আছমানি কিতাব: সুলাইমানি ছিল্লেখ 23
23
নছিয়ত ৬
1বড়লোকর ঘরো খাইলে, চউখ মেলিয়া চাইও,
ছামনে কিতা দেওয়া অইছে, ভালা করি দেখিও,
2বেশি ভুক লাগিলে তুমার, সাবধান রইও তুমি,
রাইক্কুসি খানি খাইলে তো, গলাত দিবো ছুরি,
3তান দামি দামি খানি দেখি, লালচ না করিও,
দামি খানি কেনে দিছইন, মতলবখান বুজিও॥
নছিয়ত ৭
4ধন-ছামানা দলা করাত, পাগল না অইও,
দিলো থাকি অলা চিন্তা, হরাইয়া দিলাইও।
5ধনর বায় একবার চাইলে, দেখবায় ইতা নাই,
ডাখনা গজাই চিলর লাখান, বাতাসে উড়িয়া যায়॥
নছিয়ত ৮
6মনর মাজে কিপটামি যার, তার খানি না খাইও,
দামি খানি দিলেও হে, লালচ না করিও।
7হে তো খালি হিসাব করে, কত খরছ অর,
“খানি-পানি খাইলাও” কয়, ইচ্ছা নায় মনর।
8থুড়া যেতা খানি খাইছো, বাইত করি ফালাইবায়,
তুমার মুখর মিঠা মাতর, কুনু ফায়দাউ নায়॥
নছিয়ত ৯
9আম্মক জনর লগে তুমি, কুন্তা না মাতিও,
তুমার গিয়ানর বুলিরে হে, এলা তো করিবো॥
নছিয়ত ১০
10জমিনর পুরানা যে আইল, ইতা না হরাইও,
এতিমর জমি-মিরাসও, দখল না করিও,
11তারারে বাচাওরা জন তো, নিচ্চয় বলবান,
তাইন তুমার বিপক্ষে গিয়া, দিবা বদলা দান॥
নছিয়ত ১১
12তালিম-নছিয়ত হিকার লাগি, দিলরে নরম করো,
আখল-বুদ্ধির বুলিরে তুমি, কান পাতিয়া হুনো॥
নছিয়ত ১২
13হুরুতাইনরে শাসন করতে, এলা না করিও,
ছিংলা দিয়া মারলে তো, জানে না মরিবো,
14শাসন করলে ছিংলা দিয়া, অইবো উপকার,
রসাতলো যাওয়া থাকি, জান বাচবো তারার॥
নছিয়ত ১৩
15তুমার দিলো গিয়ান ভরলে, ওরে পুত আমার,
আমার দিলও খুশিয়ে ভরবো, সুখি অইবো অন্তর।
16হক মাতিলে তুমার ঠোটে, আমার মন তো খুশি,
হকল অংগ খুশি আমার, অয় হাছারর সুখি॥
নছিয়ত ১৪
17গুনাগারর লাখান তুমি, অইতায় না চাইও,
খালি মাবুদর ডর-খফে, হর-হামেশা চলিও,
18তেউগি তুমার ভবিষ্যতে, নিচ্চয় ভালাই আছে,
তুমার মনর আশা-ভরসা, যাইতো নায় বিফলে॥
নছিয়ত ১৫
19হুনো হুনো আমার পুত, তুমি গিয়ানি বনো,
তুমার দিলরে চালাও তুমি, হক পথে রাখো।
20বেশি বেশি মদ খাওরা, অতার লগে না যাইও,
বেশি গোস্ত খাওরা পেটুয়া, তারার দুস্ত না অইও।
21মাতাল-পেটুয়ায় ভুগে তো, হেশে গরিবি দশায়,
হর-হামেশার উংগানিয়ে, ফাড়া কাপড় ফিন্দায়॥
নছিয়ত ১৬
22জনম দেওরা বাফর হুকুম, খিয়াল করি হুনো,
তুমার মা বুড়া অইলেও, এলামি না করো।
23আসল হকরে খরিদ করো, কুনুমন্তে বেচিও না,
গিয়ান, শাসন, বিচার-বুদ্ধি, ইতারে ছাড়িও না।
24পরেজগার পুতর বাবা যেইন, এইন বড় খুশি অইন,
গিয়ানি পুতর জনম দেওরা, পুতর দায় সুখে রইন।
25তুমার আপন মা-বাফ যানু, সুখি রে সোনা,
যে মাইজিয়ে জনম দিছইন, তাইন খুশি অউক্কা॥
নছিয়ত ১৭
26আমার বায়দি খিয়াল করো, ওরে পুত আমার,
মোর পথো বওয়াল থাকউক, দুইও চউখ তুমার।
27ছিলান বেটি অইলো তো, গইন একটা গাড়া,
বদমাইশ বেটি অইলোগি, চিকন একটা কুয়া।
28অতা বেটিন উত পাতিয়া রইন, ডাকাইতর লাখান,
বেটাইন্তর সমাজো বাড়াইন, বেইমানর পরিমান॥
নছিয়ত ১৮
29হায়-হুতাশ আর আহাজারি, করে কুন জনে?
কাইজ্জা, নালিশ, মাইর খাইয়া, কার চউখ লাল বনে?
30মদ-শরাব গিলার নিশায়, দিন কাটায় যারা,
মদর মজা বুজার আশায়, ঘুরাঘুরি করে তারা।
31কড়া লাল শরাব অইলেও, তুমি ইবায় চাইও না,
চকচক করলেও গেলাসো, লামলেও গলাত সুজা।
32ইতায় বাদে কামড় মারবো, হাফর লাখান তুমারে,
বিষাক্ত হাফ কামড়ায় যেলা, অলাউ মারে মদে।
33তুমার চউখে দেখবায় তখন, নানান আউলা-জাউলা,
তুমার মনে কইবো খালি, উল্টা-পাল্টা কথা।
34দরিয়ার ঢেউত হুতি রইছো, বুজবো তুমার দিলে,
“মছতুলর উপর ঘুমাইয়ার,” বুজবায় মনে মনে।
35“তারা মোরে জখম করলেও, দুখ পাইছি না আমি,
মাইর খাইয়া টের না পাইলেও, হজাগ অইয়া মদ খুজি॥”
Currently Selected:
আছমানি কিতাব: সুলাইমানি ছিল্লেখ 23: sylB
Highlight
Copy
Compare
Share
Want to have your highlights saved across all your devices? Sign up or sign in
© Ahle Kitab Society. All rights reserved.
