1 Biti̱re 1
1
Di̱siir
1M Biti̱r, fandu Yesu Masiya, m mwal bi̱suturi̱m ni̱bu Kwama mi̱n lwangi̱n di̱du, bi̱bu a ti̱ran ki̱ma fiswe wu a ni̱bu kuume we yaatiyu a Fontu, Ka̱latiya, Kafadokiya n ti Asiya a lanta Bitiniyamu. 2N ti̱n bi̱bu n Kwama Te a yim chi̱n a sutu chi̱n feredimu, Fi̱ki̱m ki̱mu a yo ti̱kau bi̱bi wauwadi̱m, ke ti̱ma Yesu Masiya mi̱n kwa̱mbi̱r ti̱ya nuraku we ki̱tum ki̱mu. Li̱me n ti li̱mangu a swe n ti chi̱ni di̱bi̱l.
Yo ni̱re wu yile
3Ni dela Kwama n ti Te Tewuduwe chire n Yesu Masiya di̱ne ne ki̱bune a ni chi̱ni ti̱kuri ti̱fwin we kunku Yesu Masiya we furangu. Ti̱tu a yo n chi̱ni ki̱ni yo ni̱re wuduwe. 4Yinu ni yo ni̱ru ke ni ya chi n Kwama a yo ni̱bu ki̱m mi̱ne, a yo chi̱n mi̱n a bwaditu, finu a ne twiyadu, a ne kayadu, ka ka surede. 5We keku bi̱yili̱mang changu, n ti̱n bi̱bu n Kwama ki̱to chi̱nu ki̱ni dukan ki̱nu ka lami̱nti̱n di yuke wu n ki̱n a do ka yung ki̱nu we di swang kute.
6Ti̱ma furi mwen we ti̱tu, kasi ki̱ku ki̱ka̱ngu we ki̱swi wu bayim ti̱ma furi ki̱liki̱lin di̱ne sweki̱ku ti̱yadu we mure dangtidangtiyangu. 7Ti̱tu ki̱fwedu di̱ne ke a yung yinangu keku bi̱yili̱mang changu a tiyangu. Kasi no si̱nariya, wu ka kayade, ni swedu a ki̱rang, keku bi̱yili̱mang changu yiko, wu a la si̱nariya, a mwintuwe ka ya sweki̱ku, ke a ya ruku. Yinu ta ya delaku n ti dwiyentu nabwen we di n Yesu Masiya ka fwadede. 8Ti̱mi̱la ki̱n, kasi ki̱ku ta kuunbu ki̱n wengu, ti̱ke bi̱yili̱mu we di̱ki̱ne, kasi ki̱ku ta kubu ki̱n ki̱ka̱ngu. Ti̱ri furu ki̱ni ti̱mi̱lantu nabwen n ti ti̱mi̱la ti̱tu a dwiyen ti̱tu a su ki̱nati̱ngi, 9di̱ne ti̱ yiu ki̱ti̱me chi̱n we keku bi̱yili̱mang changu nang yuku ti̱kuri chi̱ntu.
10We yuku ki̱ku fa̱kui a ta̱l ya̱m bi̱bu di̱ne ke chi swaan, yo n chi a fwa ya̱mu we li̱me wu n Kwama ka ni chi̱ne. 11N chi a bau ka yindu ka ti̱tu ka fwedi fere, n ti kangu ka fwendangu. Wu nang ki̱swi wu Fi̱ki̱m Masiyamu we di̱ chiye a no ki̱yung chidu, ki̱fwadu kangu m Masiya ka mu ni̱ru we nwe riyengu, n ki̱n ka ya dwiyen kite. 12N Kwama a kwa̱l chimi̱n ko, nangan chiyangu n ke di̱ne dutu chiye, aya di̱ne chi̱n. Ki̱ka̱ngu n chi a fwa ya̱m we ti̱tu chi ta tu ta nwe we Fa̱ku wu a fwa Ya̱m Bi̱li̱m we dukan Fi̱ki̱m bi̱bu a tume a bwa diye mu. Ti̱tu nang chitu kasi no ni̱bu ti̱tumbi̱rimu ki̱baddu ka swaane.
