Ebereei 9

Laiinit ꞌcĩ hũnũũk hĩ ꞌcĩ ĩĩn ngeju

1Nẽ ꞌyioko, lõhõt ꞌcĩ oou baa aarĩk Nyekuci hĩ eet cĩg Ĩꞌthĩraẽlĩ, aꞌnyak nyattalliook ꞌcĩg laiittak, nẽ tarĩ, aꞌnyak ꞌCieeth cĩ Nyekuci horrwaa ꞌcĩ õdõhõhĩĩ kak. 2Baa ẽhẽnytĩ ꞌCieeth ciee Nyekuci#9:2 ꞌCieeth cĩ Nyekuci: Baa ĩĩn ꞌCieeth cĩ Nyekuci hõdẽẽthõng ꞌJeruꞌthalẽma, aꞌnyak ꞌcieeth ciee nĩngĩtĩ hõdẽẽthõng ꞌcĩ ĩbbõõrĩkĩ paadĩrꞌnya Nyekuc ꞌgaarrieenit. Baa aaĩ Nyekuci bulẽẽtta ꞌCieethaa cĩnnĩ Ngaatĩ Aꞌngirannii nẽ Ẽllẽẽm Gẽrrẽẽt ko. Paadĩr cobbi dioo ꞌcĩ aduhun Nĩngĩtĩ Aꞌngirannii ho, õkõõĩ biyyi cĩg ꞌgaarrieettak, hátĩ hũũk hũtũngeek Nyekuci ꞌthẽccanẽẽt cĩg eetuk. Tigiil thõõth icci ꞌBuuhaa cĩ Levitiko 16; Ebereei 9. ho, haꞌnyak ꞌgoolliok ꞌramma. Aꞌnyak ꞌcĩ oou ꞌthiihit ꞌcĩ aꞌnyak ꞌlõõmẽẽt hĩ tẽrẽmẽẽja ꞌcĩ ataadõõthĩkĩ ũbũnĩ ꞌcĩ aꞌngirannii cĩ Nyekuci nẽ baa haĩ nĩngĩtĩ icci, Nĩngĩtĩ ꞌcĩ Ẽllẽẽmĩthĩ. 3Nẽ ꞌCieetõõ ĩĩcĩ gõlla, baa aaĩ cẽrẽm ꞌcĩ ẽꞌngẽr ꞌcieeth hõrggẽẽna nẽ cẽrẽmaa ĩĩcĩ gõlla, aaĩ Nĩngĩtĩ Aꞌngirannii ꞌcĩ Ẽllẽẽmĩth Gẽrrẽẽt. 4Aꞌnyak nĩngĩtĩ ciee altaarĩ ꞌcĩ ĩĩn ꞌdaab ꞌcĩ ĩwaadini mõhõõkacĩ nẽ aꞌnyak cadduk ꞌcĩ ĩĩn ꞌdaab cĩ lohoto. Nẽ cadduha ĩĩtõ, aꞌnyak hutuba ꞌcĩ ĩĩn ꞌdaab ꞌcĩ abbĩꞌthĩĩ ꞌgẽẽn ꞌcĩ haĩ manna,#9:4 Manna: Ĩĩn manna ꞌgẽẽn ꞌcĩ baa ĩꞌthõõak Nyekuci eet cĩg Ĩꞌthĩraẽlĩ baa aattĩg horrwaa ꞌcĩ õdõhõhĩĩ irkiꞌnyia hẽẽn ꞌwec. Tigiil ꞌBuuk cĩ Luugithõõ 16:1-36. nẽ baa aaĩ hĩbahĩtĩ cĩ Arõõnẽ#9:4 Hĩbahĩt cĩ Arõõnẽ: Tigiil thõõth icci ꞌBuuhaa cĩ Tigiilẽttõõ 17:1-10. ꞌcĩ appuuha bõllõõk, nẽ aauto biyyiẽẽna cĩg lõhõtaak tõõ.#9:4 Biyyiẽẽn cĩg lõhõtaak: Baa ĩĩn cieeg biyyiẽẽn ꞌcĩg eheedini tilooiniti cĩ Nyekuci ꞌcĩg ĩĩn õmmõtõ. Tigiil ꞌBuuk cĩ Luugithõõ 20:1-17. 5Cadduhaa cĩ lohoto ho lokora, abĩlĩ aajĩlẽẽta ꞌramma cĩg bulẽẽttak nẽ ẽbbẽttaanito havvuuto hithidit loriẽẽta cĩggĩĩng cadduk ꞌcĩ urwacanoothĩk biyyieeta ꞌcĩg ũũnnõthõõthĩkĩ ꞌthẽccanẽẽta nẽ occa hõllõngaa hẽddẽẽba thooꞌthiok iccig vẽlẽk ꞌyioko.

