1 Yowana 4
4
Fi̱ki̱m Kwamamu n ti fi̱ki̱m ti̱kwanimu
1N ti̱n bi̱bu mi̱n mi̱ladi̱mu, ti̱kedu ka nang wuwule niye we wu ka yidu ko n ki̱n ki̱ni Fi̱ki̱m Kwamame. Aya ti̱swa̱ka̱ fi̱ki̱mtiyi kwang ti̱da̱ng ka nang fi̱ki̱m bi̱bu a be a di̱Kwamame. Di̱ne fa̱kubu ti̱kwanimu nabwen a ti̱ran we ti̱ti̱nitu. 2Ta swaan ni ki̱ni fi̱ki̱m Kwamame ying, ka nang wuwule niye wu ki̱ma di̱mwaru ko Yesu Masiya a be ki̱ni di̱ten bwi niin, nang nii ki̱ni Fi̱ki̱mu a chire a di̱Kwamame, 3aya ka nang wuwule niye wu a ko Yesu ko a bebu ki̱ni di̱ten bwine, a yung fi̱ki̱m bi̱bu a di̱ki̱nemu a bebu a di̱Kwama. Fi̱ki̱m bi̱bu m bi̱u fakwarbu Masiyamu wu ta nwe ko ka bede. Ko no nang ki̱ka̱ngu, a tu a lewe ti̱ti̱nitu.
4Bwesi̱mi̱m, n ti̱n m bi̱u Kwama, ti̱chau ki̱la we fa̱kubu ti̱kwanimu, di̱ne Fi̱ki̱m Kwamamu we ni̱tu chi̱ntu, a la fi̱ki̱m bi̱bu a ni̱tu ni̱bu a ti̱ti̱nimu. 5Fa̱kubu ti̱kwanimu ki̱fwa chi a da bwiye di̱ne n chi m bi̱u ti̱ti̱ni, ti̱ti̱nitu ki̱nwe chidu di̱ne n chi ki̱fwa chi ti̱ti̱nitu ki̱badde. 6Aya chi̱ni m bi̱u Kwama, bi̱bu a yim Kwamamu ki̱nwe nidu, bi̱bu a yimbu Kwamamu a nwebu ni. Wu nang wa̱re ni swani̱n nii wu ki̱ni Fi̱ki̱m bi̱yili̱me n ti wu ki̱ni fi̱ki̱m ti̱kwanime.
N Kwama mi̱laku
7N ti̱n bi̱bu mi̱n mi̱ladi̱mu, ni mi̱la yichireyu di̱ne mi̱laki̱ku ki̱chiredu a di̱Kwama. Nii wu ki̱ma nangangu ki̱ni mi̱lake n ki̱n Bwe Kwama, a yim Kwama. 8Nii wu a newe ki̱ni mi̱lake, a yimbu Kwama ko bayim, di̱ne n Kwama mi̱laku. 9N Kwama a yung ni mi̱laki̱ki ying, a tume bweko n ki̱kune we ti̱ti̱nitu ke ni ya ti̱kuritu a di̱ki̱ne. 10Mi̱laki̱ki ying, ka nang chikiye, n chi̱ni n ke bi̱bu niyang mi̱la Kwamamu, n ki̱n nang wu a mi̱la niye, yo a tume bweko a kau niku ki̱tumang di̱ne ke a da̱u ki̱leti chireye.
11N ti̱n bi̱bu mi̱n mi̱ladi̱mu, yo n Kwama a tu a mi̱la niye, a yung a dakan n chi̱ni ni mi̱lati̱ yichireyu. 12A ne ni a kuun Kwamawe ko bayim, aya ka ni mi̱la yichireye, a yung n Kwama we ware n ti chi̱ni, mi̱laki̱ kangu we di̱chi̱niye yi di̱mbi̱ri̱m.
13Nang ki̱swi ni yimi̱nu n chi̱ni a di̱ki̱ne, yinu n ki̱n ti̱n we di̱chi̱niye, di̱ne Fi̱ki̱m a ni chini̱mu. 14Ni̱n ku, ni̱n mwa ti̱nu ko Te a tume bweko, di̱ne ke a yu ti̱ti̱nitu. 15Ka nang wuwule niye wu a wudu yiiko a ke ko Yesu Bwe Kwama n we ti Kwama, yinu Kwama wetuwe n ti Ki̱n. 16Di̱ne yiko, n chi̱ni nifwan ni yim, ni keti̱ bi̱yili̱mu we mi̱laki̱ku n Kwama ki̱ma nimi̱nangu. N Kwama mi̱laku, nii ki̱mi̱la ni̱be n we ware n ti Kwama, n Kwama we ware n ti ki̱n. 17Mi̱laki̱kangi di̱mbi̱ri̱m we di̱chi̱niye, ke ni kadu tabu we di n Kwama ka mwata ni̱bu mi̱nde, di̱ne we ti̱ti̱nitu n chi̱ni tiyang ki̱n. 18Ka ni mi̱la Kwama, a ne tayi we, di̱ne mi̱laki̱ki di̱mbi̱ri̱mangu ki̱kaka tayu. Tayu ki̱yo riye. Ti̱tu a yung ni wu ki̱ni taye, mi̱laki̱ kangu a newe di̱mbi̱ri̱m.
19Ni ma mi̱laki̱ku di̱ne n Kwama a mwe a mi̱la chi̱ni. 20Aya ka wuka nii a yi ko, a ki̱n mi̱la Kwama, yinu ki̱ko ke ko, nii wu ki̱mwe ti̱kwani, di̱ne nii wu a mi̱labu ke ko wu ki̱kude, a ne medu kami̱la Kwama wu n ki̱n a kuunbuwe. 21M Masiya a ni chi̱ni yilangu ko, ka nang wuwule niye wu ki̱mi̱la Kwama, a mwintuwe ka mi̱la ke ko ti̱nti̱n.
Currently Selected:
1 Yowana 4: Tula
Highlight
Copy
Compare
Share
Want to have your highlights saved across all your devices? Sign up or sign in
© 2015, The Nigeria Bible Translation Trust and Wycliffe Bible Translators, Inc. All rights reserved.
