ fuuh ba ni.
Nɛr maa wia waa deŋlee
9Too. Ɛrɛɛ a jaa duɛi? Yaa Jus hinaa bɔmbɔ banla n waa Jus hina ɛɛwɛ gɛɛ? Yaa waa baa bɔwɛɛ. Yaa faa baglɔɔrɛ lugɔ Jus hina ni banla n waa Jus hina ɛɛwɛ maanii ɛɛ wichɔgɛɛra. 10Ba faa sɛbɔɔrɛ, di ŋɔ,
“Nɛr maa waa hoo ɛɛ nɛnanii ga tuŋ.
Akai! Kpaŋkpaŋ maa
waa hoo.#Yira 14:1-3
11Nɛr la n zum wia zɛɛ
waa hoo.
Nɛr la n na nyiŋŋi Kɔraawiizi bɔr
gba waa hoo.
12Ba maa leuwoo ŋmɛnɛɛ, di bir pɛɛ.
Bɛl maa waa hoo
ra ɛɛ winanaa.
Akai! Kpaŋkpaŋ maa
waa hoo”
13“Ba nuuzi ɛɛwɔɔ lugɔ ŋmama la baŋ waa tɔɔgɛɛ.
Ba ra ŋɔ wia ra dar nɛra.”
“Ba wiŋɔzi la lugɔ duŋkpola siri.”#Yira 5:9; 140:3
14“Nuuseei ni nyɛgzi
su ba nuuzi.”#Yira 10:7
15“Ba hahzi manaŋ di ra la nɛkpui bɔr.#Sɛɛ 1:16 #Aiza 59:7-8
16Chɔgaa ni dɔgnya
yaari ba ŋmɛnɛɛ.
17Ba waa nuukpaŋ dɔɔi ŋmɛnɛɛ zummɛ.”
18“Ba waa Kɔraawiizi ra ɔm.”#Yira 36:1
19Ii zummɔ lugɔ wii la maa Moosis Gbɔg la n na bagli, banla n na hiŋ guŋ, hiŋaa labuu a ra bagli guŋ bá gilɛɛ wer dɔɔ nua maa bá ŋɔ, dúrnya maa ge wer dɔɔ chɔgri Kɔraawiizi be. 20Gbɔg hiŋaa wàá wer gil nɛr maa wia deŋli Kɔraawiizi be. Gbɔg la biinii nɛra wer zum ba wichɔgaa.#Joob 9:2 #Gale 2:16
Yarda biinii wia deŋlaa ra lii
21Filaŋkeŋ, Kɔraawiizi pilli gunla nɛra wia n niŋ ɛɛ deŋli u benii. Gbɔg la hiŋaa bɔr lɛi á lii. A wiarɛ Moosis ni Kɔraawiizi dɔgtɛɛzi la faa ŋɔ la. 22Yeesu Kristo yarda bɔttɛ á lii. Kɔraawiizi daŋ gil nɛr la maa n yardi Yeesu wia deŋli u be. Waa nɛr maa a tɔgzi kaali u dɔŋhiŋ. 23Nɛr maanii ɛɛ wichɔgaa di nyaa Kɔraawiizi girme. 24Yeesu Kristo yau yaabuu ha. Awiarɛ Kɔraawiizi wer gil yaa wia deŋli u be. U ɛɛ a maanii tɛɛ yaa pɛɛpɛɛ, dikuu u nɛsunaa wia. 25U gillɔɔ Yeesu Kristo siu, di wer lizi u baaŋ banla maa n yarduu ú siu wia la ni. U ɛɛ gunnɛ nɛ́ra zum lugɔ uŋ faa dɔɔ sisɔna nɛra ni, waa ba wichɔgaa wia hagzɛɛ a saŋa la, 26u wia deŋloore. U daŋ gil nɛra zum a maa biini filaŋkeŋ, ka ú wer ɛɛ Wideŋlaa Hiŋ, di kaa wer gil banla n yardi Yeesu la ge wia wer deŋli u be.
27Awia, lee ya jaa na bɔr chɔli yaa hinaanɛi? Yaa wàá wer na bɔr. Bɛɛ n tɔ a bɔrɛi? Winanaa ɛɛi gɛɛ? Akai! Yarda labuu tɔu. 28Yaa zummɔ lugɔ nɛr n niŋ yardi Kɔraawiizi wiarɛ ú wia wer deŋli u be. Gbɔg hiŋaa wàá wer gil u wia deŋli u be. 29Gɛɛ Jus hina bɛnnɛ niŋ wer hiŋ Kɔraawiizɛi? Banla n waa Jus hina ɛɛwɛ wàá wer hiŋuu gɛɛ? Ba gba daŋ wer hiŋuu. 30Kɔraawiizi ɛɛ kpaŋkpaŋ bɛnnɛ. U daŋ gil banla hɛna n teŋree wia wer deŋli, dikuu baŋ yardi Yeesu wia, di kaa gil banla hɛna n waa teŋree ge gba wia wer deŋli, dikuu ba gba n yardi Yeesu wia. 31Too. Yaa gillɔɔ Moosis Gbɔg la bir pɛɛ dikuu yarda wia gɛɛ? Akai. Yaa tɛɛabuu fɔŋŋa ra jaa.
Currently Selected:
Room 3: vag
Highlight
Share
Copy
Want to have your highlights saved across all your devices? Sign up or sign in
© 2017, Copyright Ghana Institute of Linguistics, Literacy and Bible Translation in co-operation with Wycliffe Bible Translators, Inc.