6Nẽ ꞌgõõl ꞌcĩ baa aattiyyi hẽlẽggĩ vẽlẽk cieeni. Aduhun paadĩrꞌnya hõdõõkõthĩ Nĩngĩtĩ Ẽllẽẽmĩth ko, hõõt halayyio thõng. 7Nẽẽthĩ, baa paadĩr cobbi dioo ꞌcĩ aduhun Nĩngĩtĩ Aꞌngirannii ꞌcĩ Ẽllẽẽmĩth Gẽrrẽẽt ko#9:7 Paadĩr cobbi dioo ꞌcĩ aduhun Nĩngĩtĩ Aꞌngirannii ꞌcĩ Ẽllẽẽmĩth Gẽrrẽẽt ko: Kõr ꞌcĩ baa haĩ ciee, Kõr ꞌcĩ Ammaannĩkĩ Nyekuci eet cĩgĩnnĩg. Ĩĩn ciee kõr ꞌcĩ õkõõĩ paadĩrĩ cobbi Ngaatĩ Aꞌngirannii Ẽllẽẽmĩth Gẽrrẽẽt ꞌCieethaa cĩ Nyekuci nẽ ũũk urwacaneek biyyi ngaatĩ aayyi Nyekuci, hátĩ hatamaatĩk Nyekuci eet hĩnĩngĩtĩ ꞌthẽccanẽẽt cĩggĩĩng. Ĩĩn ciee kõr ꞌcĩ ẽdẽtaanĩ eeta cĩg Ĩꞌthĩraẽlĩ eleeti ꞌgẽẽna. Tigiil ꞌBuuk cĩ Levitiko 16; Dtiicanĩ cĩg ꞌThooyyiahu 27:9; Waraga cĩ Ebereei 9:1-8. tabattĩ hõdẽẽthõng irkita. Aꞌnyak paadĩrĩ biyyi ꞌcĩg õkõ aꞌnyĩĩk Nyekuc hũtũũny ꞌthẽccanẽẽt cĩgĩnnĩg hĩ cĩg eetuk, ꞌthẽccanẽẽt baag adĩman nẽẽg nẽ hõllõngaa aga. 8Nẽ ꞌgõõlaa cĩ, ẽtẽrꞌtha Lorii ꞌcĩ Ẽllẽẽmĩth aĩ, aitiõõ ẽẽtĩ ꞌcĩ occa aduhun Nĩngĩtĩ Aꞌngirannii ꞌcĩ Ẽllẽẽmĩth Gẽrrẽẽt ko, nga abĩlĩ ꞌCieeth cĩ Nyekuci tõõ. 9Nẽ kõr nicci buúk, ẽtẽrꞌtha thõõth ciee aĩ, hõllõngaa naag hũũny ꞌthinneeti hĩĩtõ tẽllĩg, ꞌgõõlẽẽ ꞌcĩ haaꞌnyĩkĩ ꞌbaaninit hĩ ngaatĩ hĩbbõõrĩkĩ Nyekuc ꞌgaarriẽẽn. 10Ĩĩn nyattalliooha cieeg ꞌgõõl ꞌcĩ adahĩ eeta ꞌgeenniok hĩ cĩg ahũdẽẽnĩ hĩ tũũnyẽnĩt cĩ eleetinu haaga. Nẽ nyattalĩ cĩ tũũnyẽnĩt cĩ eleetinu, adticanni hatĩ hĩdĩhĩdĩĩc haaga, ĩꞌthõng hikia hẽgẽẽran nyattalĩ ꞌcĩ ĩĩn ngeju.

