Ebereei 8

Ĩĩn Yeesu paadĩr cĩnaac cobbi

1Thõõth dẽẽdẽ ꞌcĩ aaddi ꞌcĩ aĩ nẽẽ, haꞌnyak naag paadĩr cobbi, ĩnõõnnõ Yeesu ꞌcĩ iccioloongan attiaa cobbi dtaabawa, makaaꞌthĩtaa cĩ Nyekuci hẽẽtahujjieen. 2Adticanni nẽẽ hĩ paadĩrĩ cobbi ꞌCieethaa cĩ Nyekuci ĩcĩ ĩĩn dĩdĩ, ꞌCieeth ꞌcĩ baa ẽhẽnyta Nyekuci nẽ hõllõngaa ẽhẽnyta ẽẽtĩ ꞌcĩ holli õõ haaga.

3Nẽẽthĩ, ma eberriaa paadĩrĩ umwaa cobbi haaꞌnyĩk Nyekuc ꞌbaaninit hĩ ꞌgaarriẽẽn, occa aaꞌnyĩk paadĩrĩ cĩnaac cobbi buúk Nyekuc ꞌgaarrieenit cĩnnĩ. 4Má baa haau nẽẽ loota nĩnga, occa baa hõllõngaa ĩĩn paadĩr, hĩnĩngĩtĩ baa aauto paadĩrꞌnya loota nĩnga ꞌcĩg aaꞌnyĩk Nyekuc ꞌbaaninit hĩ ꞌgaarriẽẽn, hĩ baa aduha nyattalĩ cĩ Mũũꞌtha. 5Hĩnĩngĩtĩ baa adticanni nẽẽg ꞌCieetõõ cĩ Nyekuci horrwaa ꞌcĩ õdõhõhĩĩ kak,#8:5 ꞌCieeth cĩ Nyekuci horrwaa ꞌcĩ õdõhõhĩĩ kak: Baa ẽhẽnytaa ꞌCieeth ciee ceremwaanĩ haaga korrioohĩĩ baag aluuganĩ eeta cĩg Ĩꞌthĩraẽlĩ Ijjiba, hátĩ hõõlõl hatĩ irriongan eeta, nẽ ĩthakꞌthoothĩk ꞌCieeth cĩ Nyekuci ꞌcĩ abuli ꞌJeruꞌthalẽma. Tigiil ꞌBuuk cĩ Luugithõõ 25:40; Dtiicanĩ cĩg ꞌThooyyiahu 7:44-45; Ebereei 8:5. ꞌCieeth ꞌcĩ ĩĩn ꞌthooura ꞌcĩ ĩthakꞌthoothĩk ꞌCieeth cĩ Nyekuci hẽẽtahujjieen. Ĩnõõ baa annẽẽkĩ Nyekuci Mũũꞌtha baa idiim ẽtẽhẽny ꞌCieeth cĩ Nyekuci nẽẽ, “Gaooth ĩĩ, tẽhẽny ꞌcieeth hĩ baa heterꞌtheekii naa nganiit muuraa cĩ ꞌThĩnaĩ.”#Tigiil ꞌBuuk cĩ Luugithõõ 25:40 6Nẽẽthĩ ꞌyioko, eberria Yeesu paadĩrĩ cĩnaac cobbi nẽ aaꞌnyĩhoothĩk dtiici ꞌcĩ ĩllõõan dtiic cĩ paadĩrꞌnya baag oou, hĩnĩngĩtĩ ĩĩ nẽẽ jayyio ꞌcĩ othooꞌtheet ngagĩĩt hĩ Nyekuc jurrung, thõõthaa cĩ lõhõt ꞌcĩ ĩĩn ngeju baa aduha Nyekuci.

7Má baa hũbũna lõhõt baa oou, occa ꞌyioko iittiõõ hõllõngaa hadiim lõhõt umwa tarĩ. 8Nẽẽthĩ, baa hinnia aku ammũda Nyekuci ꞌthẽccan hĩ eet, nĩngĩtĩ õthõõthĩ Makayyioohiti aĩnnĩ,

“Aku hatĩ kõrra,

ꞌcĩ haarĩkĩĩ naa lõhõt ꞌcĩ ĩĩn ngeju

hĩ eet cĩg Ĩꞌthĩraẽlĩ

hĩ cĩg ꞌJuuda buúk.

9Aitiõõ hatĩ lõhõt ciee hõllõngaa aaĩ

hĩ baa hadaka naag hĩ hĩbaangĩ cĩggĩĩng

baa haluuganĩĩ ĩhõõggõ Ijjiba,

hikia hũtũbũra naa ĩhõõggõ,

hĩnĩngĩtĩ baa hõllõngaa aꞌthũũnnĩ nẽẽg lõhõt caannĩ ho.

10Nẽẽthĩ, aduha Makayyioohit aĩ, lõhõt caannĩ ciee ꞌcĩ ĩĩn ngeju ꞌcĩ hatĩ hadaka naag

hĩ eet ꞌcĩg Ĩꞌthĩraẽlĩ kõr tĩho.

Haarihi hatĩ naa nyattal caannĩ ootinii cĩggĩĩng

nẽ heteheedĩha ꞌthinneetinii cĩggĩĩng.

Hĩĩnĩ hatĩ naa Nyekuc cĩnĩĩng,

nẽ ĩĩtõ nẽẽg eet cĩgannĩg.

11Iittiõõ hatĩ ẽẽtĩ ꞌcĩ nga alliman eet ꞌcĩ aarõõ

hode alliman ꞌgõtõnĩ anneek, ‘Gaa Makayyioohit tõõ.’

Hĩnĩngĩtĩ agayyia hatĩ nganĩĩt eeta vẽlẽk

loholeecaa ꞌcĩ hidici ĩꞌthõng hõdõlan eet ꞌcĩg obbitig.

12Nẽ hammaannihi hatĩ naa ꞌthẽccanẽẽt cĩggĩĩng

nẽ hataarotha ꞌthẽccanẽẽt tĩko ũdũt.”#Tigiil ꞌBuuk cĩ ꞌJeremia 31:31-34

13Ma õthõõth Makayyioohiti thõõth cĩ lõhõt ꞌcĩ ĩĩn ngeju ho, õthõõth nẽẽ aĩ, iittiõõ lõhõt baa ꞌrẽẽnĩ hõllõngaa adticanni. Nẽ ꞌyioko, õbõhĩ uduhoothĩha nẽ iꞌnginõõthĩ hatĩ hĩdĩĩkoothong.

Currently Selected:

Ebereei 8: did

Highlight

Compare

Copy