ꠁꠘ꠆ꠎꠤꠟ ৮: ২-ꠇꠞꠤꠘ꠆ꠔꠤꠀ 4
4
ꠝꠣꠐꠤꠞ ꠛꠣꠡꠘꠅ ꠞꠣꠈꠣ ꠗꠘ
1ꠅꠃ ꠇꠣꠞꠘꠦ, ꠀꠟ꠆ꠟꠣꠄ ꠝꠦꠢꠦꠞꠛꠣꠘꠤ ꠇꠞꠤꠀ ꠅꠃ ꠘꠄꠀ ꠈꠦꠎꠝꠔꠤ ꠇꠣꠝꠞ ꠖꠣꠄꠁꠔ꠆ꠔ ꠀꠝꠞꠣꠞ ꠀꠔꠅ ꠖꠤꠍꠂꠘ ꠇꠞꠤ, ꠀꠝꠞꠣ ꠘꠤꠞꠣꠡ ꠅꠁ ꠘꠣ। 2ꠔꠛꠟꠤꠉ ꠇꠣꠝꠅ ꠝꠣꠘꠡꠦ ꠟꠥꠇꠣꠁꠀ ꠎꠦꠔꠣ ꠛꠦꠢꠣꠄꠀꠝꠤ ꠇꠞꠂꠘ, ꠁꠔꠣ ꠀꠝꠞꠣ ꠝꠥꠐꠦꠃ ꠇꠞꠤ ꠘꠣ। ꠀꠝꠞꠣ ꠇꠥꠘꠥ ꠇꠣꠝꠅ ꠍꠟ-ꠌꠔꠥꠞꠤ ꠇꠞꠤ ꠘꠣ, ꠀꠟ꠆ꠟꠣꠞ ꠇꠣꠟꠣꠝꠅ ꠜꠦꠎꠣꠟ ꠝꠤꠡꠣꠁ ꠘꠣ। ꠛꠞꠋ ꠢꠇ ꠇꠕꠣꠞꠦ ꠈꠥꠟꠣ-ꠝꠦꠟꠣ ꠇꠁꠀ ꠢꠇꠟ ꠝꠣꠘꠡꠞ ꠉꠦꠍꠦ ꠀꠞ ꠀꠟ꠆ꠟꠣꠞ ꠖꠞꠛꠣꠞꠅ ꠀꠝꠞꠣꠞꠦ ꠎꠁꠉ꠆ꠉ ꠢꠤꠡꠣꠛꠦ ꠙꠞꠝꠣꠘ ꠇꠞꠤ। 3ꠀꠝꠞꠣꠞ ꠈꠥꠡ-ꠈꠛꠞꠤ ꠎꠥꠖꠤ ꠟꠥꠇꠣꠁꠟ ꠕꠣꠇꠦ, ꠔꠦ ꠟꠣꠘ꠆ꠘꠔꠤ ꠙꠕꠦ ꠎꠦꠞꠣ ꠎꠣꠁꠞꠣ, ꠔꠣꠞꠣꠞ ꠉꠦꠍꠦꠃ ꠟꠥꠇꠣꠁꠟ ꠕꠣꠇꠦ। 4ꠅꠃ ꠎꠉꠔꠞ ꠖꠦꠛꠔꠣ ꠁꠛꠟꠤꠍꠦ ꠅ-ꠁꠝꠣꠘꠖꠣꠞ ꠅꠇꠟꠞ ꠖꠤꠟꠞꠦ ꠀꠘ꠆ꠖꠣ ꠛꠣꠘꠣꠁꠟꠤꠍꠦ, ꠎꠣꠔꠦ ꠔꠣꠞꠣ ꠈꠥꠡ-ꠈꠛꠞꠤꠞ ꠘꠥꠞ ꠘꠣ ꠖꠦꠈꠦ। ꠅꠃ ꠈꠥꠡ-ꠈꠛꠞꠤꠞ ꠝꠣꠎꠖꠤ ꠀꠟ-ꠝꠍꠤꠞ ꠉꠃꠞꠛ ꠎꠣꠁꠞ ꠅꠁꠍꠦ, ꠀꠞ ꠅꠃ ꠀꠟ-ꠝꠍꠤꠃ ꠅꠁꠟꠣ ꠀꠟ꠆ꠟꠣꠞ ꠅꠛꠤꠇꠟ ꠍꠥꠞꠔ। 