ꠁꠘ꠆ꠎꠤꠟ ৮: ২-ꠇꠞꠤꠘ꠆ꠔꠤꠀ 3
3
ꠀꠟ꠆ꠟꠣꠞ ꠟꠉꠦ ꠝꠤꠟꠘꠞ ꠘꠄꠀ ꠄꠇ ꠃꠍꠤꠟ꠆ꠟꠣꠞ ꠈꠣꠖꠤꠝ
1ꠔꠥꠝꠞꠣ ꠇꠤꠔꠣ ꠝꠘꠅ ꠇꠞꠅ, ꠀꠝꠞꠣ ꠁꠔꠣ ꠇꠁꠀ ꠢꠤꠞꠛꠣꠞ ꠀꠝꠞꠣꠞ ꠘꠤꠎꠞ ꠡꠥꠘꠣꠝ ꠉꠣꠅꠀꠔ ꠟꠣꠉꠍꠤ ꠘꠤ? ꠇꠥꠘꠥ ꠇꠥꠘꠥ ꠝꠣꠘꠡꠞ ꠎꠦꠟꠣ ꠅꠁꠘ꠆ꠘꠞ ꠉꠦꠍ ꠕꠣꠇꠤ ꠍꠘꠖ ꠘꠦꠅꠀ ꠟꠣꠉꠦ, ꠀꠝꠞꠣꠅ ꠅꠟꠣꠈꠣꠘ ꠔꠥꠝꠞꠣꠞ ꠉꠦꠍꠦ ꠛꠣ ꠔꠥꠝꠞꠣ ꠕꠣꠇꠤ ꠍꠘꠖ ꠙꠣꠅꠀ ꠟꠣꠉꠛ ꠘꠤ? ꠘꠣ, ꠝꠥꠐꠦꠃ ꠘꠣ। 2ꠔꠥꠝꠞꠣꠞ ꠘꠣꠝ ꠔ ꠀꠝꠞꠣꠞ ꠖꠤꠟꠞ ꠝꠣꠎꠦ ꠟꠦꠈꠣ ꠀꠍꠦ, ꠔꠥꠝꠞꠣꠃ ꠅꠁꠟꠣꠄ ꠀꠝꠞꠣꠞ ꠍꠘꠖ। ꠀꠞ ꠅꠃ ꠍꠘꠖꠞ ꠇꠕꠣ ꠔ ꠢꠇꠟꠦꠃ ꠎꠣꠘꠦ ꠀꠞ ꠢꠇꠟꠦꠃ ꠙꠠꠦ। 3ꠁꠈꠣꠘ ꠔ ꠙꠞꠤꠡ꠆ꠇꠣꠞ ꠛꠥꠎꠣ ꠎꠣꠄ, ꠀꠟ-ꠝꠍꠤꠞ ꠟꠦꠈꠣ ꠍꠘꠖ ꠅꠁꠟꠣꠄ ꠔꠥꠝꠞꠣꠃ, ꠔꠥꠝꠞꠣꠃ ꠀꠝꠞꠣꠞ ꠝꠦꠘꠔꠞ ꠚꠟ। ꠁ ꠍꠘꠖ ꠔ ꠇꠥꠘꠥ ꠇꠣꠟꠤ-ꠇꠟꠝ ꠖꠤꠀ ꠟꠦꠈꠣ ꠅꠁꠍꠦ ꠘꠣ, ꠈꠣꠟꠤ ꠀꠟ꠆ꠟꠣꠞ ꠙꠣꠇ ꠞꠥꠢꠥ ꠖꠤꠀ ꠟꠦꠈꠣ ꠅꠁꠍꠦ। ꠁꠈꠣꠘ ꠔ ꠔꠥꠞ ꠙꠣꠠꠅ ꠙꠣꠅꠀ ꠡꠞꠤꠅꠔꠞ ꠟꠣꠈꠣꠘ ꠇꠥꠘꠥ ꠙꠣꠔ꠆ꠔꠞꠞ ꠃꠙꠞꠦ ꠟꠦꠈꠣ ꠘꠣꠄ, ꠛꠞꠋ ꠝꠣꠘꠡꠞ ꠖꠤꠟꠞ ꠝꠣꠎꠦꠃ ꠟꠦꠈꠣ ꠅꠁꠍꠦ।