Da wauwade wu a ni̱bu bunti̱ki̱me
13We yiko, ti̱do ni̱tu chi̱ntu di̱ne nangangu, ti̱tau dutu chi̱ntu, yinu ti̱yo ni̱tu chi̱ntu we li̱me ka ni chi̱nu we di n Yesu Masiya ka fwadede. 14Ti̱kabi ki̱ni kwa̱mbi̱r we bunti̱ki̱ku yinang bwesi̱m Kwamam, ti̱kedu chi ti̱bwilatu ti̱baditu a kwel chimi̱nu ni̱tu we, yinang yo n ti̱n a no a ki̱liye. 15Aya ti̱kau ki̱ni wauwade we nangi̱n chi̱ntu kwang, yinang ki̱ku n Kwama wu a yal chi̱ne yi wauwade. 16Ya̱m Kwamamu a fwa ko, “Ti̱ma fiswe wu wauwade, di̱ne n mi̱ni wauwadu.”
17Ti̱ yal ki̱nu tiko Te, yo ti̱twa̱ba̱ buni we di̱Kwama, n Ki̱n wu we mwataku ni̱bangu a yungbu lakaku we nangi̱n ti̱tu n ka wure a mangitu. We yiko, ti̱ya yayu ki̱ni tayi Kwamai we ti̱ti̱nitu yinangu chi̱n ni̱bu kuum. 18Di̱ne ta yim n Kwama a tu chi̱n we dati yikusi yiyu tukebu chimu a du chimi̱niyu, a tubu chi̱n ki̱ni chitu ki̱kayadu kayane, yinang asurfa ka si̱nariya, 19Aya a tu chi̱n ki̱ni ki̱tum bi̱bu a ma kwa̱ti̱ri̱m bi̱u Masiya, wu yinang be kwane niku ki̱tumang, di̱du a ne der we ko bayimi̱n. 20N ki̱n nang wu Kwama a sutu yo a tibu yo ti̱ti̱niye, aya we diti swan kuteyu n ki̱n ka fwadedu di̱ne chi̱ne. 21A di̱ki̱ne n ti̱n ti̱ke bi̱yili̱mu we di̱Kwama, wu a kuku ki̱n we fure, a ni ki̱n dwiyentu, di̱ne ti̱te keku bi̱yili̱mang changu n ti yo ni̱re a di̱Kwama.
22Ki̱ka̱ngu yo ta kabi wa̱la̱k we kwa̱mbi̱r chi̱nu ki̱ku a bunti̱ku bi̱yili̱m mangu ke ti̱yung kebi̱bu ne mi̱laku changu, ti̱mi̱la yichiyu yinang we ni̱tu chi̱ntu. 23Di̱ne ta ya bi̱be wu fwiye, n ke ti̱kuri ti̱tu ka ridu riye, aya ti̱tu ki̱diya kwadi. A di̱kwa̱l Kwaman di̱du ki̱ni ti̱kuri yinu di̱kwa̱l di̱du ki̱diya kwade. 24Yinangu ya̱m Kwamamu a fwa ko,
“Ni̱bi kwang yinang swa̱ku,
leran chitu yinang fili̱n swa̱ki̱n.
Swa̱ki̱ku ki̱wurmadu yinu fili̱ntu ki̱twakati̱nu,
25aya ya̱m Tewuduwe mu we ki̱diya kwadu.”
Ya̱m bi̱bu nang ya̱m bi̱li̱mu a fwa chimi̱n a di̱mwar ki̱ni̱mu.
Currently Selected:
1 Biti̱re 1: Tula
Highlight
Copy
Compare
Share
Want to have your highlights saved across all your devices? Sign up or sign in
© 2015, The Nigeria Bible Translation Trust and Wycliffe Bible Translators, Inc. All rights reserved.
