আছমানি কিতাব: সুলাইমানি ছিল্লেখ 11
11
1পাল্লাত ঠগিলে মাবুদে ঘিন্নাইন,
উচিত মাপ মাপিলে খুশি তাইন।
2গরিমায় বদনাম বাড়ায়,
নম্রতায় গিয়ান মিলায়।
3হক জনরে চালায় হক-হালালিয়ে,
বেইমানর অয় বিনাশ বেইমানিয়ে।
4গজবর আত থাকি বাচায় না ধনে,
পরেজগারিয়ে বাচায় মরন থনে।
5নিখুত জনর পথ সুজা করে পরেজগারিয়ে,
নাফরমান পড়ি যায় নিজর নাফরমানিয়ে।
6পরেজগারিয়ে হক মানষরে বাচায়,
বেইমান লোভর ফান্দো ধরা খায়।
7নাফরমান মরলে তার আশাও মরে,
খেমতাদি করা আশার বিনাশ ঘটে।
8পরেজগার মছিবত থাকি রেহাই পায়,
নাফরমানর উপরে অউ গর্দিশ বর্তায়।
9বেদীনর মুখে গাউরে নাটায়,
পরেজগার বাচে ইলিমর দায়।
10পরেজগারর ভালাইয়ে অয় টাউনো খুশি,
নাফরমানর পতনে অয় আনন্দ-ফুর্তি।
11টাউনর উন্নতি অয় হক মানষর দোয়ায়,
টাউন বিনাশ অয় নাফরমানর মুখর দায়।
12বেআক্কলে হেয় করে গাউরে,
আখলদারর মুখ নিরাই থাকে।
13গিবত গাওরায় গোপন কথা পাস করে,
হক-হালাল জনে রাখে ইতা অন্তরে।
14আ-রাখালি জাতির পতন অয়,
বুদ্ধি দেওরা বাড়িলে অয় জয়।
15পরার জামিনদার অইলে নিচ্চিত কষ্ট আয়,
জামিনদার না বনলে নিরাপদে রওয়া যায়।
16দয়ালু বেটিয়ে ইজ্জত কামায়,
পাষান মানষে দৌলত জমায়।
17দয়ালু মানষে নিজর ভালাই করে,
নিষ্ঠুর মানষে নিজর খেতি করে।
18নাফরমানর কামাইল দৌলত বেকামা যায়,
পরেজগারির বিচ লাগাওরায় সঠিক ফল পায়।
19খাটি দীনদারিত আছে জিন্দেগি,
খবিছে দৌড়ায় মরনর পথেদি।
20গোমরা দিল মাবুদর নফরতি,
নিখুত জিন্দেগিয়ে তাইন খুশি।
21বদ-খবিছ মানষে নিচ্চিত সাজা পাইবো,
পরেজগারর আওলাদর রেহাই মিলবো।
22শুয়রর নাকো সোনার ফুল যেলা,
বিবেক ছাড়া সুন্দরি বেটিও অলা।
23পরেজগারর ইচ্ছার ফল ভালা,
নাফরমানর আশার ফল সাজা।
24খুলা আতর দানে ধন আরো বাড়ে,
আড়-কিপটা কঞ্জুস অভাবো পড়ে।
25খুলা আতর দানে আয়-উন্নতি আনে,
পরার আশা মিটাইলে নিজর আশা ফলে।
26ফসল লুকাইলে মানষে দেয় লান্নত,
বাজারো বেচিলে মিলে রহম-বরকত।
27ভালাই খুজিলে ভালাই পায়,
খারাপি খুজিলে খারাপি আয়।
28ধনর উপরে ভরসায় জান যায়গি হুকাইয়া,
পরেজগার রয় খেছমা পাতার মত তরতাজা।
29ঘরর কষ্ট আনে যে তার বাটো খালি বাতাস পায়,
আম্মক জন তো নিচ্চিত গিয়ানি জনর চাকর অয়।
30পরেজগারির ফল জিন্দেগি গাছর লাখান,
গিয়ানিয়ে জয় করিলায় মানষর মন-পরান।
31পরেজগারে অউ জগতো পাওনা পায় যত,
নাফরমান-গুনাগারে পাইবো আরো কত?
Currently Selected:
আছমানি কিতাব: সুলাইমানি ছিল্লেখ 11: sylB
Highlight
Copy
Compare
Share
Want to have your highlights saved across all your devices? Sign up or sign in
© Ahle Kitab Society. All rights reserved.
