1 Yowana 3

Bwesi̱m Kwamam

1Ti̱da̱ng yinangu n Te a mwan a mi̱la chiniyangu, ki̱yalti̱ chi̱ni ko bwesi̱m Kwamam, bi̱yili̱m n chi̱ni bwesi̱m ki̱m. Ni̱bu ti̱ti̱nimu a yimbu ko n chi̱ni ni kau bwesi̱m Kwamam, di̱ne n chi a yimbu Kwama. 2N ti̱n bi̱bu mi̱n mi̱ladi̱mu, ki̱ka̱ngu ni kau bwesi̱m Kwamam, ti̱nti̱ne a yungbu chitu ni kaditu we bwa kake. Aya ni yim ka n Yesu a ki̱lawenge, ni kadu yinang ki̱n. Ni ku ti̱n Yesu yinangu wemi̱nangu. 3Ka nang wuwule niye wu ki̱ni yo ni̱re we di̱Masiyange, ka do ni̱r ki̱ni si̱k ke ki̱kau yinang ki̱n, di̱ne n ki̱ni si̱k.

4Ka nang wuwule niye wu ki̱ma ki̱lenge, ki̱ki yilang Kwamang. Kiku yilang Kwamangu nang ki̱le. 5Aya ti̱yim ko n Yesu a be di̱ne ke da̱u ki̱leti chireyu. Ti̱nti̱ne a ne ki̱le we di̱ki̱ne. 6Di̱ne yiko, nii wu ki̱swedu a di̱Masiya a chabu kakku ki̱ni ki̱le. Ka nang wuwule niye wu a chakakku ki̱ni ki̱lenge, a kuunbu Yesu we, a yimi̱nti̱bu ki̱n we.

7Bwesi̱mi̱m, wuka nii a buti̱du chi̱n we. Ka nang wuwule niye wu ki̱tum bi̱yili̱me, nang naba yile, yinangu m Masiya naba yilengu. 8We tile bi̱rke, n Setan naba ki̱letiye. Di̱ne yiko, wu ka chakakku ki̱ni ki̱letiye, ki̱bunti̱ Setan. Chi a yo Bwe Kwama a be ti̱ti̱niye, di̱ne ke ki̱kai nangang Setanangu.

9Ka nang wuwule niye wu a kau Bwe Kwama, a chabu kakku ki̱ni ki̱letiyu, di̱ne ti̱kuri Kwama ti̱fwi ti̱tu a di̱ki̱netu. N Kwama nang Techi, di̱ne yiko n ki̱n a ne chakakku kani̱n ma ki̱letiyu. 10Ni swaan bi̱bu n bi̱u Kwamamu n ti bi̱bu n bi̱u Setan mi ying. Ka nang wuwule niye wu a tumbu yile, n ki̱n n ke wu Kwama. Ti̱nti̱n wu a mi̱labu keko, n ki̱n n ke wu Kwama.

Ti̱mi̱la yichiyu

11Bi̱bu nang ya̱mu ta nwe we tile bi̱rki̱mu, ni mi̱la yichireyu. 12Ti̱kadu we yinang Kayinu wu a kau wu Setane, a chi̱u ke ko. Wureni a yo a chi̱u keko? A chi̱u di̱ne nangi̱n kitu ti̱bwilai aya ti̱kekontu ti̱yili. 13Kebu mi̱m, a yar chi̱nu yii we, ka ti̱ti̱nitu ki̱ko chi̱ne.

14Di̱ne n chi̱ni bi̱bu niyang mi̱la kebi̱be, ni tu ni chir we bwa, ni ya ti̱kuri di̱ne mi̱laku kebu chi̱reme. Nii wu a mi̱labu kebi̱be a tau ware bwa. 15Ka nang wuwule niiye wu a ko ke ko, a kau naba chiku durange. N ti̱n ti̱yim a ne ni ki̱chi̱be dutu ka ya ti̱kuri ki̱diya kwadite we.

16Ni yim yinangu mi̱laki̱ku we mi̱nangi ying, n Yesu a ni ti̱kuri kitu di̱ne chi̱ni. A le n chi̱ni ni ni ti̱kuri chi̱retu di̱ne kebu chi̱remu. 17Ka wuka nii wu ki̱ni chiye a ku keko a kwalan, yinu a ko yinangu ka makadange, ke ni ya mi̱laki̱ Kwama we di̱ki̱na?

18Bwesi̱mi̱m, ti̱yungdu mi̱laku changu we kana fwaku yiiyang, aya ti̱yung mi̱laku changu a maku nangang n ti bi̱yili̱m. 19Di̱ne mi̱laku yichireyangu ni yim n chi̱ni ki̱ni bi̱yili̱m. Ti̱nti̱ne ni medu ni tidu we kakku Kwamangu a ne tayu we. 20Ka ni̱r chi̱renu a yung n chi̱ni ki̱ni ki̱le, n Kwama a la ni̱r chi̱renu, n ki̱n a yim ka ti̱ti̱le chiye.

21N ti̱n bi̱bu mi̱n mi̱ladi̱mu, ka ni̱r chi̱renu a yungbu ko chi̱ni ni̱bu ki̱letime, n chi̱ni ki̱ni runi wu ni medu ni tidu a kakku Kwamange. 22Chi ni baddu a di̱ki̱ne kwang ni yadu, di̱ne ni bunti̱ yili̱n kitu. Ni mati̱ chi ka li̱ma ki̱n ni̱ritu.

23Chi n ki̱n a fwa ko ni matu n nang ti̱tu: Ni ke bi̱yili̱mu we Bweko n Yesu Masiya. Ni mi̱lati̱ yi chireyu yinangu n Masiya a fwa nimi̱nangu. 24Bi̱bu ki̱bunti̱ yili̱n kiti̱mu nang bi̱bu ki̱kunkadu ware n ti ki̱ni̱mu. N ki̱n we ware n ti chi. Ni yim ki̱n we ware n ti chi̱ni di̱ne Fi̱ki̱m ki̱mu we ware n ti chi̱ni.

Currently Selected:

1 Yowana 3: Tula

Highlight

Copy

Compare