Ebereei 10
10
Odoyyii ꞌgaarrieeniti cĩ Yeesu
1Aaĩ nyattalĩ cĩ Mũũꞌtha hĩ lorii cĩ hẽlẽggĩ ꞌcĩg abũnnaa ꞌcĩg hatĩ nga au horumwa. Nẽ nyattalĩ ꞌcĩ aaĩ hĩ lorii ho, hõllõngaa ĩĩn hẽlẽggĩ ꞌcĩg abũnnaa eleetinii cĩggĩĩng ẽmmẽn, hĩnĩngĩtĩ hõllõngaa ũũny eet ꞌthẽccanẽẽtĩĩ cĩggĩĩng, hĩnĩngĩtĩ ꞌgarriẽẽn ꞌcĩg ibboorri hiriiri irkiꞌnyia hĩ irkiꞌnyia. 2Má baa hũtũũnyĩtõ ꞌgaarriẽẽna cieeg ꞌthẽccanẽẽt cĩg eet ꞌcĩg ala Nyekuc, occa ꞌyioko iittiõõ eeta hõllõngaa adiim ꞌgaarriẽẽn ũgĩ tarĩ, ꞌcĩg ũũny ꞌthẽccanẽẽt cĩggĩĩng. 3Nẽẽthĩ, ꞌgaarriẽẽna nicciag, ammuhaak hinnia eet ꞌthẽccanẽẽt cĩggĩĩng irkiꞌnyia vẽlẽk. 4Hĩnĩngĩtĩ hõllõngaa occa ũũny biyyieeta cĩg olĩꞌnyaannu hĩ cĩg ẽẽthak ꞌthẽccanẽẽt cĩg eetuk.
5Ĩnõõ baa akuuni Krĩstõ loota nĩnga, hikia hĩĩnnĩk Nyekuc,
“Baa hõllõngaa adiimi nii ꞌgaarriẽẽn cĩg idiꞌngwaanu hode atabi ꞌbaaninit ꞌcĩ ũũny ꞌthẽccanẽẽt.
Nẽẽthĩ, baa aaꞌnyaa nii nganĩĩt ẽlẽ caannĩ hẽlẽmana hĩĩ ꞌbaaninit.
6Baa iittiõõ nii hõllõngaa accamanoothihi,
hĩnĩngĩtĩ idiꞌngwa hĩ ꞌgaarriẽẽn ꞌcĩg ĩwaaddi, hĩnĩngĩtĩ ꞌthẽccanẽẽta.
7Nẽẽthĩ hĩĩna naa nẽẽ, ‘Nyekuc, baa hakuu naa hikia hĩdĩman tabiinit cunni,
haau hĩcĩ eheeddi ꞌBuuhaa cĩ Nyekuci.’ ”#Tigiil ꞌBuuk cĩ Tegellwaanu 40:6-8
8Aduha Krĩstõ ĩĩcĩ oou aĩ, “Baa hõllõngaa accamanoothihi nii, hĩnĩngĩtĩ ꞌbaaninit hĩ ꞌgaarriẽẽn ꞌcĩg baag aaꞌnyĩhoothikii nganiit, hĩnĩngĩtĩ ꞌthẽccanẽẽta” tananga baa hidiim nyattalĩ haanytĩhoothihii nganiit ꞌgaarriẽẽna hĩ ꞌbaaninit. 9Nẽ tarĩ uduha Krĩstõ ĩĩ, “Cĩĩn nõõ, hikia hĩdĩmana naa thõõth baa adiimi niina.” Ikia ẽgẽẽran Krĩstõ lõhõt baa ꞌrẽẽnĩ nẽ irigitheek lõhõt ꞌcĩ ĩĩn ngeju. 10Nẽ tabiittaa nĩĩca, hiita helleemito naag, hĩnĩngĩtĩ ẽlẽmana Yeesu Krĩstõ ẽlẽ cĩnnĩ ũdũt hĩĩ ꞌgaarrieenit tabattĩ hõdẽẽthõng, hĩnĩngĩtĩ eet vẽlẽk.
11Nyattaalaa baa ꞌrẽẽnĩ, abĩlĩ paadĩrĩ hõdõõkõthĩ ngaatĩ ĩbboorini ꞌgaarrieeniti, hĩbbõõr ꞌgaarriẽẽn ꞌcĩg aduhõõ thõng tabattĩ hiriiri, ꞌcĩg hõllõngaa attik ꞌthẽccanẽẽt cĩg eetuk battaala. 12Nẽẽthĩ, baa ẽlẽmanaak Krĩstõ paadĩrĩ cĩnaac ẽlẽ cĩnnĩ Nyekuc, hĩĩ ꞌgaarrieenit hõdẽẽthõng ꞌcĩ attik ꞌthẽccanẽẽta. Ma ho, ũũk iccioloongan nẽẽ ngaatĩ bulẽẽttõ ĩĩcĩ aꞌthiit cobbi cĩ Nyekuci. 13Nĩngĩtĩ õkõ ereeini Krĩstõ nĩngaata, ĩꞌthõng hikia hĩllõõan Nyekuci mĩrõk cĩgĩnnĩg. 14Hĩnĩngĩtĩ ꞌgaarrieenit cĩnnĩ ꞌcĩ odoyyii ho, ikia õõga Krĩstõ eet ꞌcĩg aꞌnyahaak nẽẽ Nyekuc ꞌthẽccaana.
