Dwakam 11

Ni̱bu mwari̱mi burau

1Yinu a ni ti̱kan chi ti̱sweri yinang swe. A yi ko ya n swe se Kwama n ti ki̱di̱ng se Kwamangu, n ki ni̱bu ki̱ sii Kwama a muremu. 2Aya a mwintuwe a ne mwang swe tanti̱lange wu a fi̱lang Kan Kwama di̱duna Wurchalimanu. Di̱ne n ni bwako a bi̱bu a kuuti a kebu bi̱yili̱m we di̱mi̱nemu. Bi̱bu ka ni bi̱ni wauwadi̱mu riye swartu wan taana chiri turau. 3Mang tum ni̱bu mi̱mi burau yaka ma fa̱kui di̱mwar ya̱m bi̱yili̱m mi̱mi siini̱mu. N chi ka do kuli̱n furi ki̱lin ka ma di̱mwar mi̱nu we ditiyu kuneng ki̱ni kuuliti turau ki̱ni wan turukun.

4Ni̱bu di̱mwari̱m bi̱bu nang tini setuniye yurabiyu n ti fitilati yurau a ti̱ya a kakku Tewuduwe.#11:4 Sak 4:3,11-14. 5Ka bi̱kam ki̱baddu ka nwe chimi̱nde, ki̱rang ki̱chiredu we yii ki̱chati̱ bi̱ki̱mu. Nang tiyangu ni̱bu ki̱baddu ka chi̱u chini̱mu ka bwaradangu. 6A ni chi dukanu ka yinge twiye ke a swidu mwe we diti yikiyu n chi ki̱ma di̱mwar mi̱niyu. N chi ki̱ni dukan we neti̱bwiyu, ka sutedu ka kau ki̱tuum. N chi ki̱ni da ka yo di̱kume ka bulma ti̱ti̱nitu we ki̱dangu n chi ki̱badangu.

7Ka a ri di̱mwar chi̱ne, wuka nam ka chiredu a bwang ki̱swa̱ma̱nge ka kuladu n ti chi. Nam wu ka la chidu ka chi̱be ti̱n chidu. 8Kwa̱mi chiyu ka dudu we wa̱re ne lo a bi̱n di̱dun#11:8 Wurchalima. di̱du ni̱bu a kukan Yesu Tewuduwe. Bi̱n di̱du ni swedi Sodom ka Masare. 9Ni̱bu n ti kuuti n ti ti̱fi̱ki̱ritu n ti yiiniyu ka fwal nui chiyu kani̱n da̱ng kwa̱mi yiyu ka lam ditiyi yitta ki̱ni di̱mwatar ka ko ti̱n furku kwa̱miyangu. 10Ni̱bu ti̱ti̱nimu ka ma ti̱mi̱lan we bwa ni̱bu di̱mwari̱mi burabi̱m bi̱bu. Ka ma mabwi, kani̱n nika ki̱li̱mang di̱ne fa̱kubi̱bu burabi̱mu a be di̱mwar a ti̱ti̱nitu a ni riyemu.

11Aya we kuteng ditiyi yitta ki̱ni di̱mwatariyu, fi̱ki̱m chitu a ki̱latewe bwa di̱Kwama, ka le bwi chiyu, ka kunu ka tidutiye. Tayi yidui ka tau ni̱bu nabwen bi̱bu a ku chimu. 12Yinu fa̱kubi̱bi burabi̱mu a nwe di̱kan ker ki̱ni dukan a chire we bwadi ko, “Ti̱fi̱le fi!” N chi fal a fi̱l we ti̱twinitu a yika dii, fakwarbu chimu ki̱da̱ng ti̱ni ying.

13Bi̱nabi̱na ni̱bu a nwe ti̱mu a mi̱kan ki̱ni dukan, yinu ti̱me wiin wu a Wurchalima a kiyani ki̱ti̱bu, ni̱bu kuniyi yidibiin a bwaran. Ni̱bu a dubumu a nwe tayi nabwen. N chi a ni Kwama wu a diye dwiyentu yinang yinang.

14Di̱kumen di̱robi̱nu a su. Di̱tari̱nu nang wu ki̱funte bwi ki̱bedu.

Sumi yidibiin

15Naba di̱tumbi̱re Kwama wu nibine a ku wuko sum. Ti̱kan kebi̱ ki̱ni dukan a chire we bwadi ki̱fwadu ko,

“Dukan mati̱nu a ti̱ti̱ni ki̱ka̱ngi̱nu

n ti̱u Tewuduwe chire n ti Masiya

ka ma mati̱ntu ki̱diya kwadu!”

16Yinu seli̱bu wan turau chiri baana bi̱bu a swe a ki̱di̱ng mati̱ni̱mu a sung we kakku Kwamangu, a sii ki̱n, 17ki̱yidu ko,

“Mwang mabe, Kwama Tewuduwe naba dukane kwang,

m mun wu we ferediye n ti ki̱ka̱nge!

Di̱ne mati̱n mwitu mwan

mwe mun maditu ti̱dui ki̱ni dukan.

18Kuu ni̱bu a yimbu Kwamamu a ri ki̱ni ki̱fwini,

Aya ki̱ka̱ngu, ki̱swi ki̱fwinimo a lam

Ki̱swi a lam wu mwang kaba bi̱bwari̱mu mi̱nde,

Fa̱kubu mumu ka ya sure chi,

n ti ni̱bu bunti̱ki̱mu a nwe tayi mwiyumu.

Seli̱bu n ti bwesi̱m

ki̱swi a be wu ka chi̱be

bi̱bu a chi̱u ti̱ti̱nimu!”

19Yinu a wudu lo Kwama we bwadi, akwati wu a bwa̱ki̱ we mure lo Kwama. A kuteng ki̱ku, ki̱yile n ti kebi̱ n ti ker ki̱yalti n ti mi̱kaku ti̱mang n ti nabwe tarankwai.

Currently Selected:

Dwakam 11: Tula

Highlight

Copy

Compare