Room 4

Abraham yarda dɔɔi wiarɛ u wia dɔɔ wibii

1Ií binni yaa naabaal Abraham wia biini. Ɛrɛɛ u ge wia faa duɛi? 2Di Kɔraawiizi faa gillɔ u wia deŋli u be, dikuu u winanaa la uŋ faa ra ɛɛ wia, u daŋ vii wer chɔli u hiŋ. Ka wàá wer chɔli u hiŋ Kɔraawiizi be. 3Ɛrɛɛ ba faa sɛbi u wia Kɔraawiizi Hɔŋ biininei? Ba sɛbɔɔrɛ, “Abraham yardi Kɔraawiizii. Kɔraawiizi kuu guŋ wia gil u wia deŋli u be.”#Lug 15:6

4Di nɛr hummɔ, Kɔraawiizi turguu, kinnɛ u turgi. Sunzaa lɛi. 5Ka nɛr waa hummɛ ka dɔɔ yarda unla n niŋ gil nɛchɔgii wia deŋli u be la ni, ba daŋ ŋɔ lugɔ u yarda la wiarɛ Kɔraawiizi gil u wia deŋli u be. 6Gunnɛ yaa naabaal Deevid gba faa bagli di ŋɔ lugɔ nɛr la maa Kɔraawiizi n waa u wiɛɛlaa binnɛɛ, ka gil u wia deŋli u be, nuu sumaa.

7U faa ŋɔwɔɔrɛ,

“Banla maa Kɔraawiizi n gil

ba wichɔgaa tɛɛ baa,

di lizaa ba ni la,

nuu sumaa.#Yira 32:1-2

8Nɛr la maa Kɔraawiizi

n wàá pɛɛzuu

u wichɔgaa wia,

nuu sumaa.”

9Suma naa, banla n na teŋri hɛna bɛnnɛ a diu gɛɛ banla n waa teŋri gba ra diubuuwɛi? Yaa n na ŋɔ dí Abraham yardi Kɔraawiizii, Kɔraawiizi kuu guŋ wia gil u wia deŋli u be naa, 10ɛrɛɛ u faa du a saŋai? Ba faa teŋ u hɛnnɛ a saŋa gɛɛ, gɛɛ ba faa haa waa u hɛŋ teŋŋei? Ba faa haa waa u hɛŋ teŋŋe a saŋa. 11Kɔraawiizi n gillɛ u wia deŋli u be dikuu uŋ yarduu la wia la, denii u ŋɔ ú teŋ u hɛŋ, gúŋ bagli gunla uŋ gillɛ u wia deŋli u be dikuu u yarda la wia, ka ú wer ɛɛ banla maa baŋ waa ba hɛna teŋree, ka ba ra yardi Kɔraawiizi la mɛɛ, bá ge wia wer deŋli u be, 12di kaa ɛɛ banla ba hɛna n teŋree ge mɛɛ, banla n na yardi Kɔraawiizi gunla yaa naabaal Abraham la n faa yarduu, saŋa la u hɛŋ n faa haa waa teŋŋe la. Banla n na hiŋ guŋ jaa ba hɛŋ teŋaa ni la, ba mɛɛrɛ Abraham la.

13Kɔraawiizi nuuŋɔɔlii la uŋ faa ŋɔwɛɛ tɛɛ Abraham ni u biizi lugɔ ba daŋ wa dɔɔ durnya, ba Gbɔg hiŋaa biini lɛi u lii. Kɔraawiizi n kuu yarda la uŋ yarduu wia di gil u wia deŋli u be la, a yarda biinii Kɔraawiizi nuuŋɔɔlii la lii. 14Di a faa ɛɛwɔ lugɔ banla n na hiŋ Gbɔgrɛ niŋ dɔɔ durnya la, guŋwaa, yarda daŋ vii birgi kunduma, Kɔraawiizi nuuŋɔɔlii la ge bir pɛɛ. 15Gbɔg la ra ba Kɔraawiizi baaŋ ninɛɛ. An du de nɛra ge ra chɔgaa wiarɛ Kɔraawiizi baaŋ na fuuh nɛra ni la. Di Gbɔg faa waa hoo, nɛra faa wàá wer chɔgaa.

16Awia, yarda benii Kɔraawiizi nuuŋɔɔlii la lii, yaa wer na a maa dikuu Kɔraawiizi n na suŋ nɛra ni, di ra hiini baa la wia. Yaa maa mɛɛrɛ Abraham. Banla n na hiŋ Moosis Gbɔg di ra teŋri hɛna ani banla n waa hɛna a teŋri ka yardi Kɔraawiizi alugɔ Abraham la n faa yarduu la, ba maanii niŋ wer dɔɔ tamii Kɔraawiizi nuuŋɔɔlii la biini, di na wia la uŋ faa ŋɔwɛɛ la. 17Ba faa sɛbi gunnɛ Kɔraawiizi Hɔŋ biini di ŋɔ, “N gillɔɔ i ɛɛ nɛdeekpila maa mɛɛ.” Kɔraawiizi la n wette gil kuna la n siuwɛ á kaa dɔɔ miibɔɔ, di kaa wer ŋɔ wia la n haa waa ɛɛwɛ wia alugɔ a teŋ ɛɛwɔɔ la, waabuu Abraham yardi.#Lug 17:4

18Gunla Kɔraawiizi n faa ŋɔwɛɛ la, ba daŋ faa ŋɔ lugɔ guŋ wàá wer ɛɛ. Ka Abraham n faa dɔɔ u wiŋɔzi tamii werge maa wiarɛ u wer birgi nɛdeekpila maa mɛɛ, gunla Kɔraawiizi n ŋɔ nua tɛu, dí u naanna daŋ ŋmɛnɛ du kpil la.#Lug 15:2-6 19Kɔraawiizi n wa ŋɔ guŋ tɛɛ Abraham u wer yardi u wiŋɔzi la, di u binni faa du kalfa. Waa kaa ɛɛ lugɔ un niŋ kaa wer lul bie. U haaŋ Saara ge faa waa wette lul bie tɛu ka wa zɛŋ. Ka Abraham haa vɛɛ yardi Kɔraawiizi. 20Waa Kɔraawiizi wiŋɔɔlii la aanɛɛ di ŋɔ lugɔ guŋ wàá wer ɛɛ, ka bir dɔɔ yardakpeg tɛɛ Kɔraawiizi sɔŋ, 21di wer ɛɛ u tamii werge maa lugɔ wii la maa uŋ ŋɔ nua la, u daŋ ɛɛu. 22Awiarɛ “Kɔraawiizi gil u wia deŋli u be la.”

23U bɛŋ wia lɛi ba faa sɛbi, dí Kɔraawiizi kuu guŋ wiarɛ gil u wia deŋli u be la. 24Yaa gba wiarɛ ba faa kuu sɛbi guŋ, dikuubɛɛwiai, u daŋ gil yaa banla n yardi unla n lalli yaa Dɔɔri Yeesu Kristo siu biini la ge gba wia deŋli u be. 25Kɔraawiizi gillɔɔ Yeesu siu dikuu yaa wichɔgaa wia,#Aiza 53:5 di kaa lalluu siu biini yáa wia wer deŋli u be.

Currently Selected:

Room 4: vag

Highlight

Copy