আছমানি কিতাব: সুলাইমানি ছিল্লেখ 20
20
1শরাবে বকা-জকা, মদে কাইজ্জা,
অতায় মাতাল বনলে গিয়ানি না।
2বাদশার গুছা তো সিংহর হুংকারর লাখান,
গুছা তুলাইলে তান বিপদো পড়ে জান।
3মাইর থাকি হরিয়া রয় ইজ্জতি,
কাইজ্জা লাগায় বেআখলে জলদি।
4আলসিয়ায় খেত না করে সময়মত,
ফসল কাটার সময় কুন্তাউ পায় না তো।
5পাতালর পানির মত মানষর মনর চিন্তা,
বুদ্ধিমান জনে পারে তুলিয়া আনতো ইতা।
6বউতে নিজেউ নিজর সাধুগিরি গায়,
আসল সাধু জনরে কে তুকাইয়া পায়?
7পরেজগার নিজে হক পথে চলে,
বাদে তার আওলাদও সুখে থাকে।
8বিচারর আসনো বাদশা যেবলা বইন,
তাইন চাইয়াউ হকল বদখুর খেদাইন।
9কে কইতো পারে, “আমার দিলরে পাক-ছাফ করছি,
আমার গুনা থাকি আমি পবিত্র অইছি”?
10লইতে এক মাপ, বেচতে আরক মাপ,
ইতা তো মাবুদর নজরো খারাপ।
11জুয়ানর চলা-ফিরাতউ যায় বুজা,
সঠিক-খাটি জিন্দেগি করে কি না।
12যে কান হুনে, যে চউখ দেখে
দুইওটাউ গড়ইন মাবুদে।
13বেশ ঘুমাইলে হকির বনে,
চউখ মেললে খানি মিলে।
14খরিদদারে কয়, “ইতা তো ভালা নায় বা,”
লইয়া হারলে নিজর তারিফ করি যায় গিয়া।
15আছে সোনা, মনি-মুক্তা বেশি,
গিয়ানর বুলি আরো বেশি দামি।
16অচিন জনর জামিনদারর চাদ্দর বন্ধক নেও,
ভিন-দেশির জামিনদাররেউ জামানত রাখো।
17ঠগিয়া আনা খানি খাইতে মজা পায়,
বাদে তো তার মুখ কাকড়ে ভরি যায়।
18পরামিশ করিয়া ছামনেদি আগুয়াও,
আখলরে খাটাইয়া লাড়াইত লাগাও।
19গিবত গাওরায় গোপন মন্ত্র রটাইলায়,
বেশ মাতরার লগে ভাইয়াফি ভালা নায়।
20নিজর মা-বাফরে অসম্মান করলে,
বাত্তি নিভিযিবো গইন আন্দাইরে।
21মৌরসি ধন জলদি জলদি পাইলিলে,
হেশে ইতাত রহম-বরকত না মিলে।
22“খেতি কররার বদলা লইতাম!” ইতা কইও না,
মাবুদর লাগি বার চাইও, তাইনউ বাচাইবা।
23ঠগাঠগির মাপ মাবুদে ঘিন্নাইন,
পাল্লা-পাথরর চুরি ভালা না পাইন।
24মাবুদে চালাইন মানষর পাওরে,
নিজর পথ তারা চিনবো কেমনে?
25আখতা করিউ মান্নত মানা বিপদ,
বাদে অউ মান্নতউ অইযায় আপদ।
26মাড়া দিয়া ফসলরে আলগাইন যেলা,
গিয়ানি রাজায় নাফরমান খেদাইন অলা।
27মানষর বিবেক তো মাবুদর বাত্তির মতন,
তুকাইয়া জাইর করে দিলো যেতা গোপন।
28হক-হালালি, দয়া-মায়ায় বাচায় বাদশারে,
দয়া-মায়ায় টিকাইয়া রাখে তান গদিরে।
29জুয়ানর বড়াই বল-শক্তি,
পাকনা চুলে বুড়া ইজ্জতি।
30মাইরর জখমে খারাপি ছাড়াইলায়,
দিলর ভিতর ছাফ করে মাইরর সাজায়।
Currently Selected:
আছমানি কিতাব: সুলাইমানি ছিল্লেখ 20: sylB
Highlight
Copy
Compare
Share
Want to have your highlights saved across all your devices? Sign up or sign in
© Ahle Kitab Society. All rights reserved.