4ꠅꠃ ꠛꠦꠙꠣꠞꠦ ꠀꠟ-ꠝꠍꠤꠞ ꠃꠍꠤꠟ꠆ꠟꠣꠄ ꠀꠟ꠆ꠟꠣꠞ ꠖꠞꠛꠣꠞꠅ ꠀꠝꠞꠣꠞ ꠙꠥꠞꠣꠙꠥꠞ ꠘꠤꠌ꠆ꠌꠄꠅꠔꠣ ꠀꠍꠦ, 5ꠔꠣ-ꠅ ꠀꠝꠞꠣ ꠎꠦ ꠘꠤꠎꠞ ꠉꠥꠘꠦ ꠢꠇꠟꠔꠣ ꠇꠞꠤꠟꠔꠣꠝ ꠙꠣꠞꠝꠥ, ꠁꠟꠣ ꠇꠥꠘꠥ ꠇꠕꠣ ꠘꠣꠄ। ꠁ ꠈꠦꠎꠝꠔꠤ ꠉꠥꠘ ꠔ ꠈꠣꠟꠤ ꠀꠟ꠆ꠟꠣꠞ ꠉꠦꠍ ꠕꠣꠇꠤꠃ ꠙꠣꠁ। 6ꠀꠟ꠆ꠟꠣꠞ ꠟꠉꠦ ꠝꠤꠟꠘꠞ ꠘꠄꠀ ꠃꠍꠤꠟ꠆ꠟꠣꠞ ꠇꠕꠣ ꠎꠣꠘꠣꠘꠤꠞ ꠟꠣꠉꠤ, ꠔꠣꠁꠘꠃ ꠀꠝꠞꠣꠞꠦ ꠁ ꠈꠦꠎꠝꠔꠤ ꠉꠥꠘ ꠖꠣꠘ ꠇꠞꠍꠂꠘ। ꠁ ꠃꠍꠤꠟ꠆ꠟꠣ ꠔ ꠅꠇ꠆ꠇꠞꠦ ꠅꠇ꠆ꠇꠞꠦ ꠡꠞꠤꠅꠔ ꠝꠣꠘꠣꠞ ꠛꠦꠙꠣꠞ ꠘꠣꠄ, ꠛꠞꠋ ꠙꠣꠇ ꠞꠥꠢꠥꠞ ꠙꠞꠤꠌꠣꠟꠘꠣꠄ ꠖꠤꠟꠞ ꠁꠝꠣꠘ-ꠀꠇꠤꠖꠣꠞ ꠛꠦꠙꠣꠞ। ꠇꠣꠞꠘ ꠅꠇ꠆ꠇꠞꠦ ꠝꠃꠔ, ꠀꠞ ꠞꠥꠢꠦ ꠎꠤꠘ꠆ꠖꠦꠉꠤ।
7ꠙꠣꠔ꠆ꠔꠞꠞ ꠃꠙꠞꠦ ꠟꠦꠈꠣ ꠡꠞꠤꠅꠔꠤ ꠎꠦ ꠈꠦꠎꠝꠔꠦ ꠝꠞꠘ ꠀꠄ, ꠅꠃ ꠡꠞꠤꠅꠔ ꠘꠣꠎꠤꠟꠞ ꠡꠝꠄ ꠔ ꠀꠟ꠆ꠟꠣꠞ ꠝꠢꠤꠝꠣ ꠎꠣꠁꠞ ꠅꠁꠍꠤꠟ। ꠅꠃ ꠡꠝꠄ ꠢꠎꠞꠔ ꠝꠥꠍꠣꠞ ꠌꠦꠢꠣꠞꠣꠅ ꠀꠟ꠆ꠟꠣꠞ ꠝꠢꠤꠝꠣꠄ ꠘꠥꠞꠣꠘꠤ ꠅꠁꠉꠦꠍꠤꠟ। ꠔꠣꠘ ꠝꠥꠈꠞ ꠘꠥꠞꠣꠘꠤ ꠍꠥꠞꠔ ꠎꠥꠖꠤꠅ ꠀꠡ꠆ꠔꠦ ꠀꠡ꠆ꠔꠦ ꠇꠝꠤ ꠎꠣꠅꠀ ꠗꠞꠍꠤꠟ, ꠔꠦꠛꠃ ꠛꠘꠤ ꠁꠍꠞꠣꠁꠟ ꠅꠇꠟꠦ ꠔꠣꠘ ꠌꠦꠢꠣꠞꠣꠞ ꠛꠣꠄ ꠌꠣꠅꠀꠞ ꠔꠣꠇ꠆ꠇꠔ ꠅꠁꠍꠦ ꠘꠣ। 8ꠅꠃ ꠡꠞꠤꠅꠔꠞ ꠈꠦꠎꠝꠔꠤ ꠚꠟ ꠎꠥꠖꠤ ꠅꠔ ꠝꠢꠤꠝꠣ-ꠀꠟꠣ ꠅꠄ, ꠔꠦ ꠙꠣꠇ ꠞꠥꠢꠥꠞ ꠈꠦꠎꠝꠔꠤ ꠚꠟ ꠇꠔ ꠛꠦꠡꠤ ꠝꠢꠤꠝꠣ-ꠀꠟꠣ! 