আছমানি কিতাব: সুলাইমানি ছিল্লেখ 24
24
নছিয়ত ১৯
1নাফরমানর লাখান তুমি, অইতায় চাইও না,
তারার লগে রইবার আশা, মনো আনিও না।
2তারার দিলে চিন্তা করে, জুলুম করার ফন্দি,
তারার ঠোটে কয় তো খালি, বুরাই করার লাগি॥
নছিয়ত ২০
3গিয়ান খাটাইয়া ঘর বানায়, জগতর সব জনে,
আখল-বুদ্ধিয়ে বওয়াল রাখে, ইতা হকলতারে।
4হেকমত খাটাই হাজাইল অয়, ঘরর পুরা ভিতর,
দামি দামি মাল-ছামানায়, করা অয় সুন্দর॥
নছিয়ত ২১
5গিয়ানি জনর আছে নিচ্চয়, বউত বেশি খেমতা,
গিয়ান-বুদ্ধিয়ে বাড়ায় তাক্কত, পরমান দেয় অতা।
6লাড়াই-যুদ্ধত গেলে তুমি, সু-পরামিশ লাগে,
পরামিশ দেওরা বউত অইলে, যুদ্ধর মাঠো জিতে॥
নছিয়ত ২২
7বেআখল মানষর লাগি গিয়ান, তার লাগালর বাইরে,
সমাজর মজলিছো মাতার, তার সাইধ্য নাইরে॥
নছিয়ত ২৩
8বদ কামর নিয়ত করিয়া, যেই জন ঘুরে-ফিরে,
কু-মতলবি কইয়া ডাকে, হকল মানষে তারে।
9আম্মকর মনর মতলবউ, অইলো গিয়া গুনা,
ঠাট্টা-মশকরা কররারে, হকলে করে ঘিন্না॥
নছিয়ত ২৪
10মছিবতর দিন আইছে করি, লেটি গেলে তুমি,
তাইলে তুমার শক্তি-সাওস, নাই তো তেমন বেশি॥
নছিয়ত ২৫
11মরনর রায় দেখলে তুমি, কুনু নির্দুষির উপরে,
মউতর ঘরো নেরগি যারে, জানে বাচাও তারে।
12কও যুদি, “জানতাম না তো, ই বেয়াপারে কুন্তা,”
দিলর উজন করইন যেইন, দেখইন না নি ইতা?
তুমার খিয়াল রাখইন যেইন, তাইন জানইন না নি?
আমল-নমা মাফিক ফল তো, সবরে দিবা না নি?
নছিয়ত ২৬
13মউ খাওয়া তো বউত ভালা, ওরে পুত আমার,
চাক ভাংগিয়া মউ খাইলে, মজা লাগবো তুমার।
14গিয়ানও অলা তুমার লাগি, জানিয়া রাখিও ইতা,
গিয়ান পাইলে ভবিষ্যত পাইবায়, ভাংতো নায় তো আশা॥
নছিয়ত ২৭
15নাফরমানে উত পাতিও না, পরেজগারর বাড়িতে,
বিনাশ করিও না কুনু দিন, তার বসত খানারে।
16সাতবার পড়লেও হিরবার উঠে, পরেজগার জন যে,
বিপদ আইলে নাফরমানে, উষ্টা খাইয়া পড়ে॥
নছিয়ত ২৮
17তুমার দুশমন লেটি গেলে, অইও না খুশি,
উষ্টা খাইলেও তুমার দিলে, না করউক ফুর্তি।
18আরনায় অতা দেখিয়া হারি, বেজার মাবুদে,
তান গুছারে হরাইলিবা, অগুর উপর থনে॥
নছিয়ত ২৯
19খবিছ মানুষ দেখলে তো, মন খারাপ করিও না,
নাফরমানর লাখান তুমি, অইতায় চাইও না।
20ভবিষ্যত তো আন্দাইর অয়, খবিছ-বজ্জাত জনর,
জিন্দেগি বাত্তি নিভি যায়, নাফরমান অকলর॥
নছিয়ত ৩০
21মাবুদরে ডরাইও রে পুত, বাদশারেও ডরাইও,
এরার দুশমনর লগে তুমি, ভাইয়াফি না করিও।
22আখতাউ তো ইতার উপরে, আজিবো মছিবত,
মাবুদ আর বাদশায় ঢালিবা, কে জানে কুন গজব?
গিয়ানির আরো নছিয়ত
23গিয়ানি গুনি জনে তো, অতা তালিম হিকায়,
বিচারো পক্ষপাত করা, মোটেউ ভালা নায়।
24দুষি জনরে যেগিয়ে কয়, “তুমি তো নির্দুষি,”
নানান জাতি নানান দেশো, তারে কয় “লান্নতি।”
25দুষিরে যারা “দুষি” কয়, তারার ভালাই নিচ্চয়,
রহম-বরকত তারা পায়, তারা তো সুখি অয়॥
26খুলা-মেলা সঠিক জুয়াপ, দিলে লাগে যেলা,
ঠোটর মাজে মায়া দিলে, মজা লাগে অলা।
27জমিন জুইত-জাইত করিয়া, ফল-ফসল ফলাও,
বাইরর কাম শেষ করিয়া, নিজর ঘর বানাও।
28আরি-ফরির বিরুদ্ধে তুমি, মিছা সাক্ষি দিও না,
তুমার মুখদি ছল-চতুরি, কুনুমন্তে করিও না।
29অলাখান মাত মাতিও না, “মোরে করছে যেতা,
আমিও তারে করমু অলা, দিলাইমু তার বদলা॥”
30আলসিয়ার খেতর গালাবায়, আছলাম আমি যাওয়াত,
বেআখলর আংগুর বাগানর, গেছলাম আমি কাছাত;
31আমি দেখলাম হকল জাগাত, গছায়-কাটায় ভরা,
ছুতরা গাছে গুরিছে জমি, ইটর ওয়াল ভাংগিয়া।
32অতা দেখার বাদে আমি, খিয়াল করি চাইলাম,
খিয়াল করায় হিকলাম আমি, নয়া আখল পাইলাম:
33আলসিয়ায় কয়, “আরো ঘুমাই, থুড়া সময় উংগাই,
থুড়া আরাম পাওয়ার লাগি, আত ভিতরে হারাই।”
34তে আখতাউ আইবো আকাল, চুরর লাখান করি,
অভাবও আইবো অউ লাখান, ডাকাইতর বেশ ধরি॥
Currently Selected:
আছমানি কিতাব: সুলাইমানি ছিল্লেখ 24: sylB
Highlight
Copy
Compare
Share
Want to have your highlights saved across all your devices? Sign up or sign in
© Ahle Kitab Society. All rights reserved.