5ꠀꠝꠞꠣ ꠔ ꠘꠤꠎꠞ ꠛꠦꠙꠣꠞꠦ ꠔꠛꠟꠤꠉ ꠇꠞꠞꠣꠝ ꠘꠣ, ꠈꠣꠟꠤ ꠁꠍꠣ ꠀꠟ-ꠝꠍꠤꠞꠦ ꠔꠛꠟꠤꠉ ꠇꠞꠞꠣꠝ, ꠔꠣꠁꠘꠃ ꠝꠣꠟꠤꠇ, ꠔꠣꠘ ꠟꠣꠉꠤꠃ ꠀꠝꠞꠣ ꠔꠥꠝꠞꠣꠞ ꠉꠥꠟꠣꠝ ꠛꠘꠍꠤ। 6ꠀꠝꠞꠣ ꠁꠔꠣ ꠔꠛꠟꠤꠉ ꠇꠞꠞꠣꠝ, ꠇꠣꠞꠘ ꠎꠦ ꠀꠟ꠆ꠟꠣꠄ ꠇꠁꠍꠂꠘ, “ꠀꠘ꠆ꠖꠣꠁꠞ ꠕꠣꠇꠤ ꠚꠞ ꠅꠃꠇ,” ꠢꠃ ꠀꠟ꠆ꠟꠣ ꠙꠣꠇꠦ ꠔꠣꠘ ꠘꠥꠞ ꠀꠝꠞꠣꠞ ꠖꠤꠟꠅ ꠎꠣꠟꠣꠁꠍꠂꠘ, ꠎꠣꠔꠦ ꠀꠟ-ꠝꠍꠤꠞ ꠌꠦꠢꠣꠞꠣꠞ ꠝꠣꠎꠦ ꠀꠟ꠆ꠟꠣꠞ ꠘꠥꠞꠞ ꠝꠢꠤꠝꠣ ꠎꠣꠁꠞ ꠅꠄ।
7ꠀꠟ꠆ꠟꠣꠁ ꠅꠃ ꠘꠥꠞꠞ ꠗꠘ ꠔ ꠝꠣꠐꠤꠞ ꠛꠣꠡꠘꠅ ꠞꠣꠈꠣ ꠅꠁꠍꠦ, ꠅꠃ ꠛꠣꠡꠘ ꠅꠁꠟꠣꠝ ꠀꠝꠞꠣꠃ। ꠝꠣꠐꠤꠞ ꠛꠣꠡꠘꠅ ꠞꠣꠈꠣ ꠅꠁꠍꠦ, ꠎꠣꠔꠦ ꠝꠣꠘꠡꠦ ꠛꠥꠎꠔ ꠙꠣꠞꠦ ꠅꠃ ꠇꠥꠖꠞꠔꠤ ꠝꠢꠣꠡꠇ꠆ꠔꠤ ꠀꠝꠞꠣꠞ ꠘꠤꠎꠞ ꠉꠦꠍ ꠕꠣꠇꠤ ꠀꠁꠍꠦ ꠘꠣ, ꠛꠞꠋ ꠀꠟ꠆ꠟꠣꠞ ꠉꠦꠍ ꠕꠣꠇꠤꠃ ꠀꠁꠍꠦ। 8ꠢꠇꠟꠛꠣꠄ ꠕꠣꠇꠤ ꠀꠝꠞꠣꠞ ꠃꠙꠞꠦ ꠛꠃꠔ ꠟꠣꠈꠣꠘ ꠌꠣꠙ ꠀꠁꠟꠦꠅ, ꠀꠝꠞꠣ ꠌꠥꠞꠝꠣꠞ ꠅꠁꠍꠤ ꠘꠣ। ꠀꠝꠞꠣ ꠛꠦꠖꠤꠡꠣ ꠟꠣꠉꠟꠦꠅ ꠙꠥꠞꠣꠙꠥꠞ ꠘꠤꠞꠣꠡ ꠅꠁꠍꠤ ꠘꠣ। 9ꠀꠝꠞꠣꠞ ꠃꠙꠞꠦ ꠎꠥꠟꠥꠝ ꠇꠞꠣ ꠅꠁꠟꠦꠅ ꠀꠟ꠆ꠟꠣꠄ ꠔ ꠀꠝꠞꠣꠞ ꠟꠉ ꠍꠣꠠꠍꠂꠘ ꠘꠣ। ꠝꠣꠐꠤꠔ ꠚꠣꠟꠣꠁꠀ ꠀꠍꠣꠠꠟꠦꠅ ꠀꠝꠞꠣ ꠛꠤꠘꠣꠡ ꠅꠁꠍꠤ ꠘꠣ। 