1 Biti̱re 2
2
Ni̱bu Kwamami wauwadi̱m
1Di̱ne yiko, ti̱du ka ti̱ti̱le chi ti̱bwilaiye, n ti̱ ti̱kwanitu, n ti di̱bebelin, n ti kati̱ntu, n ti ka ti̱ti̱le ki̱duum ti̱turane. 2Yinang bwesi̱m ki̱lwim bi̱bu ki̱bau ka̱rku yaran, n ti̱n ti̱ bati̱ ya̱m Kwamami yiko, ke ti̱dwiyen yinu ta yati̱ yuku. 3“Ki̱kangu ta tu ta twai li̱me Tewuduwe.”
4Ti̱be bwa di̱Masiya, wu n ki̱n yinang kale ti̱kuriye, wu ni̱bu a ko, aya n Kwama a sutu ki̱n a ni ki̱n dwiyentu. 5N ti̱n, ti̱n ti̱kau yinang kali yikuri, yiyu ni̱bu ki̱ma nangangi ki̱n ke a mu duum kan Kwaman da Fi̱ki̱mi Wauwadi̱m. Finu tani̱n ma ki̱mi̱n nangangu yinang kwa̱l fanseti wauwadi. Ta ni̱n ma ki̱mi̱n niku ki̱tumang duum bi̱bu a Fi̱ki̱m n Kwama ki̱ baddi̱mu a di̱Yesu Masiya. 6Yinangu ya̱m Kwamamu a fwa ko,
“Da̱ng, n sutu kale wu a yile,
n yo a kau kale wu a fwiti̱ne we Siyona.
Wu a ke bi̱yili̱mu we kale we,
a ne nwe dibwi ko bayim.”
7N ti̱n bi̱bu ta ke ki̱ni ki̱ni̱mu, kale wu ki̱ni nangange we di̱ chi̱ne. Aya bi̱bu a kebu ki̱ni̱mu, yinangu a fwangu,
“Nang kale wu ni̱bu mukki̱mu a ko,
a kau kale wu a lachi ki̱ni nange.”
8Yinu n ki̱n,
“Kale wu ki̱yo ni̱bu ki̱ngau bewure we,
ti̱nti̱ne kwam wu ka bedu ki̱ni yare.”
N chi a ngau bewure di̱ne n chi a mabu kwa̱mbi̱r we ya̱m Kwamamu. Nang chi n Kwama a do di̱ne chiye.
9Aya n ti̱n bi̱suti̱ri̱m ni̱bu, n ti̱n kwa̱l fanseti bi̱u Mai Wuduwemu. N ti̱n kuu wu yi wawadu, ni̱bu Kwamam, wu a sutu chi̱n ke ti̱ma di̱mwar nangang Kwamang. N ki̱n a yal chi̱n we ki̱liye, ke ti̱ le yiiku kangu ka ya̱r yiiyangu. 10Yo ferediye, n ti̱n a no n ke ni̱bu Kwamam, aya ki̱ka̱ngu n ti̱n ni̱bu ki̱m, yo no ferediye n Kwama a nwebu ki̱bune chi̱n, aya ki̱ka̱ngu ti̱ya ki̱buneko.
N ti̱n ka̱bi Kwamai
11Kebu bi̱bu mi̱n mi̱ladi̱m, mi̱n wana chi̱nu, n ti̱n ni̱bu kuum we ti̱ti̱nitu, n ti̱n ti̱ newe ki̱ni lo we fi, ti̱du kubeki̱ku a bwiyangu chi ki̱ma kati̱n n ti ni̱r chi̱ne. 12Ti̱kabi ki̱ni da wuyile we kuu ni̱bu bi̱bu a yimbu Kwamamu ke yo n chi ki̱mar ki̱mwa̱rang changu ko ti̱ma chi ti̱bwilai, di̱ne nangi̱n ti̱yili chi̱ntu n chi ki̱kuditu, n chi ka ki̱ladu kani̱n dela Kwama we Di ki̱lake ko.
13Di̱ne Tewuduwe, ti̱ma ka nang ti̱ti̱le mati̱ne mi̱n kwa̱mbi̱r wu ki̱ni dukan we ni̱be. Ti̱bunti̱ chi Mai wuduwe ki̱fwade, di̱ne ki̱n nang Mai wuduwe ki̱ni dukane, 14n ti Kwabnatiyu, bi̱bu n ki̱n a suti̱mu, ke a wela ni̱bu ki̱ma ki̱lemu a werti̱ bi̱bu ki̱ma chi a datu. 15Nang ki̱ke Kwama ka ti̱tum daati yiyiliye, ta yinge yiini ni̱biyu we ya̱mi yikusiyu a no dabu ni̱bu kani̱n fwaradu a dutu chinte a kwalan swaanke chi. 16Ti̱ma fiswe wu a ni̱bu a ya tuki̱m, ti̱kedu da ta ya a yodu ti̱ tundu bwila we, aya ti̱ ya yayu wu ka yungdu n ti̱n ka̱bi Kwamai. 17Ti̱ni ka wuwule niye dwiyentu, ti̱mi̱la bi̱kamu ni̱bu bunti̱ki̱m, ti̱nwe tayi Kwama, ti̱ni Mai wuduwe dwiyentu.
18N ti̱n ka̱biyu, ti̱ma tebu lo chimu mi̱n kwa̱mbi̱r ti̱ni chi dwiyentu kwang, n ke kana ni̱bu bi̱yili̱m bi̱bu ni̱ri bukki̱m, aya n ti bi̱bu ki̱ma chimi̱n muli̱ni̱mu. 19N Kwama ka dela chi̱nu we ti̱tu, ka ti̱mu ni̱ru we nwe riye yo ta mabu wuka ki̱lenge, di̱ne Ti̱ti we chi a ki̱ke Kwama. 20Aya ka ni̱bu a twalan a wuka ki̱le, kasi no m mu ni̱ri yire we ti̱tu a ne ki̱ti̱me we. Aya ka ti̱ma nangang ki̱yilange, yinu ti̱nwe riye we dur ki̱ne, ti̱ma bwanuwe, a le, n Kwama ka yo chimi̱n delaku. 21Nang chi n Kwama a yal mi̱ne chi̱ne, n Masiya a nwe riye ti̱n di̱ne chi̱ne. Nang tiyangu a du chimi̱n ko ti̱bunti̱ nani kiyu.
22“N ki̱n a manbu ki̱le we ko bayim,
a ne nii a nwe mi̱nti̱ ti̱kwani a yiko we.”
23Ki̱dangu ni̱bu a tu ki̱nangu, n ki̱n a yeebu. Ki̱dangu a nwe riyengu, a yibu ko ka yeedu. Aya n ki̱n a yo ni̱r ki̱nu a ka di̱Kwama, wu ki̱ma mwataki̱ ki̱yilange. 24N ki̱n ki̱fwan a da̱u ki̱leti chireyu we bwikiyu yo ni̱bu a kuka ki̱n a ki̱tiyang bwange. A ma yiko ke we bwako ke ni du ki̱leti chireyu ni kau ni̱bu yilem. We bunbi kitu ti̱ya beku. 25Feredi a no ti̱le we wa̱re yinang kwanti, aya ki̱ka̱ngu ti̱ki̱lawe bwa Naba Toke, wu ki̱to ti̱kuri chi̱ne.
Currently Selected:
1 Biti̱re 2: Tula
Highlight
Share
Compare
Copy
Want to have your highlights saved across all your devices? Sign up or sign in
© 2015, The Nigeria Bible Translation Trust and Wycliffe Bible Translators, Inc. All rights reserved.
