1 Yowana 5

Wa̱re ni chan ki̱la we ti̱ti̱niye

1Ka nang wuwule niye wu a ke bi̱yili̱mu ko n Yesu nang Masiya, n ki̱n nang Bwe Kwama, yinang nii wu a mi̱la te bwe a mi̱lati̱ bweko. 2Nang tiyangu ni yimi̱nu ko ni mi̱la bwesi̱m Kwamamu di̱ne niya mi̱la Kwama yinu ni bunti̱ yili̱n kite. 3Ti̱tu nang mi̱laki̱ chirengu we di̱Kwama, ni bunti̱ chi n Kwama ki̱badde, ti̱nti̱ne yili̱n kitu a mabu bwar. 4Di̱ne ka nang wuwule nii wu a kau bwe Kwama ki̱ni da ka chau ki̱la we ti̱ti̱nitu. Keku bi̱yili̱m chirengu we di̱Masiya nang chi ki̱ni chi̱ni chakku ki̱late. 5Ti̱nti̱ne n wure ka medu ka chau ki̱la ki̱ni ti̱ti̱nite? Kana nii wu a ke bi̱yili̱mu ko n Yesu Bwe Kwama.

N Yesu n wure

6N Yesu Masiya nang wu n Kwama a wudu ni̱bu mi̱n ko wu nang Bweko, we yo n ki̱n a ma batisma ki̱ni mwe n ti yo a kur ki̱tuumu a ki̱tiyang bwange. A wudu ni mi̱nbu ki̱ni kana mwe, aya mwe n ti ki̱tuum. Fi̱ki̱m ki̱yung nidu ko ya̱m bi̱bu bi̱yili̱m, di̱ne fi̱ki̱mu bi̱yili̱me. 7Ti̱nti chi yittayu ki̱ma di̱mwaru ko n Yesu Bwe Kwama. 8Nang Fi̱ki̱m Kwamamu, batisma wa mwe, n ti ki̱tuum bi̱bu a kur di̱ne chini̱mu, ti̱nti chiyi yittayu ki̱fwa ka chi wiine.

9Yo ni̱bu a fwa chi n chi a kuwe ni̱n ke ki̱n, aya chi n Kwama a fwa a lachi ni̱bu a fwa, yinu n ki̱n nang wu a fwa ya̱m a dur Bwekone. 10Wu a ke bi̱yili̱mu we Bwe Kwama, a yim we ni̱r ki̱nu di̱mwar di̱du di̱yili̱n. Aya wu a kebu bi̱yili̱mu we di̱Kwama, a mar Kwama naba ti̱kwaniye, yo n ki̱n a ko chi n Kwama a fwa we dur Bwekone. 11We chi n Kwama a fwa a dur Bwekotu, n ki̱n a ni chi̱ni ti̱kuri ki̱diya kwaditu, ti̱kuri ti̱tu a be a Bwekotu. 12Ka nang wuwule niye wu ki̱ni Bwe Kwama ki̱ni ti̱kuri, aya wu a ne Bwe Kwama we, a ne we ki̱ni ti̱kuri.

Yaku ti̱kuri ki̱diya kwadi

13N ti̱n bi̱bu ta ke bi̱yili̱m a Bwe Kwamamu, m mwal chimi̱n ya̱m bi̱bi kwang ke ti̱yim tiko n ti̱n ki̱ni ti̱kuri ki̱diya kwaditu. 14N chi̱ni ki̱ni runi ni tidu we kakku kangu di̱ne ni yim ki̱nwe nide yo ni bi̱u ki̱n chite we ki̱keko. 15Yo ni yim ki̱nwe nide kasi no ni bi̱u ka ti̱ti̱le chiye, a yung ni yim n chi̱ni ni ya ka ti̱ti̱le chiye ti̱tu niyang bi̱u ki̱netu.

16Ka wuka nii a ku ke ko naba bunti̱ke ki̱ma ki̱le wu a ne da̱u ti̱kuri kiye, a twa̱ba̱ki̱ mi̱n buni, di̱ne twa̱ba̱bune nii we n Kwama ka ni ki̱n ti̱kuri. Aya ka a ma ki̱le wu ka yo ki̱nu ka bwadi ki̱ne, mang yibu mi ti̱twa̱ba̱ ki̱mi̱n buni. 17Chi ni a ma a lebiti kwang ki̱le, aya yikayu ki̱leti n ke yiyu nii ka bwadi ki̱ni.

18Ni yim bwe Kwama a chabu kakku ki̱ni ki̱letiyu, di̱ne Bwe Kwama ki̱so ki̱nu ko ke n Setan a twaiyu ki̱nuwe.

19Ni yim n chi̱ni bwesi̱m Kwamam, aya ti̱ti̱niti kwang a fa̱la̱ng Setanang.

20Ni yim Bwe Kwama a be ti̱ti̱nitu, a wudu chi̱ni mi̱n ki̱kwa̱me ke ni yim Kwama wu yile. Ki̱ka̱ngu n chi̱ni we di̱ki̱ne, n ki̱n wu yile, we Bweko n Yesu Masiya. N ki̱n nang Kwama wu yile n ki̱kun. N ki̱n nang wu ki̱ni ti̱kuri ki̱diya kwadite. 21Bwesi̱m, mi̱n fwa chimi̱nu ti̱so yichiyu di̱ne ke di̱yoru a mulchinu we wa̱re Kwama.

Currently Selected:

1 Yowana 5: Tula

Highlight

Copy

Compare