Biyyi cĩg Krĩstõ

11Nẽẽthĩ ꞌyioko, ikia ĩĩ Krĩstõ paadĩr cobbi cĩ hẽlẽggĩ vẽlẽk ꞌcĩg abũnnaa ꞌcĩg aauto loota nĩnga ho. Nẽ uduhun nẽẽ ꞌCieeth cĩ Nyekuci hẽẽtahujjieen, ꞌcĩ baa hõllõngaa ẽhẽnyta ẽẽtĩ ꞌcĩ holli õõ nẽ hõllõngaa ĩĩn dhoorit cĩ looc ꞌcĩ ẽhẽnytaa thõng ko. 12Aitiõõ hõllõngaa aduhun Krĩstõ Nĩngĩtĩ Aꞌngirannii ꞌcĩ Ẽllẽẽmĩth Gẽrrẽẽt ko, biyyiẽẽtĩĩ cĩg ẽẽthak hĩ cĩg maala ꞌcĩg ĩĩn ꞌgaarriẽẽn. Baa aduhun Krĩstõ nĩngĩtĩ nicci tabattĩ hõdẽẽthõng biyyiẽẽtĩĩ cĩgĩnnĩg, hátĩ hõõgaeet ngagĩĩt ꞌthẽccanẽẽtĩ cĩggaac ũdũt. 13Nyattaala baa ꞌrẽẽnĩ, baa gõõng adticaniini eeta biyyi cĩg ẽẽthak hĩ cĩg olĩꞌnyaannu hĩ hatiꞌtheet ꞌcĩ ĩwaadini moolĩtĩ, hũtũũnytĩ ꞌthẽccanẽẽt eleetinii cĩg eetuk. 14Ummuhit dako nõõ ꞌgõõl ꞌcĩ ũũnyĩ biyyieeta cĩg Krĩstõ muhẽẽnĩt cĩ ꞌthinneeti cĩggaac, hĩnĩngĩtĩ ꞌthẽccanẽẽt ꞌcĩg hadĩman naag, hátĩ halaac Nyekuc ꞌcĩ arũgĩ ũdũt. ꞌTirrianaa cĩ Lori ꞌcĩ aalla ũdũt, ikia ẽlẽmana Yeesu ẽlẽ cĩnnĩ hĩ ꞌgaarrieenit ꞌcĩ ẽllẽẽmĩth, hĩnĩngĩtĩ ꞌthẽccanẽẽt cĩggaac.

15Ĩnõõ ꞌcĩ ĩĩnnĩ Yeesu jayyio ꞌcĩ õthõõthĩ eet hĩ Nyekuc lõhõtaa ꞌcĩ ĩĩn ngeju, hátĩ hiita hummuddia eeta vẽlẽk baag avvaa, rũgẽt ꞌcĩ aalla ooo baa aduha Nyekuci. Hĩnĩngĩtĩ baa ꞌthẽk adaahĩ Krĩstõ, hátĩ hõõga ĩhõõggõ ukẽẽttaa cĩ ꞌthẽccanẽẽt baag adĩman lõhõtaa baa ꞌrẽẽnĩ.

16Nẽẽthĩ ꞌyioko, má ũũnnĩk eet umwaa lõhõt, adiim agayyi jurrung ngaatĩ adaahĩ ẽẽtĩ ꞌcĩ baa aarĩk lõhõt ko. 17Aku adticanni lõhõt urutaa cĩ daahĩth cĩ eet ꞌcĩ baa aarĩk lõhõt ko. Má nga arũgĩ ẽẽtĩ ꞌcĩ baa aarĩk lõhõt ko, aitiõõ lõhõt buúk hõllõngaa adticanni.

18Ĩnõõ ꞌyioko baa aarĩhõõthĩkĩ lõhõt baa oou, hidticanõõ biyyiẽẽtĩĩ cĩg idiingak ko. 19Urutaa baa itigiilihi Mũũꞌtha nyattalliook cĩg Nyekuci eet vẽlẽk, ikia ittiha nẽẽ biyyi cĩg maala hĩ cĩg ẽẽthak hĩ maam urwacanĩ ꞌbuuk cĩ nyattal cĩ Nyekuci hĩ eet buúk. Baa urwacaniini Mũũꞌtha cẽrẽm ꞌcĩ õlõõ hĩ bõllõõk. 20Ma ho, uduhaak eet ĩĩnnĩk, “Biyyi cĩg lõhõtaak cieegi,#9:20 Biyyi cĩg lõhõtaak: Baa aaꞌnyĩk Nyekuci eet cĩg Ĩꞌthĩraẽlĩ hibboorito ꞌgaarriẽẽn cĩg olĩꞌnyaannu hĩ cĩg ẽẽthak, hátĩ hũtũũnyĩtõ ĩhõõggõ ꞌthẽccanẽẽtĩĩ cĩggĩĩng. Ẽtẽrꞌtha ꞌgaarriẽẽna cieeg daahĩth ꞌcĩ hatĩ õkõ adaaknĩ Yeesu Krĩstõ hurucceea hĩ Mĩꞌnyõõn cĩ Nyekuci. Ũũny hatĩ Yeesu ꞌgaarrieettaa cĩnnĩ ĩcĩ ĩĩn hõdẽẽthõng, ꞌthẽccanẽẽt cĩg eet vẽlẽk ꞌcĩg ẽlẽmĩ ĩnõõnnõ. Tigiil ꞌBuuk cĩ Luugithõõ 24:8; Levitiko 16:11-19; Maatteeo 14:24; Maatteeo 26:28. baa aduhaakuung ngagiit Nyekuci anneekuung uꞌthuutti.”#Tigiil ꞌBuuk cĩ Luugithõõ 24:8 21ꞌGõõlaa nĩĩcĩ dioo, ikia urwacan Mũũꞌtha ꞌCieeth cĩ Nyekuci horrwaa ꞌcĩ õdõhõhĩĩ kak, hĩ hẽlẽggĩ vẽlẽk ꞌcĩg adticaniini paadĩrꞌnya laiitta. 22Nẽ dĩdĩ nyattaalaa cĩ Mũũꞌtha, ũũnyĩ hẽlẽggĩ vẽlẽk biyyiẽẽtĩ. Ma nga hibboorria biyyieeta, aitiõõ hõllõngaa ũũnnothoothĩk ꞌthẽccanẽẽta.

