আছমানি কিতাব: সুলাইমানি ছিল্লেখ 18
18
1নিজ মতলবিয়ে একলা চলে,
বিবেক-বিচারর উল্টা আটে।
2ভালা বুজাইলে আম্মক বেজার,
দাম দেয় খালি হে নিজর কথার।
3বদ কামে আনে অসম্মান,
বেইজ্জতিয়ে আনে বদনাম।
4গইন পানি যেলা মুখর মাতও অলা,
ঝরনার ফুত যেলা গিয়ানর শুরু অলা।
5বিচারো পরেজগারর খেতির আশায়,
নাফরমানর পক্ষপাতি ভালা নায়।
6আম্মকর ঠোটে কাইজ্জারে ডাকে,
তার মুখেউ মাইর খাওয়ায় তারে।
7মুখর দায় আম্মক মরে,
ঠোটর দায় ফান্দো পড়ে।
8গিবত বুলি হুনতে মজা,
দিলর ভিতরে হামায় সুজা।
9নিজর কামো আলসিয়া যে,
শয়তানর ভাই বনে হে।
10মাবুদর নামউ মজবুত বাংকার,
দৌড়িয়া আশ্রয় পাইন পরেজগার।
11ধনির ধনউ তার মজবুত ঠিকানা,
হে মনে করে উচা বাউন্ডরি ইতা।
12অহংকারে পতন আনে,
নরম মনে ইজ্জতি বনে।
13হুনার আগে জুয়াপ দিলে,
আম্মকি আর শরম মিলে।
14মনর বলে বেমারিরে সাইয্য করে,
মন ভাংগিলে কুন জনে সইতো পারে?
15বুদ্ধিমানর দিলে বুদ্ধি কামায়,
গিয়ানির কানে বুদ্ধি তুকায়।
16উপহারর উছিলায় নানান পথ খুলে,
ইতায় আনে তারে দামি জনর ছামনে।
17মামলার পয়লা জবানবন্দিয়ে বুজা যায় হে-উ ঠিক,
উকিলে জেরার বাদে জানা যায় তো ঠিক না বেঠিক।
18লটারি মারিয়া ঝামেলা শেষ করা যায়,
বলআলা দুই পক্ষর মাজে সমাধান আয়।
19ভাইয়ে ভাইয়ে মাইর-কাইজ্জায় সম্পর্ক নষ্ট,
দেশ দখল থাকিউ কঠিন ঠিক করা ই সম্পর্ক।
20মুখর মাতে পেট ভরিলায়,
ঠোটর কথায় তুষ্ট অইযায়।
21জিফরার দায় জীবন-মরন,
যেলা মাতে অলাউ ফলন।
22বউ পাইলে ভালাই আয়,
মাবুদ থাকি দয়া পায়।
23গরিবে মিনতি করে দয়ার আশায়,
ধনিয়ে পাষান মনে জুয়াপ দিলায়।
24বেশি বন্ধু আছে যার তার অয় খেতি,
খাটি বন্ধু ভালা তো আপন ভাই থাকি।
Currently Selected:
আছমানি কিতাব: সুলাইমানি ছিল্লেখ 18: sylB
Highlight
Copy
Compare
Share
Want to have your highlights saved across all your devices? Sign up or sign in
© Ahle Kitab Society. All rights reserved.
