2 Koronti 5

Bwi yifwi ni yadu a bwadiye

1Aya ni yim ka di̱kur chi̱renu a ti̱ti̱ni̱nu a wurene, ka nang chikiye bwi yiyu ni sweendiyu, n Kwama n ki̱fwan ka do ni mi̱n lo ki̱diya kwade a bwadi. Wu lo n ke wu ni a mubbe, ti̱nti̱ne a ne kaiyadu kayane. 2Ki̱ka̱ngu, ni ma ki̱fwilti, di̱ne ni ke a no yadu ni le lo wu. 3Aya ka Kwama a sute bwi chireye, a ne ni ki̱ladu ni katti̱nuwe twatwadu.

4Aya ki̱ka̱ngu n chi̱ni we bwi yiyangu, a kau nangang ni kwa kana tu wa riye, aya ti̱tu ki̱fwedu n ke di̱ne ni baddu ni bwadu ke ni kaddu we ti̱ti̱nitu, aya ni baddu a yinge ni ki̱ni bwi yifwiyu, ke yika̱riyu a laimi̱n. 5N Kwama ki̱fwan a do ka sute bwiyu, yinu ka ni chi̱ni Fi̱ki̱m ki̱mu ke a yo ni yim chi ka ma ni mi̱nu we bwa kaketu.

6Nang chi a yo ka nang wuwule diye yo ni̱re we, kasi ki̱ku niyang yim ko ka n chi̱ni we ki̱ni bwi ti̱ti̱niye, fiswe chire a ma kutan n ti lo wu Tewuduwe wemi̱ne. 7Nangki̱n, ni̱n ma da wu a yo ni̱re, n ke chi ni kudi. 8Ki̱kumang ni̱n yo ni̱ru we lo bwadiye, a la ni̱mi̱n chi nang chiru we bwi ti̱ti̱niyu, nang swedu n ti Tewuduwe. 9Ni̱n baddu a la chi n ki̱n a nwe ta̱ma̱ng chirengu, ka n chi̱ni we ti̱ti̱nite ka a bwadiye.

10A kabi ki̱ng ni ngabadu we kakku Masiyangu, di̱ne kabaki̱ke. Di̱ne n kawure ka yiu ki̱ti̱me nangangu n ki̱n a ma a ti̱ti̱niyangu, ka ti̱yiliye, ka ti̱bwilaye.

Kunkaku ni̱bang n ti Kwama a di̱Masiya

11Di̱ne niyang tu niyang yim chi ni yalu ko tayi Tewuduwe, ni̱n funti̱bwi ni̱n yal ni̱bu a ya bwa di̱Kwama. N Kwama a yim yinangu n chi̱ni we mi̱nangu, ti̱nti̱ne mi̱n kamadu ti̱yim ka n ni̱n n bi̱wure. 12N ke di̱ne ni̱n baddu nang ri̱ka yiniye, kwako! Aya ni̱n funti̱ bwi nang yung chi turre wu ka yodu ta nwe ta̱ma̱ng nange. Ti̱nti̱ne ke ti̱yim ti̱ya di̱ki̱li̱n yiinu we bi̱bu ki̱ ri̱ka yichiyu we ti̱ti dwa̱ndwa̱n a nuyi chitu n ti ki̱ku ka bunti̱ chi a ni̱ritu. 13Ki̱kuuli ki̱ma ni̱n na? Yinangu bi̱kamu ki̱fwadangu? Kasi no m ma ki̱kuuliyu ni̱n madu ke ni̱n ri̱ka di̱n Kwaman. Aya ka n ke ki̱kuuliye, ni̱n madu di̱ne chi̱ne.

14Chitu ni̱n maditi kwang n ke di̱ne ta̱ma̱ng nang, aya mi̱laku Masiyangu a ti nimi̱n kakku. Yo nang ke bi̱yili̱mu ko Masiya a bwa di̱ne ni̱bi kwange, ni̱bi kwang a bwa ware n ti ki̱n ti̱n. 15N ki̱n a bwa di̱ne ni̱bi kwang, di̱ne ke bi̱bu ki̱ni ti̱kuri ti̱fwimu, a madu fiswe wu da bwiye we bwa kakke, aya a ma fiswe di̱ne wu a bwa di̱ne chiye, ti̱nti̱ne wu a kun we furu di̱ne chiye.

16Di̱ne yiko, bwa kakke a ne da̱ngku niyang we ki̱ni ki̱swi ni̱bu ki̱da̱ngi̱n niye we yinang wa ti̱ti̱niye. Di̱ne kasi ki̱ku m Masiya a ya da̱ngki̱ ki̱ka̱ngu, ki̱ka̱ngu ya̱mu a ri a ne nang wi ti̱nuwe. 17Di̱ne yiko, ka nii a kau wu Masiya, n ki̱n a kau wu fwiye ni, da bwiye a suu, ka ti̱ti̱le chiye a kau ti̱fwi.

18Chi ti̱fwi ti̱ti kwang ki̱bedu a Kwama, wu a do tibe ko n ti chi̱ni a di̱Masiya, n ki̱n a ni chi̱ni nangang ki̱ku a doku ni̱bang n ti Kwama. 19Ya̱mu nang bi̱bu. N Kwama ki̱doka ni̱bi kwang a di̱Masiya. A kibu ko wuka a no ma ki̱le. N Kwama a du nimi̱n di̱si̱n di̱du a dokaku ni̱bangu n ti ki̱nangu.

20Di̱ne yiko, n chi̱ni Bi̱yori̱m Yesu Masiya, a tiwe yinangu n Kwama n ki̱fwan ki̱fwa ya̱mu a di̱chi̱niye. Ni̱n wana chi̱nu we di̱n Masiyanu, ti̱do bwi n ti Kwama ti̱kau fati̱bu ki̱m n ke bi̱bu ki̱kwila chi n ti ki̱ni̱m. 21N Masiya a manbi̱ ki̱le we, aya di̱ne chiniye n Kwama a mar ki̱n yinang naba ki̱le. We yiko, ke ni kau ni̱bu yilem we di̱Kwama a di̱Masiya.

Currently Selected:

2 Koronti 5: Tula

Highlight

Copy

Compare