10ꠢꠣꠝꠦꠡꠣ ꠝꠣꠟꠤꠇ ꠁꠍꠣꠞ ꠝꠃꠔꠞ ꠖꠥꠈ-ꠇꠡ꠆ꠐꠞ ꠘꠤꠡꠣꠘꠣ ꠀꠝꠞꠣꠞ ꠡꠞꠤꠟꠅ ꠟꠁꠀ ꠊꠥꠞꠤꠀꠞ, ꠎꠣꠔꠦ ꠀꠝꠞꠣꠞ ꠡꠞꠤꠟꠞ ꠝꠣꠎꠦ ꠔꠣꠘ ꠎꠤꠘ꠆ꠖꠦꠉꠤꠅ ꠖꠦꠈꠣ ꠎꠣꠄ। 11ꠀꠞ ꠀꠝꠞꠣ ꠎꠔ ꠡꠝꠄ ꠛꠣꠌꠤꠀ ꠀꠍꠤ, ꠝꠣꠟꠤꠇ ꠁꠍꠣꠞ ꠟꠣꠉꠤ ꠀꠝꠞꠣꠞꠦ ꠔ ꠢꠞ-ꠢꠣꠝꠦꠡꠣꠃ ꠝꠃꠔꠞ ꠀꠔꠅ ꠔꠥꠟꠤ ꠖꠦꠅꠀ ꠅꠞ, ꠎꠣꠔꠦ ꠅꠃ ꠝꠃꠔꠞ ꠅꠗꠤꠘ ꠡꠞꠤꠟꠅ ꠔꠣꠘ ꠎꠤꠘ꠆ꠖꠦꠉꠤ ꠎꠣꠁꠞ ꠅꠄ। 12ꠅꠃ ꠘꠝꠥꠘꠣꠄ ꠀꠝꠞꠣꠞ ꠝꠣꠎꠦ ꠇꠣꠝ ꠇꠞꠦꠞ ꠝꠃꠔꠦ, ꠀꠞ ꠔꠥꠝꠞꠣꠞ ꠝꠣꠎꠦ ꠇꠣꠝ ꠇꠞꠦꠞ ꠎꠤꠘ꠆ꠖꠦꠉꠤꠄ।
13ꠙꠛꠤꠔ꠆ꠞ ꠎꠛꠥꠞ ꠡꠞꠤꠚꠅ ꠀꠍꠦ, “ꠀꠝꠤ ꠁꠝꠣꠘ ꠀꠘꠍꠤ ꠉꠔꠤꠇꠦꠃ ꠇꠁꠟꠣꠝ।” ꠅꠃ ꠄꠇꠁ ꠁꠝꠣꠘꠞ ꠜꠣꠉꠤ ꠅꠁꠀ ꠀꠝꠞꠣꠅ ꠅꠟꠣ ꠇꠁ। 14ꠇꠣꠞꠘ ꠀꠝꠞꠣ ꠎꠣꠘꠤ, ꠎꠦ ꠀꠟ꠆ꠟꠣꠄ ꠝꠣꠟꠤꠇ ꠁꠍꠣꠞꠦ ꠎꠤꠘ꠆ꠖꠣ ꠇꠞꠍꠟꠣ, ꠢꠃ ꠀꠟ꠆ꠟꠣꠄ ꠔꠣꠘ ꠟꠉꠦ ꠀꠝꠞꠣꠞꠦꠅ ꠎꠤꠘ꠆ꠖꠣ ꠇꠞꠛꠣ, ꠀꠞ ꠀꠝꠞꠣꠞ ꠟꠉꠦ ꠇꠞꠤ ꠔꠥꠝꠞꠣꠞꠦꠅ ꠔꠣꠘ ꠍꠣꠝꠘꠦ ꠀꠎꠤꠞ ꠇꠞꠛꠣ। 15ꠁꠔꠣ ꠢꠇꠟꠔꠣ ꠔꠥꠝꠞꠣꠞ ꠜꠣꠟꠣꠁꠞ ꠟꠣꠉꠤꠃ ꠅꠁꠍꠦ, ꠎꠣꠔꠦ ꠝꠣꠘꠡꠞ ꠃꠙꠞꠦ ꠀꠟ꠆ꠟꠣꠞ ꠎꠦ ꠞꠢꠝꠔ ꠘꠣꠎꠤꠟ ꠅꠁꠍꠦ, ꠢꠃ ꠞꠢꠝꠔꠞ ꠈꠣꠔꠤꠞꠦ ꠛꠃꠔꠦ ꠀꠞꠅ ꠛꠦꠡꠤ ꠇꠞꠤ ꠀꠟ꠆ꠟꠣꠞ ꠡꠥꠇꠞꠤꠀ ꠀꠖꠣꠄ ꠇꠞꠦ ꠀꠞ ꠀꠟ꠆ꠟꠣꠞ ꠉꠃꠞꠛ ꠅꠄ।
