Ebereei 12

Terethiinit cĩ authet cĩ Yeesu

1Nẽẽthĩ hoti ho, irriamaneekeet ngagĩĩt lothippiti cobbi cĩ eet ꞌcĩg ĩĩn hẽbẽrĩ cĩg rũgẽt cĩ lemiitto. Hadiim hũũnnĩk naag hẽlẽggĩ vẽlẽk hĩ ꞌthẽccanẽẽt ꞌcĩg alaammeet ꞌgõõlaa ꞌcĩ hõdõlanĩ rũgẽt ꞌcĩ aalla ooo. Hetemeethit thooꞌthiok ꞌcĩg abathĩ ꞌcĩg alaammeet ngagĩĩt ngaatĩ hanũĩ ꞌlimman cĩ Yeesu. 2Hakatti naag Yeesu hẽbẽrĩ, ĩnõõnnõ ꞌcĩ uwwatteekeet ngagĩĩt nẽ aaꞌnyĩk lemiinit cĩnaac hũttũbanoothĩk. Hĩnĩngĩtĩ taliinit ꞌcĩ ẽrẽ ĩnõõnnõ, ikia ẽtẽmẽẽth nẽẽ ngaaoni cĩ hurucceeo. Nẽ ꞌyioko, iccioloongan nẽẽ ĩĩcĩ aꞌthiit cobbi cĩ Nyekuci dtaabawaa cĩ bulẽẽttõ. 3Ummuhuttooth thõõth baa ẽmmẽẽꞌthĩ Yeesu doominit ꞌcĩ õdõõmĩ eeta ꞌcĩg ĩĩn ꞌthẽccanniook ĩnõõnnõ. Nẽẽthĩ, aitiõõ hõllõngaa hatĩ appĩĩrnannu nẽ ũtũngteehu lemiinit cunuung.

4Nẽẽthĩ, ꞌgõõlaa ꞌcĩ oꞌngonyoonnu niig kĩ ꞌthẽccanẽẽta, nga adaahit niiga. 5Ataarrioꞌthu occa niig thooꞌthiok baag akũtannuung Nyekuci hĩ lohollia cĩgĩnnẽẽgĩ? Baa aduha nẽẽ aĩ,

“Má hamaaccu tilooinit cĩ Makayyiookto,

nẽ ma huunniku lemiinit hatĩ etereꞌthuung nẽẽnĩ.

6Hĩnĩngĩtĩ iloot Makayyioohiti eet ꞌcĩg ammĩnan nẽẽnĩ,

nẽ uuk eet vẽlẽk ꞌcĩg ẽlẽmĩ nẽẽ hĩ lohollia cĩgĩnnẽẽgĩ.”#Tigiil ꞌBuuk cĩ ꞌGẽẽnyĩthõõ 3:11-12

7Etemeethit ꞌcannan haau hĩ tilooiniti, iloottuung Nyekuci ngagiit hĩ lohollia cĩgĩnnẽẽgĩ. Nganĩ occa gõõng ꞌcĩ nga hitilo maaꞌnyia? 8Iloot Nyekuci lõhõlĩ cĩgĩnnĩg vẽlẽk nẽ má aitiõõ hõllõngaa iloottuung nẽẽnĩ, ĩko thĩ hõllõngaa iiginnu lõhõlĩ cĩgĩnnĩg dĩdĩ. 9Nẽẽthĩ, hiꞌngolli naag nyakangaaꞌnya cĩggaac hatĩ ilootteeta. Nẽẽthĩ ꞌyioko ĩcca occa aitiõõ hõllõngaa hiꞌngolli naag Baangeet ꞌcĩ loriẽẽt cĩggaac ꞌcĩ arũgĩ ooo hẽẽtahujjieen hatĩ ilootteeta? 10Hĩnĩngĩtĩ ilootteet ngagĩĩt nyakangaaꞌnya loota nĩnga irkiꞌnyia ꞌcĩg abadtẽc haaga, ꞌgõõlaa ꞌcĩ aga nẽẽg aĩ mẽẽn. Nẽẽthĩ, abũnnaa hĩ ngagĩĩt hõdõõkõthĩ hatĩ ilootteet Nyekuci, hátĩ hotholit ꞌlẽẽmĩth cĩnnĩ. 11Ahuci hõdõõkõthĩ hatĩ nga ilootteet eeta thõng. Má hillimanit ngaatĩ hathĩknĩ thõõth hatĩ nga ilootteet eeta, hadĩman hatĩ thõõth ꞌcĩ aũlanĩ nẽ haauto lõꞌngõõc.