9ꠅꠃ ꠎꠦ ꠅꠇ꠆ꠇꠞꠤ ꠡꠞꠤꠅꠔꠦ ꠝꠣꠘꠡꠞꠦ ꠖꠥꠡꠤ ꠡꠣꠁꠛꠡ꠆ꠔ ꠇꠞꠦ, ꠔꠣꠞ ꠈꠦꠎꠝꠔꠤ ꠇꠣꠝ ꠎꠥꠖꠤ ꠅꠔ ꠝꠢꠤꠝꠣ-ꠀꠟꠣ ꠅꠄ, ꠔꠦ ꠎꠦ ꠈꠦꠎꠝꠔꠦ ꠛꠦ-ꠇꠍꠥꠞ ꠈꠣꠟꠣꠍ ꠇꠁꠀ ꠉꠁꠘ꠆ꠘ ꠇꠞꠦ, ꠁ ꠈꠦꠎꠝꠔ ꠔ ꠀꠞꠅ ꠇꠔ ꠛꠦꠡꠤ ꠝꠢꠤꠝꠣ-ꠀꠟꠣ! 10ꠛꠥꠎꠞꠣꠄ ꠘꠤ, ꠀꠉꠦ ꠎꠦꠔꠣ ꠝꠢꠤꠝꠣ-ꠀꠟꠣ ꠀꠍꠤꠟ, ꠅꠈꠘ ꠁꠔꠣꠞ ꠇꠥꠘꠥ ꠝꠢꠤꠝꠣ ꠘꠣꠁ ꠇꠁꠟꠦꠃ ꠌꠟꠦ, ꠔꠣꠞ ꠔꠥꠟꠘꠣꠄ ꠅꠈꠘꠇꠥꠞ ꠘꠄꠀ ꠈꠦꠎꠝꠔꠞ ꠝꠢꠤꠝꠣ ꠛꠃꠔ ꠛꠦꠡꠤ। 11ꠎꠦ ꠘꠥꠞꠣꠘꠤꠞ ꠔꠦꠎ ꠇꠝꠣ ꠗꠞꠍꠤꠟ, ꠁꠔꠣ ꠎꠦꠛꠟꠣ ꠅꠔ ꠝꠢꠤꠝꠣ-ꠀꠟꠣ, ꠔꠦ ꠎꠦꠔꠣ ꠌꠤꠞꠇꠣꠟ ꠞꠁꠛ, ꠁꠔꠣ ꠔ ꠀꠞꠅ ꠇꠔ ꠛꠦꠡꠤ ꠝꠢꠤꠝꠣ-ꠀꠟꠣ!
12ꠀꠝꠞꠣꠞ ꠝꠘꠅ ꠅꠟꠣꠈꠣꠘ ꠀꠡꠣ ꠀꠍꠦ ꠉꠔꠤꠇꠦꠃ ꠀꠝꠞꠣ ꠈꠥꠟꠣ-ꠈꠥꠟꠤ ꠝꠣꠔꠤ। 13ꠀꠝꠞꠣ ꠔ ꠢꠎꠞꠔ ꠝꠥꠍꠣꠞ ꠟꠣꠈꠣꠘ ꠘꠣꠄ, ꠔꠣꠁꠘ ꠙꠞ꠆ꠖꠣ ꠖꠤꠀ ꠔꠣꠘ ꠝꠥꠈ ꠉꠥꠞꠤꠀ ꠕꠁꠍꠟꠣ, ꠎꠣꠔꠦ ꠔꠣꠘ ꠝꠥꠈꠞ ꠇꠝꠤ ꠎꠣꠅꠀ ꠘꠥꠞꠣꠘꠤ ꠍꠥꠞꠔ ꠛꠘꠤ ꠁꠍꠞꠣꠁꠟꠦ ꠘꠣ ꠖꠦꠈꠂꠘ। 14ꠅꠁꠟꠦ ꠔꠣꠞꠣꠞ ꠖꠤꠟ ꠙꠣꠡꠣꠘ ꠅꠁꠉꠦꠍꠤꠟ। ꠀꠞ ꠅꠈꠘꠅ ꠔꠃꠞꠣꠔ ꠡꠞꠤꠚꠅ ꠟꠦꠈꠣ, ꠀꠟ꠆ꠟꠣꠞ ꠟꠉꠦ ꠝꠤꠟꠘꠞ ꠢꠃ ꠙꠥꠞꠣꠘꠣ ꠃꠍꠤꠟ꠆ꠟꠣꠞ ꠇꠕꠣ ꠔꠤꠟꠣꠅꠔ ꠇꠞꠟꠦ, ꠔꠣꠞꠣꠞ ꠖꠤꠟꠞ ꠝꠣꠎꠦ ꠙꠞ꠆ꠖꠣ ꠕꠣꠇꠦ। ꠈꠣꠟꠤ ꠁꠍꠣ ꠀꠟ-ꠝꠍꠤꠞ ꠃꠙꠞꠦ ꠁꠝꠣꠘ ꠀꠘꠟꠦ ꠅꠃ ꠙꠞ꠆ꠖꠣ ꠢꠞꠤ ꠎꠣꠄ। 