ꠁꠝꠣꠘꠦ ꠎꠤꠘ꠆ꠖꠦꠉꠤ ꠇꠣꠐꠣꠘꠤ
16ꠄꠞꠟꠣꠉꠤ ꠀꠝꠞꠣ ꠘꠤꠞꠣꠡ ꠅꠁ ꠘꠣ। ꠎꠥꠖꠤꠅ ꠀꠝꠞꠣꠞ ꠞꠇ꠆ꠔ-ꠝꠣꠋꠡꠞ ꠡꠞꠤꠟ ꠇ꠆ꠇꠄ ꠅꠁꠎꠣꠞ, ꠔꠦꠛꠃ ꠀꠝꠞꠣꠞ ꠞꠥꠢꠥ ꠖꠤꠘ ꠖꠤꠘ ꠔꠣꠎꠣ ꠅꠁꠀ ꠃꠑꠦꠞ। 17ꠅꠈꠘ ꠀꠝꠞꠣ ꠎꠦ ꠇꠄꠖꠤꠘꠞ ꠟꠣꠉꠤ ꠡꠣꠝꠣꠁꠘ꠆ꠘ ꠇꠡ꠆ꠐ ꠇꠞꠤꠀꠞ, ꠁ ꠇꠡ꠆ꠐꠞ ꠛꠖꠟꠣ ꠀꠝꠞꠣ ꠌꠤꠞꠇꠣꠟꠞ ꠟꠣꠉꠤ ꠅꠚꠥꠞꠘ꠆ꠔ ꠡꠣꠘ-ꠝꠢꠤꠝꠣ ꠟꠣꠜ ꠇꠞꠝꠥ। 18ꠌꠃꠈꠖꠤ ꠎꠦꠔꠣ ꠖꠦꠈꠣ ꠎꠣꠄ, ꠀꠝꠞꠣ ꠔ ꠁꠔꠣꠞ ꠛꠣꠄ ꠌꠣꠁꠞꠣꠝ ꠘꠣ, ꠛꠞꠋ ꠎꠦꠔꠣ ꠖꠦꠈꠣ ꠎꠣꠄ ꠘꠣ, ꠅꠔꠣꠞ ꠛꠣꠄ ꠌꠣꠁꠞꠣꠝ। ꠌꠃꠈꠦ ꠎꠦꠔꠣ ꠖꠦꠈꠣ ꠎꠣꠄ, ꠁꠔꠣ ꠔ ꠕꠥꠠꠣ ꠇꠄꠖꠤꠘꠞ, ꠅꠁꠟꠦ ꠎꠦꠔꠣ ꠖꠦꠈꠣ ꠎꠣꠄ ꠘꠣ, ꠁꠔꠣ ꠌꠤꠞꠇꠣꠟꠞ।
Currently Selected:
ꠁꠘ꠆ꠎꠤꠟ ৮: ২-ꠇꠞꠤꠘ꠆ꠔꠤꠀ 4: sylN
Highlight
Share
Copy
Want to have your highlights saved across all your devices? Sign up or sign in
© Ahle Kitab Society. All rights reserved.