12Nẽẽthĩ ꞌyioko, ma habarrittu, aanytĩk ĩbaati hĩ huthungti cugguung hittiranit. 13“Ũkũmatteek ꞌgõõl hũbũna,”#Tigiil ꞌBuuk cĩ ꞌGẽẽnyĩthõõ 4:26 hátĩ hiittiõõ eeta ꞌcĩg hõllõngaa attiran hĩ ꞌcĩg ahuuli lemiittaa cĩnĩĩng, hõllõngaa ẽttẽẽd looc.

Tilooinit hatĩ habũrĩ Nyekuc

14Ĩttĩmanit gẽrrẽẽt ngaatĩ aattiyyu lõꞌngõõc hĩ eet vẽlẽk! Aaut rũgẽtaa ꞌcĩ tẽllĩ. Ma hõllõngaa adĩmannu noho, aitiõõ hatĩ hõllõngaa acinnu Makayyioohit. 15Uꞌthuutti eleeti cugguung, hátĩ hiittiõõ ẽẽtĩ ꞌcĩ abacĩ bũnnai ꞌcĩ ẽllẽẽmĩth cĩ Nyekuci tõõ. Ma haaꞌnyiku eet umwa hĩlĩĩlĩ nẽ ĩkõõthahuung thooꞌthiok ꞌcĩg abathĩ. 16Ma hẽlẽmaaku eet umwa ꞌcĩ adĩman thooꞌthiok ꞌcĩg ĩĩn ꞌriiring nẽ ũtũbũr Nyekuc hĩ baa Eꞌthaau, baa ũũtẽnĩ ꞌgattan cĩnnĩ cĩ ꞌtirriaattõ, hĩnĩngĩtĩ ahat ꞌcĩ baa aduk tabattĩ hõdẽẽthõng. 17Agayyu niig urutaa cĩnnĩ ikia idiim Eꞌthaau haggatan maaꞌnyia ĩnõõnnõ, aku hinnia abũrĩ maaꞌnyia thõng. Nẽẽthĩ, baa aꞌnyaman Eꞌthaau ngaatĩ amammaayanĩ maaꞌnyĩ hõbõdaaĩ ꞌthĩnĩt haggatan ĩnõõnnõ, tananga baa arruui nẽẽ gẽrrẽẽt.

18Nga iita niig ngaatĩ aaĩ hĩ muur ꞌcĩ ꞌThĩnaĩ, ꞌcĩ occa hacĩn nẽ huhumita. Aitiõõ ꞌgwaa ꞌcĩ alanyĩt hode diith ꞌcĩ ĩĩn muguur hode ngõõtĩ ꞌcĩ attiran, 19hode tũũrĩ ꞌcĩ adtaki tõõ. Baa athĩhĩ eeta cĩg Ĩꞌthĩraẽlĩ molook ꞌcĩ õthõõthĩ. Nẽẽthĩ, baa alaacõ nẽẽg molook tĩho hĩjjaahõ, 20hĩnĩngĩtĩ baa iꞌngolli nẽẽg ngaatĩ athĩknĩ thõõth ꞌcĩ aduha mõlõõhĩ ho. Nẽ tarĩ, baa adukiaak ĩhõõggõ aĩ, “Uruhit iding umwa ꞌcĩ ahum muur.”#Tigiil ꞌBuuk cĩ Luugithõõ 19:12-13 21Baa abarrit Mũũꞌtha gẽrrẽẽt nẽ ĩĩ, “Habarriti naa tẽẽlꞌthĩtaa cobbi.”#Tigiil ꞌBuuk cĩ Ditoronomi 9:19

