Terethiinit 9

1Ma baa adtak aajĩlõ ꞌcĩ ĩĩn ꞌtur tũũrĩ cĩnnĩ, hadtuuha hinnia mũꞌnyaac ngaatĩ adhukiaanĩ hẽẽtahujjieen hikia loota. Nẽ baa aaꞌnyĩhoothĩk mũꞌnyaac nicci mũhũta cĩ ꞌgõõl ꞌcĩ aduhun ꞌloohatõõ ꞌcĩ uuthik#9:1 ꞌLook ꞌcĩ uuthihi: Ĩĩn ciee ꞌlook ꞌcĩ ecebiini ꞌThĩttaanĩ. hiꞌthihi dtuurnanĩt. 2Ma baa abbuuk nẽẽ hattũũg cĩ ꞌlook nicci ho, aluba bũrrẽtĩ umwaa cobbi gẽrrẽẽt ꞌcĩ aaĩ hĩ gõõng atũũthĩ mõrõ cobbi nẽ ikia ũtũhũ bũrrẽtĩ kõr hĩ ngõõt hĩĩtõ muguur.

3Ma ho, itigirriaa ꞌgirooc bũrrẽẽtatõõ nĩĩcĩ hũmmũlũũnyan looc nẽ aaꞌnyĩhoothĩk ꞌgirooc ꞌtirriani ꞌcĩ ĩccaaĩ eet, ꞌcĩ aduhõõ hĩ ꞌtirrian ꞌcĩ aꞌnyak nyadokorrooꞌnya thõng. 4Baa adukiaak ꞌgirooc nicci thõõth ꞌcĩ aĩ, ma hegeyyu arteenit hode hẽẽn hĩ hẽlẽggĩ vẽlẽk ꞌcĩg abũtha, abũnnaa ĩccaayyu eet ꞌcĩg hõllõngaa aꞌnyak nyamacaar cĩ Nyekuci muumtinii cĩggĩĩng. 5Nẽ tarĩ, udukiaak ꞌgirooc thõõth ꞌcĩ aĩ, ma haruku ĩhõõggõ thõng, uukit ĩhõõggõ nyĩlõhĩ ꞌtur huciithaa ꞌcĩ aaĩ hĩgõõng ĩccaayyeet nyadokorro. 6Nẽ waathinnioohĩĩ ĩtĩko, adiim hatĩ eeta daahĩth nẽ hõllõngaa ammũda. Ma hatĩ abũraneek nẽẽg daahĩth, alĩĩta hinnia hatĩ daahĩthĩ ĩhõõggõ thõng.

7Baa aaĩ ꞌgirooc nicciee hĩ nyangõõllẽẽꞌnya ꞌcĩg akũmanoothĩk õõ jora nẽ baa ahimit nẽẽg vẽlẽk tẽmẽdẽhĩt ꞌcĩg ĩĩn ꞌdaab nẽ aꞌnyahit muumti ꞌcĩg aattĩg hĩcĩg eetuk. 8Nẽ ĩĩtõ uuttik ĩmana haauto hĩcĩg ngaa ꞌcĩ ngayyi nẽ aꞌnyahit nyĩgĩt ꞌcĩg aattĩg hĩcĩg ꞌmaawak. 9Baa ahimit nẽẽg hilibbwa ꞌcĩg ĩĩn ꞌthĩĩk iyyootinii cĩggĩĩng nẽ eggerenyit havvuuto cĩggĩĩng haauto hĩ ꞌgadiggadiꞌnya ꞌcĩg agurut nyangõõllẽẽꞌnya cĩg ũũrũta ꞌcĩg icciodanoothĩk jore. 10Baa aꞌnyak nẽẽg vẽlẽk huulli ꞌcĩg aattĩg hĩ cĩg nyadokorrooꞌnyanu nẽ aꞌnyak ꞌtirriani ꞌcĩ ĩccaaĩ eet hippiirria nyĩlõhĩ ꞌtur. 11Baa habu cĩnĩĩng aajĩlõ ꞌcĩ ĩĩn makayyioohit cĩ ꞌlook ꞌcĩ uuthik hiꞌthihi dtuurnanĩt ko. Baa haĩ ꞌthaar cĩgĩnnĩg Ebereeiyyi Abaddon nẽ thõõthaa cĩ eet cĩg ꞌGirihi, haĩ Apollion,#9:11 Apollion: Aĩ thõõth ciee Ebereeiyyi ẽꞌthẽcattĩ hẽlẽggĩ. nĩngĩtĩ aĩ, eet ꞌcĩ acũda hode aggĩĩra eet.

12Nẽ thĩ ꞌyioko, allacanĩ pĩĩrnanĩtĩ ꞌcĩ oou nẽ nga au ũgẽẽgĩ ꞌramma ꞌcĩg abathĩ gẽrrẽẽt ũdũt uruta.

