আছমানি কিতাব: সুলাইমানি ছিল্লেখ 12
12
1ইলিম ভালা পাইলে ভালা পায় শাসন,
ধামকিরে তো ঘিন্না করে বেআখল জন।
2হক মানষে মাবুদর রহম-বরকত পাইন,
কু-ফন্দি কররারে তো দুষি কইন তাইন।
3নাফরমানি করিয়া কেউ টিকে না,
পরেজগারর মুল শিকড় লড়ে না।
4গুনআলা বউ তাই জামাইর মাথার তাজ,
আড্ডিরে পচাইলায় যার বউ বে-লাজ।
5পরেজগারর চিন্তা হক-ইনছাফ,
নাফরমানর ছাল্লা দাগাবাজ।
6নাফরমানর বুলিত খুনর লাগি উত পাতা,
হক মানষর মুখর বুলিত জান বাচানির কথা।
7নাফরমান ধ্বংস অইলে বংশ টিকে না,
পরেজগারর বংশ জারি রয় হামেশা।
8গিয়ান আনমান তারিফ পায়,
ভেজালি মনে তুচ্ছ বানায়।
9ভাবে-সাবে নবাবজাদা অইলে ঘরো খানি নাই,
তার থাকি সাধারন জন ভালা যে কামলা খাটায়।
10পরেজগারে করে তার পশুরও যতন,
নাফরমানর মায়াও পাষানর মতন।
11নিজর জমিনো খেত করলে খানিয়ে পেট ভরে,
অসারর খরে খরে দৌড়ায় তো বেআখল জনে।
12খবিছর লুট-পাটর মাল চায় নাফরমান,
পরেজগারর চলা-ফিরা করে ফল দান।
13খবিছ নিজর ঠোটর ফান্দো পড়ে,
পরেজগার রেহাই পায় ইতা থনে।
14মুখর মাতে মানুষ লাভবান অয়,
আতর কামর ফল পাইবো নিচ্চয়।
15বেআখলর চউখো নিজর পথউ ভালা,
গিয়ানিয়ে কানো লয় পরামিশর কথা।
16বেআখলে মাইর খাইয়া হকলরে হুনায়,
আখলদারে মাইর খাইয়া নিরাই ঘরো যায়।
17হক মানষে হক মাতে,
মিছা সাক্ষিয়ে মিছা মাতে।
18বেপরোয়া মাত তলোয়ারর আঘাত,
শিফা মিলে তো গিয়ানির কথাত।
19জিফরার মিছা মাত রয় থুড়া সময়,
ঠোটর হক মাত হর-হামেশাউ রয়।
20ভেজাল লাগাওরার দিলো রয় শয়তানি,
শান্তির পরামিশ দেওরার দিলো ফুর্তি।
21পতন অয় না পরেজগারর,
ভরা ডুবি অয় নাফরমানর।
22মিছা মাতরার ঠোট মাবুদে ঘিন্নাইন,
হক-হালাল জনর উপরে খুশি তাইন।
23সাবধানি জনে আখল লুকায়,
পাতলা মানষে বের-বেরি গায়।
24পরিশ্রমি আতে খেমতা পায়,
অলস অইলে গুলামি করায়।
25দুশ্চিন্তায় মানষর মন ভার অইযায়,
ভালা কথায় দিলো সাওস বাড়ায়।
26পরেজগারে বন্ধুরে সু-পথ দেখায়,
নাফরমান নিজরে বে-পথি বানায়।
27শিকারর গোস্তও রান্দিতো না চায় আলসিয়া,
কামাইল ধনউ দামি মেনতি জনর লাগিয়া।
28পরেজগারির পথে জীবন,
অউ পথে নাই কুনু মরন।
Currently Selected:
আছমানি কিতাব: সুলাইমানি ছিল্লেখ 12: sylB
Highlight
Copy
Compare
Share
Want to have your highlights saved across all your devices? Sign up or sign in
© Ahle Kitab Society. All rights reserved.