22Nẽ ꞌyioko, iitiaau niig muuraa cĩ ꞌThionĩ#12:22 ꞌThion: ꞌThaara ꞌcĩg haĩ ꞌThion ko, ĩĩn ꞌthaar ũgĩ cĩg ꞌJeruꞌthalẽmĩ. hĩ õlõõ cĩ Nyekuci ꞌJeruꞌthalẽma. ꞌTaaũn cobbi cĩ Nyekuc ꞌcĩ arũgĩ cieeni, nĩngĩtĩ au adahĩ aajĩlẽẽta ꞌcĩg ĩĩn aalibꞌnya hĩ aalibꞌnya karrama. 23Nẽ ꞌyioko, iitiaau niig lothippiti cĩ lemmiook ꞌcĩg ammĩnan Nyekuci gẽrrẽẽt, ꞌcĩg ĩĩgĩnnu lõhõlĩ ꞌcĩg oou ꞌcĩg eteheeddi ꞌthaara cugguung hẽẽtahujjieen. Iitiaau niig hĩ Nyekuc ꞌcĩ ẽttẽẽd thooꞌthiok vẽlẽk cĩg eetuk. Nẽ tarĩ, iitiaau hĩ loriẽẽt cĩg eet ꞌcĩg abũnnaa hẽẽtahujjieen, ꞌcĩg ꞌyioko aanytĩhoothĩk hũbũttaathõ. 24Nẽ iitiaau niig hĩ Yeesu ꞌcĩ ĩĩn jayyio ꞌcĩ õthõõthĩ lõhõt ꞌcĩ ĩĩn ngeju hõrggẽẽnaa cĩ Nyekuci hĩ eeta, hĩ biyyi ꞌcĩg urwacanni ꞌcĩg aꞌnyaha tũngẽẽnĩt cĩ ꞌthẽccaneetu, hõllõngaa aꞌnyaha oolo haauto hĩ biyyieeta baag Abeele.#12:24 Biyyi cĩg Abeele: Aduha thõõth baa aruhi Kaiino ꞌgõtõnĩ Abeele. Tigiil ꞌBuuk cĩ ꞌThianaattõ 4:1-16.

25Ĩcĩnĩt jurrung nẽ ma haburru ngaatĩ athiknu Nyekuc ꞌcĩ õthõõth ko. Baa hõllõngaa avvir eeta cĩg Ĩꞌthĩraẽlĩ, baag abũrĩ ngaatĩ athĩknĩ eet baa othoothĩk ĩhõõggõ muuraa cĩ ꞌThĩnaĩ. Ammuku niig ainnu occa avvirru, hatĩ aburru ngaatĩ athiknu eet ꞌcĩ õthõõtha hẽẽtahujjieen? 26Ma baa õthõõth Nyekuci ĩĩcĩ oou, baa õmmõõnnĩ mõlõõhĩ cĩnnĩ looc diooni. Nẽ ꞌyioko aduha nẽẽ aĩ, “Hõmmõõnnĩ hatĩ looc hĩ hẽẽtkujjieen vẽlẽk.”#Tigiil ꞌBuuk cĩ Haggaĩ 2:6 27Aĩ thõõth ciee nẽẽ, õmmõõnnĩ hatĩ Nyekuci hẽlẽggĩ vẽlẽk baag ẽhẽnytaa hiꞌngittõõthĩ, hátĩ hidionganit hẽlẽggĩ ꞌcĩg hõllõngaa õmmõõtĩ diooni.

28Hĩcĩ hummuddia naag habuccieet ꞌcĩ hõllõngaa õmmõõtĩ ho, hatalit nẽ hĩdĩhĩthĩt Nyekuc ngaatĩ halaĩ ĩnõõnnõ tẽẽlꞌthĩtaa ꞌcĩ ẽllẽẽmĩthĩ hĩ bulẽẽtta. 29Hĩnĩngĩtĩ, “Ĩĩn Nyekuci ꞌgwoo ꞌcĩ adũhan looc hĩĩ ꞌthĩĩ.”#Tigiil ꞌBuuk cĩ Ditoronomi 4:24

Currently Selected:

Ebereei 12: did

Highlight

Compare

Copy