15ꠀꠞ ꠅꠈꠘ ꠙꠞ꠆ꠎꠘ꠆ꠔ ꠢꠎꠞꠔ ꠝꠥꠍꠣꠞ ꠔꠃꠞꠣꠔ ꠡꠞꠤꠚ ꠔꠤꠟꠣꠅꠔ ꠇꠞꠣꠞ ꠡꠝꠄ ꠛꠘꠤ ꠁꠍꠞꠣꠁꠟ ꠅꠇꠟꠞ ꠖꠤꠟ ꠙꠞ꠆ꠖꠣ ꠖꠤꠀ ꠉꠥꠞꠣ ꠕꠣꠇꠦ। 16ꠔꠣꠞꠣꠞ ꠝꠣꠎꠦ ꠇꠦꠃ ꠎꠦꠛꠟꠣ ꠝꠣꠟꠤꠇꠞ ꠃꠙꠞꠦ ꠁꠝꠣꠘ ꠀꠘꠦ, ꠅꠃ ꠡꠝꠄ ꠢꠃ ꠙꠞ꠆ꠖꠣ ꠢꠞꠤ ꠎꠣꠄ। 17ꠅꠃ ꠝꠣꠟꠤꠇ ꠅꠁꠟꠣ ꠙꠣꠇ ꠞꠥꠢꠥ, ꠀꠞ ꠝꠣꠟꠤꠇꠞ ꠞꠥꠢꠥ ꠎꠦꠘꠅ ꠀꠍꠦ, ꠅꠘꠅꠃ ꠡ꠆ꠛꠣꠗꠤꠘꠔꠣ ꠀꠍꠦ। 18ꠀꠄꠘꠣꠞ ꠍꠣꠝꠘꠦ ꠎꠦꠟꠣ ꠙꠞ꠆ꠖꠣ ꠍꠣꠠꠣ ꠝꠥꠈ ꠡꠞꠣꠡꠞꠤ ꠖꠦꠈꠣ ꠎꠣꠄ, ꠅꠃꠟꠣ ꠀꠝꠞꠣ ꠢꠇꠟꠃ ꠀꠟ-ꠝꠍꠤꠞ ꠘꠥꠞꠣꠘꠤ ꠝꠢꠤꠝꠣ ꠖꠦꠈꠤ ꠖꠦꠈꠤ ꠀꠞꠅ ꠛꠦꠡꠤ ꠝꠢꠤꠝꠣ-ꠀꠟꠣ ꠛꠘꠤꠀ ꠔꠣꠘ ꠟꠣꠈꠣꠘ ꠝꠢꠤꠝꠣ-ꠀꠟꠣ ꠅꠁꠞꠣꠝ। ꠀꠝꠞꠣꠞ ꠝꠣꠟꠤꠇ ꠁꠍꠣ, ꠝꠣꠘꠤ ꠙꠣꠇ ꠞꠥꠢꠥꠞ ꠇꠥꠖꠞꠔꠤ ꠛꠟꠦꠃ ꠁꠟꠣ ꠅꠞ।
Currently Selected:
ꠁꠘ꠆ꠎꠤꠟ ৮: ২-ꠇꠞꠤꠘ꠆ꠔꠤꠀ 3: sylN
Highlight
Share
Copy
Want to have your highlights saved across all your devices? Sign up or sign in
© Ahle Kitab Society. All rights reserved.