15Nẽ aduhaakeet Lorii ꞌcĩ Ẽllẽẽmĩth buúk ngagĩĩt aĩ,
16“Ma ikia kõrra tĩho,
lõhõt ꞌcĩ ĩĩn ngeju cieeni, ꞌcĩ hatĩ hadaka naag hĩ eet cĩgannĩg.
Haaꞌnyihi hatĩ ĩhõõggõ huꞌthuutti nyattal caannĩ ootini
nẽ aꞌnyahit ꞌthinneetini.”#Tigiil ꞌBuuk cĩ ꞌJeremia 31:33
17Nẽ ĩttoorĩk thõõth icci ĩĩ,
“Hataarothi hatĩ naa ꞌthẽccanẽẽt cĩggĩĩng
hĩ thooꞌthiok cĩggĩĩng ꞌcĩg abathĩ.”#Tigiil ꞌBuuk cĩ ꞌJeremia 31:34
18Ma ũtũngeek Nyekuci ꞌthẽccanẽẽt vẽlẽk, iittiõõ thĩ ꞌgaarriẽẽna ꞌcĩg ibboorri, hĩnĩngĩtĩ ꞌthẽccanẽẽt tõõ.
ꞌGõõl ꞌcĩ ĩĩn ngeju ꞌcĩ hadukni õlõ cĩ Nyekuci
19ꞌGotoonoga hĩ ngoonoga, akũtanneet biyyieeta cĩg Yeesu ngagĩĩt ngaatĩ hadukni Nĩngĩtĩ Aꞌngirannii ꞌcĩ Ẽllẽẽmĩth Gẽrrẽẽt. 20Ubbuuhĩheet Yeesu daahĩthaa cĩnnĩ ngagĩĩt ꞌgõõl ꞌcĩ ĩĩn ngeju ꞌcĩ aaꞌnyeet rũgẽt. Nẽ aaꞌnyeet huduhunit Nĩngĩtĩ Aꞌngirannii ꞌcĩ Ẽllẽẽmĩth Gẽrrẽẽt, ngaatĩ ẽrrẽẽcĩ cẽrẽm ꞌcĩ ẽꞌngẽr ꞌCieeth cĩ Nyekuci ho hõrggẽẽna. 21Nẽ hĩcĩ haꞌnyak naag paadĩr cobbi ꞌCieetõõ cĩ Nyekuci, 22hõõt muumaa cĩ Nyekuci ꞌthinneetinii ꞌcĩg ĩĩn dĩdĩ ĩcĩg hẽlẽmmĩ ĩnõõnnõ. Hĩnĩngĩtĩ ũtũũnyĩ muhẽẽnĩtĩ cĩ ꞌthinneeti cĩggaac cĩg ꞌthẽccaanak, biyyiẽẽtĩĩ cĩg Krĩstõ, haanyteet ngagĩĩt hĩĩtõ tẽllĩg nẽ ũtũũnytĩ eleeti cĩggaac buúk maamĩĩ ꞌcĩg tẽllĩg. 23Hĩrrĩcatta naag ngaatĩ haꞌnyahĩ muhẽẽnĩt cĩnaac nẽ hõkõmtĩ thõõth baa aduhaakeet Nyekuci ngagĩĩta, hĩnĩngĩtĩ adĩman hatĩ nẽẽ thõõth baa aduha nẽẽnĩ. 24Huꞌthuutti ngaatĩ hakũtanĩ eleeti ꞌgõõlaa ꞌcĩ hammĩnanõõnĩ nẽ hĩdĩmanit thooꞌthiok ꞌcĩg abũnnaa. 25Hommottio hõdõõkõthĩ ngaatĩ laiitto nẽ occa hõllõngaa hadiim hĩthahĩth eet gõõng abũrĩ ngaatĩ adĩmanĩ noho, nẽẽthĩ, adiim hakũtan eleeti hõdõõkõthĩ, hátĩ gõõng homottio hĩ ꞌyioko ho, hĩcĩ acinnu niig buúk, õbõhĩ kõrra ꞌcĩ õbõdaanĩ Makayyioohiti ho.
