আছমানি কিতাব: সুলাইমানি ছিল্লেখ 19
19
1মিছা মাতরা আম্মক থাকিয়া,
হক পথে চলা গরিব ভালা।
2বুদ্ধি ছাড়া নাই শখর দাম,
ভুল অয় উড়া-তাড়ার কাম।
3নিজর বেআখলিউ নিজর পথর বাধা,
তা-ও মাবুদর উপরে হে দেখায় গুছা।
4ধন-দৌলতে বউত বন্ধু আনে,
গরিবিয়ে দুস্তরেও আলগ করে।
5মিছা সাক্ষির নিচ্চিত সাজা,
মিছা মাতরারও নাই রক্ষা।
6বড়লোকর দয়া চায় বউতে,
দানকারির দুস্ত অয় হকলে।
7গরিবর আপন ভাইয়েও তারে ঘিন্নায়,
দুস্ত অকলেও নিচ্চয় তারে ছাড়িয়া যায়,
তার কান্দন কেউরর কানো না হামায়।
8গিয়ান কামাই করে যে, নিজরে ভালা পায় হে,
হেফাজত করলে আখলরে, তারউ উন্নতি মিলে।
9মিছা সাক্ষির নিচ্চিত সাজা,
বিনাশ অইবো মিছা মাতরা।
10আম্মকর বিলাসিতা হাজে না,
গুলামরে রাজ-গদিত মানায় না।
11আখলদারর গুছা উঠে আস্তে-ধীরে,
অপমান না ধরলে তার সম্মান বাড়ে।
12বাদশার রাগ-গুছা সিংহর হুংকারর লাখান,
তান দয়া ঘাসরে তাজা করা খুয়ার লাখান।
13বেআখল পুত বাফর লাগি সর্বনাশা,
কাইজ্জাখুর বউ অবিরাম মেঘর ফুটা।
14বাফ থাকি পায় মৌরসি ধন-বাড়ি,
আখলদার বউ মিলে মাবুদ থাকি।
15আলসিয়ে গইন ঘুম আনে,
পেটর ভুকে কুড়িয়া মরে।
16হুকুম মানলে বাচে জীবন,
এলা করলে অইবো মরন।
17গরিবর বায় দয়া মাবুদরে করজো দেওয়া,
অউ দয়ার বদলাই তো মাবুদেউ তারে দিবা।
18সময় থাকতে শাসন করো তুমার পুতরে,
শাসন না করলে হে যাইবো বিনাশর পথে।
19বেশি গুছা যার সাজা অইবো তার,
লাই দিলে তারে করবো বার বার।
20পরামিশ হুনো শাসন মানো,
হেশে যানু গিয়ানি বনো।
21মানষে মনে মনে বউত স্বপ্ন দেখে,
মাবুদর মর্জি-মুনশাউ জারি থাকে।
22মানষে চায় মানষর দয়া-মায়া,
বেইমান থাকি গরিবউ ভালা।
23মাবুদর ডর-খফ জিন্দেগির পথে চালায়,
অতায় জিন্দেগিত আরাম-শান্তি মিলায়,
কুনু বিপদ-আপদে আর পাইতো নায়।
24আলসিয়ায় থালো আত হারায়,
হারাইয়া মুখো নিতে কষ্ট পায়।
25তামশাকারিরে মারলে সিধা অয় আখলদার,
বুদ্ধিমানরে ধামকি দিলে বুদ্ধি বাড়ে তার।
26বাফরে যেগিয়ে জুলুম করে মাʼরেও দেয় খেদাই,
মা-বাফর শরম-বেইজ্জতি আনে তো অউ পুয়ায়।
27ওরে পুত আমার নছিয়ত না হুনলে,
আখল ছাড়িয়া যাইবায়গি বে-পথে।
28মিছা সাক্ষিয়ে হক বিচাররে তামশা করে,
নাফরমানে তার মুখদি খারাপিরে গিলে।
29তামশাকারির লাগি সাজা আছে জুইত,
আম্মকর পিঠর লাগি রেডি আছে চাবুক।
Currently Selected:
আছমানি কিতাব: সুলাইমানি ছিল্লেখ 19: sylB
Highlight
Copy
Compare
Share
Want to have your highlights saved across all your devices? Sign up or sign in
© Ahle Kitab Society. All rights reserved.
