Room 2

Kɔraawiizi seriya dii wia

1Hinla n na ŋɔ i dɔŋhiŋ ɛɛ wichɔgaarɛ, haa nua dɔɔwɛ hin niŋ ŋɔ. I himmaanii i ra tɛɛ chɔgri la. Wichɔgaa la hiŋ kpawɛɛ chuguu la, a himmaanii i ra ɛɛ. 2Yaa zummɔ lugɔ Kɔraawiizi ra di banla n na ɛɛ wia naa seriyaa ani wibii. 3Hinla n na chagzi i dɔŋhiŋ dikuu unna ɛɛ wia naa wia ka i himmaa ra ɛɛa, i daŋ wer lii Kɔraawiizi seriya dii biiniaa? 4Kɔraawiizi ra hiiniibuu werge, di ra tɛi sisɔna, di haa vɛɛ ra dii kanyitti werge maa, ka i ra binni a maa pɛɛ. Haa zummɛ lugɔ u ra ɛɛibuu winanaa la, í biini wer chɔgi dikuu i wichɔgaa la wiaa?

5Ka i bampirii du kpeg werge. Waa chɔgi dikuu wichɔgaa wia. I ra ɛɛ wichɔgaa la ra dau, di u hɔpizii la wa hello un niŋ di seriyazi ani wibii la, u baaŋ daŋ fuuh i ni werge maa.

6U daŋ turgi bɛl maa ani gunla uŋ hummɛ. 7Banla n ɔɔ haa vɛɛ ra ɛɛ winanaa bá wer na girme, chɔlaa ani miibɔɔ la n waa tuŋ Kɔraawiizi be la, baabuu niŋ na u miibɔɔ la. 8Ka banla n na nyiŋŋi ba bɛŋ sɔŋ, ba waa Kɔraawiizi wia ra sɛɛ, ka ra ɛɛ wichɔgaa la, baabuu daŋ na wia dikuu Kɔraawiizi baaŋ n kannɛ ba ni werge maa la wia. 9Tɔɔrɔɔ ni biinichɔg daŋ wa huuzi nɛr la maa n na ɛɛ wichɔgaa. Jus hinaa á feli huuzi, ka jaa huuzi banla n waa Jus hina ɛɛwɛ ge. 10Nɛr la maa n na ɛɛ winanaa ge daŋ wa na girme, chɔlaa ani bampirsɔna. Jus hinaa niŋ feli na ka bánla n waa Jus hina ɛɛwɛ ge na. 11Kɔraawiizi waa baŋhina ra tɔgzi kaali baŋhina.#Wiɛɛ 10:34

12Banla n waa Moosis Gbɔg zummɛ ka ɛɛ wichɔgaa wa siu la, Moosis Gbɔg lɛi Kɔraawiizi kpa ra di ba seriya. Banla n zum u Gbɔg lawaa, aabuu ú kpa di di ba seriya. 13Banla n na nuu Gbɔg la wia lɛi niŋ deŋli Kɔraawiizi be. Ka banla n na hiŋaa, ba wiarɛ niŋ deŋli u be.

14Banla n waa Jus hina ɛɛwɛ waa Moosis Gbɔg la zummɛ. Ka wia la ba himmaa biine n na tɛɛ baa ge du Moosis Gbɔg biinii. Awia, ba himmaa biine ra tɛɛ baabuu kiizi. 15Ba wiɛɛlaa ra bagluu lugɔ Kɔraawiizi sɛbi u Gbɔgrɛ du ba biine. Ba biine nfɛssi gba ra ɛɛ baabuu guŋ daansɛɛ, dikuubɛɛwiai, ba himmaa nfɛssi ɔɔ tɛɛ baabuu chɔgri, ŋmɛnɛbɛl ge a kaa tɛɛ baa winanaa. 16Awia, gunnɛ á wa ɛɛ hɔpizii la Kɔraawiizi n niŋ lii nɛra wolli ni baŋgia, di gil Yeesu Kristo di baa seriya. Gunnɛ n amaniyesuma la ra bagli.

Jus hina ni Kɔraawiizi Gbɔg wia

17Ama, hinla n na yir i hiŋ Jus hinuu, i bɔra sɔɔni dikuu hiŋ zum Gbɔg la wia, i kaa kpa Kɔraawiizi ra ta bara, 18di zum u kipar wia, di wer zum wia la n wesse dikuu bam baglii u Gbɔg la wia, 19i kaa ra kpa i hiŋ zenni alugɔ i wetto ɛɛ sitɔɔri, di bagli nyuŋŋa ŋmɛnɛɛ di wer gil bɔchaaŋ ba banla n du bɔbiri la be, 20di ŋɔ i ɛɛ nɛbaglii, di ra bagli banla n waa wia zummɛ, di kaa ŋɔ i ɛɛ nabɔmaa di ra bagli bichalli wia, dikuu hiŋ wette dɔɔ nunzuma ni wibii, di lii Gbɔg la biini wia, 21hinla n na bagli nɛra wia, ɛrɛɛ haa i hiŋ a baglɛi? I ŋɔ bá gilɛɛ ra ŋmɛɛ. Hiŋwaa waa ŋmɛaa? 22I ŋɔ bá gilɛɛ ra sɛm. Hiŋwaa waa sɛmaa? I ra gbɛlli vugaa. Hiŋwaa waa kuna a ŋmɛɛ a diini biiniaa? 23Hinla n na chɔli i hiŋ lugɔ i zum Kɔraawiizi Gbɔg la wia, ka bir a chɔgaa, Kɔraawiizi lɛi i ra binni pɛaa? 24Ba sɛbɔɔrɛ Kɔraawiizi Hɔŋ biini di ŋɔ, “Ii wiarɛ banla n waa Kɔraawiizi zummɛ ɔɔ ra gbɛlli Kɔraawiizi sɔŋ la.”

25Di ba teŋ i hɛŋ, i kaa ra hiŋ Gbɔg la, hɛŋ teŋaa la dɔɔ tɔnaa. Ama, di i ra chɔgi Gbɔg la, i birgi banla baŋ waa ba hɛna teŋree la bɛllɛ. 26Awia, di nɛr la baŋ waa u hɛŋ teŋŋe ra hiŋ Gbɔg la, ba wàá kpa guŋ ɛɛi birgi u hɛŋ teŋaa? 27Unla u hɛŋ n waa teŋŋe ka u ra hiŋ Gbɔg la, u daŋ tɛi chɔgri, dikuu hiŋ dɔɔ Gbɔg la di ɛɛ nɛr la baŋ teŋ i hɛŋ ka ra chɔgi a kiizi la wia.

28I baŋgia wikpoglaa lɛi niŋ gil i ɛɛ Jus hinuu. Bɔrahɔŋ teŋaa ge waa teŋaa himmaa ɛɛwɛ. 29Nɛr la n ɛɛ Jus hinuu himmaa, u biini wikpoglaa benii a lii. Nɛr la n dɔɔ bɔrahɔŋ teŋaa himmaa, u ge biinii a lii. Kɔraawiizi Dumnanii teŋaare ɛɛ teŋaa himmaa. Kii bɛl hiŋaa lɛi ɛɛ u himmaa. Newea lɛi niŋ chɔli a hiŋ. Kɔraawiizii niŋ chɔli a hiŋ.

Currently Selected:

Room 2: vag

Highlight

Copy