আছমানি কিতাব: সুলাইমানি ছিল্লেখ 27
27
1আগামি কাইলকুর বেয়াপারে, বড়াই করিও না,
কুনদিন কিতা অইতো পারে, তুমি তো জানো না।
2নিজর তারিফ করিও না, করউক দুছরা মুখে,
অইন্যে তুমার গুনগান গাউক, গাইও না নিজর ঠোটে।
3পাথরর উজন বউত বেশি, বালুর ভারও বেশি,
আম্মকর খুচা আরো ভারি, অউ দুইওতা থাকি।
4রাগ অইলো বড় পাষান, গুছা অইলো বইন্যা,
ইংসার ছামনে কেগু পারে, রইযিতো উবাইয়া?
5দিলর মাজে মায়া-মহব্বত, গোপন রাখা থাকি,
আরো ভালা দুষ দেখাইয়া, কইলে ছামনা-ছামনি।
6দুস্তর দেওয়া আঘাতরে, বিশ্বাস করা যায়,
দুশমনর বেশি পিরিতি, ভালা কিচ্ছু নায়॥
7তিত্বা খানিও মিঠা লাগে, পেটর ভুক লাগলে,
মউরেও মানষে এলা করে, পেট ভরা থাকলে।
8খুপ থাকি গেলেগি পাখি, নিরাপদ নায় যেলা,
বাড়ি থাকি দুরই যায় যে, তার হালতও অলা।
9আতর-আগরর ঘেরানে, মন খুশ অয় যেলা,
আসল দুস্তর পরামিশও, মিঠা লাগে অলা।
10তুমার নিজর বন্ধু যে, তারে না ছাড়িও,
তুমার বাফর দুস্তরেও, হরাইয়া না দিও;
মছিবত-নিদানর কালো, পড়িলে বিপদো,
হউ সময় যাইও না তো, তুমার ভাইর ঘরো;
বউত দুরই বসত কররা, আপন ভাই থাকিয়া,
তুমার লাগা আরি-ফরি, তারা আরো ভালা॥
11গিয়ানি যুদি অও মোর পুত, আমি গৌরব করমু,
যারা গাইতো আমার গিবত, উচিত জুয়াপ দিমু।
12আখলদারে বিপদ দেখলে, নিজরে লুকায়,
বেআখলে ছামনে গিয়া, এমনে সাজা পায়।
13অচিন জনর জামিনদারর, লেবাছ খুলি নেও,
ভিন-দেশির জামিনদাররেউ, বন্ধক রাখি দেও।
14বউত বিয়ানে চিল্লাইয়া যে, ছালাম দেয় বন্ধুরে,
তার ই ছালাম গইন্য অইবো, অভিশাপ হিসাবে।
15বারিষা মাসো মেঘর ফুটা, পড়াত থাকে যেলা,
হামেশা ঘেন-ঘেনানি করে, কাইজ্জাখুর বউ অলা;
16তাইরে থামাইতো চায় যে, হে বাতাসরে থামায়,
তার আতো তেল মাখিয়া হারি, কুন্তা ধরতো চায়॥
17লুয়াদি পিটিয়া লুয়ারে, ধার দেওয়া অয় যেলা,
একে-অইন্যর জিন্দেগিরে, গড়িয়া দেয় অলা।
18ডুমুর গাছরে যতন করলে, ডুমুর খাওয়া যায়,
মালিকরে যে খেজমত করে, হে তো সম্মান পায়।
19পানির মাজে নিজর মুখ, দেখা যায় যেলা,
দিলর খাইছলতে বুজায়, খাটি মানুষ কি না।
20কয়বর আর পাতালর পেট, ভরে না তো যেলা,
কুনুদিনউ তুষ্ট অয় না, মানষর চউখও অলা।
21সোনা-রুপা যাচাইর লাগি, আছে আগুনির চুলা,
সুনামর মাজে দিয়া তো, মানষরে যায় চিনা।
22বেআখলরে চাউলর লাখান, ঘাইল-ছিয়াত কুটিলে,
কুনুমন্তেউ তার বেআখলি, ঠিক অইতো নায়রে।
23তুমার নিজর মেড়ার পালর, খবরা-খবর রাখো,
নিজর গরু-ছাগলর যতন, খিয়াল করি করো,
24ধন-দৌলত জমি-মাটি, চিরকাল রয় না তো,
মাথার মুকুটও চিরকাল, মৌরসি অয় না তো।
25খের হরানির বাদে যেলা, নয়া ঘাস জনম অয়,
পাহাড়-পর্বত থাকি অলা, ঘাস কাটি আনা অয়,
26মেড়ার বাইচ্চার লুমায় অয়, তুমার কাপড় তৈরি,
জমি কিনার টেকার যুগান, মিলে ছাগল বেচি।
27বকরির দুধ বেশি খাইয়া, পরিবার রয় ভালা,
তুমার ঘরর গুলাম-বান্দি, দুধ খাইয়া রয় তাজা॥
Currently Selected:
আছমানি কিতাব: সুলাইমানি ছিল্লেখ 27: sylB
Highlight
Copy
Compare
Share
Want to have your highlights saved across all your devices? Sign up or sign in
© Ahle Kitab Society. All rights reserved.
