আছমানি কিতাব: সুলাইমানি ছিল্লেখ 26
26
1শীতো মেঘ গরমো খুয়া, মানায় না যেলা,
আম্মক জনে ইজ্জত পাওয়া, মানায় না অলা।
2চড়া-দৈওলি পাখির পাল, উড়িয়া যায় যেলা,
খামোখা বদদোয়ায় গজব, লামে না তো অলা।
3ঘোড়ায় চাবুক গাধায় লাগাম, লাগাইলে যেলা,
আম্মকর পিঠিত গল্লার বাড়ি, পড়লে অয় অলা।
4আম্মকর আম্মকি হুনিয়া, জুয়াপ দিও না তুমি,
জুয়াপ দিলে তুমিও তো, অইলায় তার হমানি।
5আম্মকর আম্মকি বুজিয়া, জুয়াপ দিও তারে,
নাইলে হে চিন্তা করবো, গিয়ানি বনিগেছে।
6নিজর পাওত কুড়াল মারি, বিষ গিললে যেলা,
আম্মকরেদি খবর দিলে, তার দশাও অলা।
7লেংড়ায় তার লেংড়া পাওদি, আটিয়া যায় যেলা,
আম্মকর মুখো গিয়ানর বুলি, হুনলে লাগে অলা।
8গুলইলর মুখো পাথর পেচাই, থইলে অয় যেলা,
আম্মক জনরে ইজ্জত দিলে, বদলা মিলে অলা।
9নিশাখুর মাতালর আতো, গছা গাথলে যেলা,
আম্মকর মুখো গিয়ানর বুলি, হুনতে লাগে অলা।
10তীর-ধনুক আলায় হকলরে, জখম করে যেলা,
আম্মক বা মাতালরে নিয়া, কামো লাগাইলে অলা।
11কুকুরে বাইত করিয়া হারি, ফিরিয়া খায় যেলা,
আম্মকে বেআখলির কামো, ফিরিয়া যায় অলা।
12নিজরে নিজে গিয়ানি কয়, দেখছো নি জন অলা?
অগুর থাকি আম্মকর উপরে, আশা করা ভালা॥
13আলসিয়ায় মনে মনে কয়, “সিংহ আছে পথো,
রাইক্ষস সিংহয় ঘুরাঘুরি, করের পথর মুখো।”
14কবজার বলে ডাইনে-বাউয়ে, দুয়ার ঘুরে যেলা,
আলসিয়ায় তার বিছনাত হুতি, লড়ে-চড়ে অলা।
15আলসিয়ায় তার নিজর থালো, নিজর আত হারায়,
খানি তুলিয়া মুখো নিতে, তারে আলসিয়ে পায়।
16আখল খাটাই জুয়াপ দেইন, “অলা সাত জন থাকি,”
আলসিয়ায় কয় মনে মনে, “আমি আরো গিয়ানি॥”
17কুকুরর কান ধরি টানে, ইলাখান জন যেলা,
পরার মাইরো নাক গলাইয়া, পথেদি যাওরা অলা।
18কুনু পাগলে মারে যেলা, জালাইল তীর-আংরা,
19ঠগে গাউরে ঠগিয়া কয়, “ঢং করছি” অলা।
20লাকড়ি-দারু ফুড়াই গেলে, আগুইন যায় নিভিয়া,
বদনাম গাওরা না থাকলে, কাইজ্জা যায় মিটিয়া।
21জালাইল আংরাত দারু দিলে, আগুইন বাড়ে যেলা,
মাইর-কাইজ্জা লাগানির লাগি, কাইজ্জাখুরও অলা॥
22গিবত গাওরার কথা হুনতে, মজার খানির মত,
ইতা কথা হামায় গিয়া, মানষর দিলর ভিতরো।
23মাটির জিনিসরে রুপাদি, লেপলে লাগে যেলা,
খারাপিয়ে ভরা যার দিল, তার জবানও অলা।
24দুশমনে দুশমনি লুকাইয়া, মিঠা মাত মাতে,
ছল-চতুরিয়ে তার দিলরে, ভরিয়া তো রাখে।
25তার মাত মিঠা অইলেও, একিন না করিও,
বেজুইতা সাতটা নফরত, আছে তার দিলো।
26ছল-চতুরিদি নিজর ইংসা, নিজে লুকাই রাখে,
তার খারাপি জাইর অইবো, লোক-সমাজর মাজে॥
27গাত খুদে যেগুয়ে অউ গাতো, হে নিজেউ পড়ে,
গড়াইয়া ফালাইলে পাথর, নিজর উপরেউ পড়ে।
28বেইমানে চুরমার করে যারে, ঘিন্নাও করে তারে,
চামচামি কররার মুখে তো, বিনাশ ডাকিয়া আনে॥
Currently Selected:
আছমানি কিতাব: সুলাইমানি ছিল্লেখ 26: sylB
Highlight
Copy
Compare
Share
Want to have your highlights saved across all your devices? Sign up or sign in
© Ahle Kitab Society. All rights reserved.
