Terethiinit 10

Aajĩlõ hĩ ꞌbuuk ꞌcĩ hidici

1Nẽ hudtuuha aajĩlõ umwa ꞌcĩ attiran gẽrrẽẽt ꞌcĩ alluuccia hẽẽtahujjieen aku loota. Baa ammũta ĩnõõnnõ diith nẽ ohoorranoothĩk tõõlõngẽẽcĩ õõ cĩnnĩ. Baa aara muum cĩnnĩ haau hĩ kõrra nẽ aꞌnyak ꞌthoo ꞌcĩg aattĩg hĩ lanyit cĩ ꞌgwoyyio. 2Baa aꞌnyak nẽẽ ꞌbuuk ꞌcĩ hidici ꞌcĩ ubbuuhi ẽlẽk attiaa cĩnnĩ. Baa abĩlĩ nẽẽ aarĩk ꞌthooc cĩ aꞌthiit cobbi bũlũcatõõ nẽ ataadĩk ꞌthooc ꞌcĩ hidici ꞌthẽẽmĩ lokora. 3Ẽggẽrẽny nẽẽ moloohaa cobbi ĩĩcĩ aaĩ hĩ gõõng arruukan ꞌmaa nẽ ma ẽggẽrẽny ko, iita eggerenyit bõrõhẽẽna ꞌcĩg ĩĩn tũkĩramma ho buúk. 4Ma baa ĩbĩlĩt molookwaana cĩg bõrõhẽẽn ꞌcĩg ĩĩn tũkĩramma ho nẽ haĩ hẽtẽhẽẽd thõõth ꞌcĩ aduha nẽẽg ko loota, anneeka hinnia mõlõõhĩ umwaa hẽẽtahujjieen nẽẽ, “Ma heheedi thooꞌthiok nicciag loota, migithõõĩ.”

5Ma ho, hudtuuha aajĩlõ aa aarĩk ꞌthooc hõdẽẽthõng bũlũcatõõ nẽ aarĩk umwa ꞌthẽẽmĩ lokora, õdõng aꞌthiit cĩnnĩ cobbi ꞌjieena. 6Nẽ ũbũtan aajĩlõ ꞌthaarĩĩ cĩg Nyekuc ꞌcĩ ẽhẽnyta hẽẽtkujjieen hĩ looc hĩ hẽlẽggĩ vẽlẽk ꞌcĩg arũgĩ ooo ĩĩ, “Iittiõõ Nyekuci hõllõngaa ereeyyi tarĩ.” 7Uduhaak Nyekuci eet baag ĩĩn põrõvẽtaaꞌnya cĩgĩnnĩg thooꞌthiok baag ammiꞌthi nga hagayyi, hatĩ ũttũbaneek aajĩlõ ꞌcĩ ĩĩn tũkĩramma ngaatĩ adtahĩ tũũrĩ cĩnnĩ.

8Nẽ õthõõthahaa mõlõõhĩ aa hẽẽtkujjieen tarĩ ĩnnĩhaa, “Bĩĩt ꞌgama ꞌbuuk ꞌcĩ ubbuuhi hata, ꞌcĩ aꞌnyak aajĩlõ ꞌcĩ abĩlĩ nẽ ataadĩk ꞌthooc hõdẽẽthõng bũlũcatõõ nẽ aarĩk umwa ꞌthẽẽmĩ lokora hata.”

9Ma ho, heejehoothĩha aajĩlõ nicci nẽ hĩĩnnĩha, aꞌnyaa ꞌbuuk ꞌcĩ hidici ho. Ẽdẽcca hinnia anneeka, “Eri ꞌbuuk icci dahõ, ẽmmẽdĩ hatĩ ũtũũgatõõ aaĩ hĩ lõtẽẽcĩ ma hẽẽngatõõ õkõ ammũccarĩĩ.” 10Ma ho, haggama aajĩlõ nicci ꞌbuuk nẽ ma hadahi ho, ẽmmẽdĩ hinnia ũtũũgatõõ aĩ ꞌlĩĩ ꞌlĩĩ aaĩ hĩ lõtẽẽcĩ, ma haku ho, ũũkcĩ hinnia hũmmũccar hẽẽngatõõ. 11Nĩngĩtĩ anneeka mõlõõhĩ nicciee, “Tẽrẽth eet thooꞌthiok ꞌcĩg hatĩ au. Duhaak ꞌthẽk ĩhõõggõ vẽlẽk tarĩ, loonyinii cĩggĩĩng hĩ eet ꞌcĩg õthõõth thooꞌthiohĩ cũũmõ cũũmõ, hõdẽĩ hĩ habuẽẽt cĩggĩĩng vẽlẽk.”

Currently Selected:

Terethiinit 10: did

Highlight

Copy

Compare