13Ma ho, adtak aajĩlõ ꞌcĩ ĩĩn tõrkõnõn tũũrĩ cĩnnĩ, nẽ hĩthĩha molook ꞌcĩ õthõõth õttõõnnĩĩ ꞌcĩg ĩĩn ꞌwec ĩcĩg altaarĩ ꞌcĩ ẽhẽnytaa ꞌdaaba, ꞌcĩ abĩlĩ muumaa cĩ Nyekuci. 14Nẽ ĩĩnnĩk mõlõõhĩ nicciee aajĩlõ ꞌcĩ adtak tũũrĩ ho, “Õga aajĩlẽẽt ꞌcĩg ĩĩn ꞌwec ecebbi dẽmẽtaa cĩ hidioo cĩ Euvaratẽthĩ ho.” 15Nĩngĩtĩ õõganĩ nẽẽ aajĩlẽẽt ꞌcĩg ecebbi ĩĩn ꞌwec ko nẽ ũkũmattoothĩk ꞌthaa niccia kõr tĩho, nyĩlõk hĩ irkit niccia noho, hátĩ hiita huruhit eet cĩg lootu ĩĩcĩ odoyyii.#9:15 Looc ĩĩcĩ odoyyii: Eꞌngerri eeta cĩg lootu hĩĩtõ lothippiꞌnya ꞌwec nẽ eeta vẽlẽk lothippita hõdẽẽthõng, aruhi hĩĩ ꞌthĩĩ. 16Nẽ ngaatĩ hathĩknĩ, baa agiili ũrũtana cĩg nyangõõllẽẽꞌnya ꞌcĩg joraak ĩĩn millioꞌnya ꞌmiiaꞌnya ꞌramma (200,000,000).

17Baa hadtuuha naa nyangõõllẽẽꞌnya hĩ ꞌthukanniook cĩggĩĩng aattiyyi nyangõõllẽẽꞌnya. Baa aꞌnyak nyangõõllẽẽꞌnya ooti hĩ ꞌmaaĩta, nẽ uudakta ꞌgwoo hĩ bũrrẽt utugeetinii cĩggĩĩng. 18Baa aruk ꞌgwaa hĩ bũrrẽt hĩ ꞌgelemit ꞌcĩ aaburii padtahac ꞌcĩ uudaha nyangõõllẽẽꞌnya niccieeg ko, eet ꞌcĩg mẽẽlĩg loota nĩnga ĩĩcĩ odoyyii. 19Nẽ uruhit nyangõõllẽẽꞌnya niccieeg eet ꞌgwoyyiaa hĩ bũrrẽẽtaa ꞌcĩ audaha nẽẽg utugeetinii cĩggĩĩng nẽ uukito eet hadaahito huullinii ꞌcĩg aꞌnyak ooti hĩ hũkaaꞌnya ꞌcĩg abathĩ.

20Nẽ eeta ꞌcĩg baag nga arũgĩ nẽ hõllõngaa ũũnnĩk ꞌthẽccanẽẽt cĩggĩĩng ko buúk, aalla ala loriẽẽt ꞌcĩg abathĩ#9:20 Loriẽẽt ꞌcĩg abathĩ: Baa ĩĩn cieeg aajĩlẽẽt ꞌcĩg baag arũmĩ hĩ Nyekuc hẽẽtahujjieen nẽ iita ũtũbũrĩt Nyekuc, nĩngĩtĩ iiggiaĩ Nyekuci ĩhõõggõ hẽẽtahujjieen. Nẽ ꞌyioko, iita accananit eet loota nĩnga. Tigiil ꞌBuuk cĩ Terethiitto 12:7-9. noho hĩ hẽlẽggĩ ꞌcĩg aar eeta hĩĩtõ nyekuꞌnya ꞌcĩg adĩmanniaa ꞌdaaba, hĩ maccĩrẽẽnĩ, hĩ biyyiẽẽnĩ, hĩ ꞌcĩg adamanniaa hẽẽnĩ. Nẽ cieeg vẽlẽk, ĩĩn hẽlẽggĩ ꞌcĩg aar eeta hĩĩtõ nyekuꞌnya ꞌcĩg hõllõngaa acĩnĩ hode athĩknĩ hode õvvõ. 21Baa aitiõõ hõllõngaa ũũhũ eeta cieeg ꞌthinneeti cĩggĩĩng hĩ authet ꞌcĩ aruhi eet. Baa aalla ẽlẽmĩ nẽẽg hẽlẽggĩ ꞌcĩg ĩĩn õlõng, hĩ thooꞌthiok cĩg ꞌwaangĩꞌthẽẽtak hĩ ĩgõr cĩnĩĩng.

Currently Selected:

Terethiinit 9: did

Highlight

Copy

Compare