আছমানি কিতাব: সুলাইমানি ছিল্লেখ 28
28
1কেউ না খেদাইলেও বাগে নাফরমান,
পরেজগারর সাওস তো সিংহর লাখান।
2দেশো গৃহযুদ্ধ লাগলে বেশি রাজা বনে,
গিয়ানি রাজায় দেশো শান্তি ফিরাই আনে।
3এক গরিবে জুলুম করলে আরক গরিবরে,
বইন্যার পানির মত হে ফসলরে নাশ করে।
4আল্লার হুকুম না মানলে নাফরমানর তারিফ করে,
তান হুকুম মানলে নাফরমানর লগে জিহাদ করে।
5নাফরমানে বুজে না হক-বিচার কিতা,
মাবুদর আশিক বন্দায় বুজে হকলতা।
6অসত ধনি থাকিয়া,
সত গরিবউ ভালা।
7গিয়ানি পুতে আল্লার শরিয়ত মানে,
পেটুয়ার দুস্তে বাফর বেইজ্জতি আনে।
8সুদখুরে সুদ খাইয়া আরো বেশি ধনি বনিলে,
তার লাগিউ থয় ইতা বিলাইবো যে গরিবরে।
9আল্লার হুকুম হুনিয়াও যে না হুনে,
তার দোয়াও তান গেছে নফরতি বনে।
10হক জনরে যে টানিয়া নেয় কু-পথো,
তার নিজর গাতো হে নিজে পড়িবো,
নি-অপরাধি জনর ভালাই অইবো।
11ধনিয়ে নিজর চউখে গিয়ানি দেখায় তারে,
বুদ্ধিমান গরিবে যাচাই করে অলান ধনিরে।
12পরেজগারে খেমতা পাইলে হকল খুশি অয়,
নাফরমানে খেমতা পাইলে মানুষ লুকাই রয়।
13নিজর গুনারে লুকায় যে উন্নতি নাই তার,
স্বীকার করি তৌবা করলে দয়া পায় আল্লার।
14মাবুদরে ডরায় যে হামেশা সুখি হে,
পাষান মনা জন পড়ে তো বিপদে।
15সিংহর হুংকার, ভাল্লুকর হামলা যেলা,
গরিবর লাগি নাফরমান রাজাও অলা।
16আখল ছাড়া রাজায় করে জুলুমবাজি,
যে রাজায় ঘুষ ঘিন্নায় পায় লাম্বা হায়াতি।
17মনর জালায় গাতো হারায় খুনি জনরে,
কেউ কুনু সাইয্য না করউক তারে।
18হক পথে চললে নিরাপদ,
বেকা পথে আখতা বিপদ।
19নিজর জমিনো খেত করলে পেট ভরি খায়,
অসারর খরে খরে দৌড়াইলে অভাবে পায়।
20হক-হালাল জনে বেশি বরকত পায়,
ধনি বনার পাগলে নিচ্চিত সাজা পায়।
21বিচারো পক্ষপাতি করা ভালা নায়,
গুনা করতো পারে থুড়া খানির দায়।
22লোভী-কিপটা জন ধনর দেওয়ানা,
অভাবে বার চার ইখান জানে না।
23দুছরা জনরে হেদায়তর বুলি দেয় যে,
চামচা থাকি বেশি দয়া হেশে পায় হে।
24মা-বাফর ধন চুরি করিয়া যেগিয়ে কয়, “গুনা না,”
বিনাশকারির লগে তার আছে তো ইয়ারানা।
25লোভী জনে কাইজ্জা লাগায়,
মাবুদর ভরসায় ভালাই আয়।
26নিজর উপরে ভরসা করে আম্মক,
গিয়ানর হেদায়তে রাখে নিরাপদ।
27গরিবরে দান করিলে কেউ, অভাব নাহি আয়,
গরিব দেখিয়া চউখ মুজিলে বেশি লান্নত পায়।
28নাফরমানে খেমতা পাইলে মানুষ লুকায়,
অতার পতন অইলে পরেজগার বাড়িযায়।
Currently Selected:
আছমানি কিতাব: সুলাইমানি ছিল্লেখ 28: sylB
Highlight
Copy
Compare
Share
Want to have your highlights saved across all your devices? Sign up or sign in
© Ahle Kitab Society. All rights reserved.