23Ĩnõõ ꞌcĩ ũũnyẽnĩ hẽlẽggĩ ꞌcĩg aattĩg ꞌCieethaa cĩ Nyekuci horrwaa ꞌcĩ õdõhõhĩĩ kak, ꞌcĩg ĩthakꞌthoothĩk hẽlẽggĩ ꞌcĩg aattĩg hẽẽtahujjieen, biyyiẽẽtĩĩ cĩg idiꞌngwaanu ho. Nẽẽthĩ, hẽlẽggĩ ꞌcĩg ĩĩn dĩdĩ ꞌcĩg aattĩg hẽẽtahujjieen, ũũnyĩ nẽẽg ꞌgaarriẽẽnĩĩ ꞌcĩg ẽllẽẽmĩth ĩĩcĩg ĩllõõan biyyi cĩg idiꞌngwaanu. 24Ĩnõõ baa hõllõngaa adukni Krĩstõ ꞌCieeth cĩ Nyekuci, baa ẽhẽnyta ẽẽtĩ ꞌcĩ holli õõ nẽ ꞌcieeth tĩho, ĩthakꞌthoothĩk ꞌcieeth ꞌcĩ ĩĩn dĩdĩ. Nẽẽthĩ, baa aduhun Krĩstõ hẽẽtahujjieen nẽ ꞌyioko arũmĩ nẽẽ hĩ Nyekuc heeleet ngagĩĩta. 25Baa hõllõngaa aduhun Krĩstõ hẽẽtkujjieen hũũk hẽlẽmana ẽlẽ cĩnnĩ tabattĩ hiriiri, hĩ paadĩrĩ cobbi loota nĩnga ꞌcĩ aduhun Nĩngĩtĩ Aꞌngirannii ꞌcĩ Ẽllẽẽmĩth Gẽrrẽẽt, biyyiẽẽtĩĩ cĩg idiꞌngwaanu noho tabattĩ hõdẽẽthõng irkiꞌnyia hĩ irkiꞌnyia ho. 26Má baa hẽlẽmana Yeesu ẽlẽ cĩnnĩ irkiꞌnyia vẽlẽk, occa baa appĩĩrna nẽẽ tabattĩ mẽẽlĩg nganĩngĩtĩ ẽhẽnytaanĩ lõõcĩ. Nẽẽthĩ, baa ẽlẽmana nẽẽ ẽlẽ cĩnnĩ tabattĩ hõdẽẽthõng diooni dtuurnattaa cĩ kõr tĩho, hátĩ hĩĩ nẽẽ ꞌgaarrieenit ꞌcĩ ũũny ꞌthẽccanẽẽta. 27Hĩgõõng adaahĩ ẽẽtĩ tabattĩ hõdẽẽthõng nẽ ẽttẽẽd Nyekuci thõõth cĩnnĩ, 28adaahĩ thĩ Krĩstõ buúk tabattĩ hõdẽẽthõng hĩĩ ꞌgaarrieenit ꞌcĩg attik ꞌthẽccanẽẽt cĩg eet ꞌcĩg mẽẽlĩg. Õbõda hatĩ Krĩstõ tarĩ, hõllõngaa õbõda hikia hittik ꞌthẽccanẽẽt cĩggaac diooni, õbõda Krĩstõ aꞌnyaha elliaanĩt cĩg eet ꞌcĩg ẽrẽ ĩnõõnnõ.

Currently Selected:

Ebereei 9: did

Highlight

Compare

Copy