2 Koronti 6
6
1We nanga chirengu n ti Kwamangu, ni̱n wana chi̱nu n ti̱n bi̱bu ta ya li̱me Kwamamu, ti̱yo a kadu chi ti̱kusi we 2Ti̱nwe chitu n Kwama a fwaatu,
“Yo ki̱swi mang yungi̱n chi̱n li̱me a lame,
n nwe chi̱n.
Yo di yuke lame n maka chi̱n.”
Ti̱nwe! Wu nang ki̱swi ta yin li̱me Kwama di wu nang di wu ta yaan yuke.
3Nang babu wuka ni ka ya ni̱nu ki̱ni ki̱le we nangangu. Di̱ne yiko nang yo wuka mi̱nbu chi yarki we wa̱re. 4We yiko, chi ni̱n maditi kwang, ni̱n madu di̱ne ke ni̱n yung ko, n ni̱n ni̱bu nangang Kwamang. Ni̱n madu yiko ki̱ni runni, n ti riye n ti nwe riye nabwen n ti ti̱kumeni.
5Ni̱bu a ngau ni̱n, a di̱ki̱ ni̱n ti̱n a di̱bi̱nti̱le, ni̱bu a nwe ni̱mi̱n burang di̱ne kulangkulange a kunne, ni̱n ma nangangu a la dukan ni̱nangu, nang dabu duum a bwin kwalan chabte. 6Di̱ne ni̱tu ni̱ntu wa̱la̱k n ti swaanki̱ n ti bwanu n ti ki̱li̱mang nangu, ni̱n yungdu ko ni̱n ma Kwama mi̱n nanga ki̱ku a Fi̱ki̱m Kwamam, ki̱ni mi̱laku ki̱yilang. 7We di̱mwar di̱yili̱nu, n ti di̱kan Kwamanu. Yile ni̱n wu a kau yinang kusa n ti kul, nang tau a kan ki̱yilang ka a kantakwelange ni̱n soon yichireyu.
8Ni̱bu ki̱dela ni̱nu, ki̱turati̱n ni̱nnu, ki̱ni ni̱n dibwi, ki̱wana ni̱nnu. Ni̱n kau yinang ni̱bu ki̱mwe ti̱kwanim, kasi ki̱ku ni̱n fwa bi̱yili̱mangu. 9Ki̱madu yinangu ni̱bu a yim ni̱bang, aya a yin ni̱n yinang. Yinangu n ni̱n a fa̱li bwayang, aya n ni̱nni ki̱ni ti̱kuri. Ni̱n ya ti̱welantu, aya ni̱bu a chi̱n ni̱nbu.
10We kayan ni̱re, aya ni̱n ma ti̱mi̱lan we kwalantu ni̱n yo ni̱bu nabwen a ya kuli yinangu ni̱n ne chi we, aya ni̱n ki̱ni chiti kwang.
11Ni̱bu Korontom, ni̱n fwa chimi̱n bi̱yili̱mu, nang laibu chi̱n chi, ti̱nti̱ne ni̱n yung chi̱n, ni̱n mi̱la chi̱nu yinang. 12We yiko, n ni̱n n ke bi̱bu nang ko chini̱mu, n ti̱n ta yibu ni̱n bi̱bu we ni̱tu chi̱ntu. 13Mi̱n fwa yam bi̱bu n ti chi̱n yinangu Te ki̱fwa ya̱m n ti bwesi̱m ki̱mang, n ti̱n fal ti̱yungti̱ ni̱n mi̱laki̱ changu.
Se Kwama wu wauwade
14Ti̱chaki̱n yichiyu we ni̱bu bi̱bu a kebu bi̱yili̱m we Tewuduwe mu. Ke nii wu yile a me a swe li̱mangu n ti ni wu bwila? Ki̱liye ka swedu n ti yiiki̱ku yire? 15M Masiya ki̱ma fati̱n n ti Setana? Wureni ka kunka naba bunti̱ke n ti naba ki̱liye? 16Wureni ka yodu se Kwama n ti wu a di̱yore ka li̱made? N chi̱ni se Kwama wu kure yinangu n Kwama a fwa ko,
“Mang swedu n ti ni̱bu mi̱mu,
mang bwa̱lu we tibe chi,
Mang kau Kwama chi,
n chi ka kau ni̱bi mi̱m.”
17Di̱ne yiko, n Tewuduwe a fwa ko,
“Ti̱chir mi̱ne we di̱ chiye,
ti̱twaiyu chitu ka bwita chinitu we.
Wu nang ki̱swi mang keendu ki̱ni chi̱ne.
18Mang kau Te chi̱n,
n ti̱n ta kau bwesi̱m mi̱m bi̱bari̱m n ti bi̱wuti̱m.”
N Tewuduwe naba dukane kwang a fwa.
Currently Selected:
2 Koronti 6: Tula
Highlight
Copy
Compare
Share
Want to have your highlights saved across all your devices? Sign up or sign in
© 2015, The Nigeria Bible Translation Trust and Wycliffe Bible Translators, Inc. All rights reserved.