26Hõlõ, má hara harĩnyaneek naag ꞌthẽccan noho baa hĩthĩhĩt ꞌgẽẽnyĩth ꞌcĩ thõõth ꞌcĩ ĩĩn dĩdĩ, iittiõõ ꞌgaarrieeniti ꞌcĩ hatĩ attik ꞌthẽccanẽẽt ꞌcĩg nga idiongan tõõ. 27Hitingolli naag thõõth ꞌcĩ etteedini thooꞌthioha dioo, hĩ ꞌgwoo ꞌcĩ hatĩ atũũth mĩrõk ꞌcĩg aharrieek Nyekuc. 28Nẽ ẽẽtĩ ꞌcĩ baa abũrĩ nyattal baa Mũũꞌtha, aruhi hiꞌthihi tamaati hẽbẽrẽẽnnĩĩ cĩg eet ꞌcĩg ĩĩn ꞌramma hode iyyio. 29Ummuhit dako nõõ ngaatĩ ahucci ukẽẽnĩtĩ ꞌcĩ hatĩ uukẽnĩ eeta ꞌcĩg abũrĩ thõõth cĩ Ngeertĩ Nyekuci nẽ ũtũbũrĩt biyyi cĩg lõhõtaak ꞌcĩg aaꞌnyeet ngagĩĩt helleemit. Arannĩ nẽẽg biyyi cĩg lõhõtaak, haau hĩcĩ hõllõngaa ẽllẽẽmĩth nẽ tarĩ, odoomito Lori ꞌcĩ Ẽllẽẽmĩth ꞌcĩ aꞌnyahaakeet ngagĩĩt tamaati cĩ Nyekuci. 30Hĩnĩngĩtĩ haga naag Nyekuc baa aduha aĩ, “Nganĩĩt Nyekuc, ꞌcĩ occa haruha oolo.”#Tigiil ꞌBuuk cĩ Ditoronomi 32:35 Nẽ tarĩ uduha ĩĩ, “Ẽttẽẽd hatĩ Makayyioohiti thooꞌthiok cĩg eet cĩgĩnnĩg.”#Tigiil ꞌBuuk cĩ Ditoronomi 32:36; Tegellwaanu 135:14 31Ahuci ukẽẽnĩtĩ gẽrrẽẽt athĩnĩĩ cĩg Nyekuc ꞌcĩ arũgĩ.
32Ma hataarroꞌthu waathinniook baag oou, baag athiknu niig thõõth cĩ Yeesu, ummukta tarĩ ꞌgõõl baa elemmu niig thõõth cĩnnĩ, tananga baa hĩĩ maka pĩĩrnanĩtĩ cunuung gẽrrẽẽt. 33Baa gõõng odoommuung eeta ngagiit lothippita waathinnioohĩĩ ũgẽẽgĩ nẽ uuktuung thõng buúk. Nẽ tarĩ, baa eelliou nyaagwaana waathinnioohĩ ũgẽẽgĩ ĩcĩg pĩĩrnattiaak. 34Baa ippiiriau niig hõdẽĩ hĩ eet baag aarĩhoothiku baabuuthatõõ. Ma baa ootti eeta ijjio cugguung vẽlẽk, baa ẽlẽmaaku taliitta. Baa agayyu niig ngaatĩ ereeyyuung ngagiit hẽlẽggĩ cugguung ꞌcĩg abũnnaa ꞌcĩg aalla ũdũt. 35Ĩnõõ ꞌcĩ haĩ, ma hadhuheeku kõmĩĩth cĩ lemiinit cunuung tuu, hĩnĩngĩtĩ õbõdaakuung hatĩ ngagiit ꞌbaaniniti cobbiẽẽnĩ.
36Adiim emmeꞌthu thooꞌthiok, hátĩ idticanit tabiinit cĩ Nyekuci. Nẽẽthĩ hatĩ ummuddiaau thõõth baa aduha nẽẽnĩ. 37Hĩnĩngĩtĩ,
“Õbõhĩ ikia ẽẽtĩ ꞌcĩ hatĩ aku nẽ hõllõngaa hatĩ aayyiaa ĩꞌthõng.
38Nẽẽthĩ, arũgĩ hatĩ ẽẽtĩ caannĩ ꞌcĩ abũnnaa, hĩnĩngĩtĩ lemiinit.
Nẽ aitiõõ hatĩ naa hõllõngaa haccamanoothihi, hatĩ aaĩ ẽẽtĩ umwaa
ꞌcĩ abũrra nganĩĩta.”#Tigiil ꞌBuuk cĩ Habakkuhi 2:3-4
39Hõllõngaa haattĩg naag hĩ eeta baag ũtũbũrĩt ĩnõõnnõ ho, haꞌnyak naag lemiinit cĩ daahĩth cĩ Yeesu baa aku ẽẽlanneet ngagĩĩta.
Currently Selected:
Ebereei 10: did
Highlight
Share
Compare
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc., All rights reserved.
